Apokalis 8 - MEY HAYNA WAYNA MA YEZU KRISTE MA MEVEY

Zeheɗ ma tsəla na ta tek me bəzləmey ma gura

¹ Andza ma hukwa zeheɗ ana ma tsəla na na, a key rita ma ler na, kwa təke me ɓəley da 'ərlam na dakay….

² Arka i ma nəkadata madurlam a hay tsəla ma lətsa hiya ka mey dey ma Bay ma Bəla ana, ma vələmatar tolom hay tsəla.

³ Madurlam mekelehe ma sawa me lətsey bəse ta ŋgwa me key kuley, ta tek me dərzey tek me zey hayna ha ma gura da har. Ma vəlamar wurdey hay haɗadzidzay, ma aza ka vəladara a Bay'ərlam, ta me ɗuley mey ma ndaw kokwoɗ ana hay tabiyaha, ka ŋgwa me key kuley ma gura, na ka mey dey ma Koriwal ma bay ana.

⁴ Arka da har ma madurlam ana na, geŋges ma wurdey ana hay ma dərzam ana, a tsəley ka slam dey ma Bay ma Bəla, ta ma ɗula mey ma ndaw kokwoɗ ana hay aha.

⁵ Arka madurlam ana ma zəga tek me dərzey tek ana tok, ma rəhada ta waw ma ŋgwa me key kuley ana, arka ma kəladərawa ka dala, a da tərey na, me rəvey ma yam, vəɗe ma ɗay hay, me weteɗey ma yam ta dala ma me ɓəley.

Tolom mukwa tsəfəmey ana hay

⁶ Madurlam hay tsəla ta tolom ahiya tsəla da har ana ma həladama vaw ma da fata.

⁷ Na tsəfəmey ana ma fa tolom aŋga: ndzala, waw ma lahaɗa ha ta mambaz aha ma kuyawa ka dala, tsakay ma makar ana ma bəla me ley waw, tsakay ma makar ana ma vəɗe ma tek hay ma ley waw, arka tek ŋgəɗez ana hay ma lam waw.

⁸ Madurlam ma tsetsew ana ma fa tolom aŋga: tek ana ka ley andza mamba ɗuhwa, ma la waw aha kava me kəley a bəlay. Tsakay ma makar ana ma bəlay me tərey mambaz aha.

⁹ Tsakay ma makar ana ma tek ta dey ana hay da bəlay ma mətsam. Tsakay ma makar ana ma kombiwal ɗuhwa na hay da bəlay ana ma ŋgurfam.

¹⁰ Madurlam ma makar ana ma fa tolom aŋga, wurzla ma tek ana ɗuhwa ha da 'ərlam ma kəlawa, ma la waw aha, ma kəlawa ka wayaŋ ɗuhwa na hay ta vəɗiyem hay.

¹¹ Mezəley ŋga na na: «Marzla ɗuwekeke». Tsakay ma makar ma yam hay ma təram ta marzla ɗuwekeke ahiya da huɗa, arka ndaw hay haɗadzidzay ma mətsam, hərway ma yam ana ɗuwekeke.

¹² Madurlam ma faɗ ana ma fa tolom aŋga: tsakay ma makar ana ma me nəkey ma pas, tsakay ma makar ana ma me nəkey ma kiya, tsakay ma makar ana ma me nəkey ma wurzla hay, tek ana ka kəɗata tsoy. Ma təram ləvaŋ aha, tsakay ma makar ana ma rəpas me tərey ləvaŋ aha, dəvaɗ andza ha satsa.

¹³ Arka i ma nəkada: i ma tsənada matsav da soŋ soŋ ma ’ərlam a wudey aha ta magala ha: «Tuwam vaw kwar! Tuwam vaw kwar! Tuwam vaw kwar kuray ndaw ma dala hay, hərway ma tolom ma madurlam a ɗey makar ma da fəmata mba na hay!»