Apokalis 6 - MEY HAYNA WAYNA MA YEZU KRISTE MA MEVEY

Me hukwey ma ndepeɗ ma slərɓa na hay mukwa tsəfəmey ana

¹ Arka i ma nəkada: Andza bəzey təɓaŋ ma hukwa ndepeɗ ma slərɓa na tsəfəmey ana da walaŋ ma ndepeɗ ana hay tsəla na na, i ma tsənada gənaw ana tsəfəmey ana da walaŋ ma gənaw a hay faɗ na me wudey, vəɗe ma ɗay ŋga na andza ma yam me rəvey, a ləvey: «Sawa!»

² Arka i ma nəkada pəles babara ha. Ndaw ana ma ndza ha ka 'arra na, ta lalaŋ aha da har. Arka ma vahadəmara 'ar, ŋga ma daway andza ndaw ma zəga 'ar ma sleɗ a ba na, ma da watar 'ar a tek hay.

³ Andza ŋga ma hukwa zeheɗ ana ma tsetsew ana na, i ma tsənada gənaw ana ma tsetsew ana me wudey: «Sawa!»

⁴ Arka pəles mekelehe ma hərɗawa, a nəkey gagaza ha andza waw, ndaw ma tsəla ha ka 'arra na na, ma vəlamar slam har, ma davasada zozoy ba ka dala, ma ndaw hay ka kəɗam vaw vagay ahiya ka 'ar vaw ta na hay, arka na ma vəlamar maslalam ɗuhwa ha a har.

⁵ Andza ma hukwa zeheɗ ana ma makar ana na, i ma tsənada gənaw ana ma makar ana me wudey: «Sawa!» Arka i ma nəkada pəles zeziŋ aha, ndaw ana ma tsəla ha ka 'arra na ta kilo aha da har.

⁶ Arka i ma tsənada vəɗe ma ɗay, da walaŋ ma gənaw ana hana hay faɗ ana, a ləvey: «Zləraway gwada asləta na, sumkwo ma me vekey ma ndaw pal, salaway gwada makar na ka sumkwo ma me vekey ma ndaw pal. Amana, mal ta zom na ka da ləmatar zlay.

⁷ Andza ŋga ma hukwa zeheɗ ma faɗ ana na, arka i ma tsənada gənaw ma faɗ ana me wudey: «Sawa!»

⁸ Arka i ma nəkada na, pəles a nəkey andza ɓaslah ɓaslah, ndaw ana ma tsəla ha ka 'arra na a zəlamar: «Memətsey», slam ma ndaw ma tsəvay hay a səpamar aha bəzay. Ma vələmatar slam har ka diya ma faɗ ana ma dala, ma ka bazlata ndaw hay ba ka dala ta maslalam, ta may, ta memətsey, ta gənaw ɗuhwa na me pəɗey slaw ana hay ka dala.

⁹ Andza ŋga ma hukwa zeheɗ mazlam ana na, i ma nəkada ka slam ma ŋgwa ma kuley na, mezek ma ndaw ma sləmata ba hərway ma Guma ma Bay ma Bəla ana, ta seydewe ta ma kəmawa na hay.

¹⁰ Taya ma wudam ta magala ha, ma ləvam: «Miter kokwoɗ ana, dərka na, ka da ndzada sariya, ma da madatara gandaf ma ndaw ma dala hay, hərway ma mambaz ala ma mbəɗawa na na, ha kasl ka varay?»

¹¹ Arka ma vələmatar kelmedzey babara ha ka ndaw ka ndaw, arka ma ləvəmatar ka hutam nekəɗey ɗagay, ha ka ndaslam ba tərre andza ma mandala ta, ma kam mber dzaya na hay ta malam ata na hay ba ɗagay, na ma da sləmata vagay ahiya andza taya na.

¹² Arka i ma nəkada: andza ŋga ma hukwa zeheɗ ana ma mukwa na na, dala me ɓəley gegəɓets gegəɓets ma gədaŋ. Pas me tərey zeziŋ aha andza mberwesek, arka kiya kərem tabiyaha andza mambaz.

¹³ Wurzla ma 'ərlam hay ma kuiyəmawa ka dala, andza ma memeɗ ma mbatsərawa bəzey ma vəɗe hewer marlagway ana.

¹⁴ Ndasl ma 'ərlam me həley vaw ŋga dzaŋ andza a paɗam ɗeriwel, mamba hay ta dala na ma ɗawalaya ta yam ana hay ma mbəzlam.

¹⁵ Bay ma dala hay, ndaw ɗuhwa na hay, ndaw zleley ana hay ta ndaw gədaŋ ana hay, bay ma sidzew hay, beke hay ta ndaw ma wama 'ar ata na hay tabiyaha, ma kəzlam vaw a zlazlam hay ta dey ma hwatakwam da mamba hay.

¹⁶ A ləvəmatar a mamba hay ta hwatakwam hay: «Mbəzləmawa ka la, kəzladəmandar ba dəreŋ ta mey dey ma ndaw ana ma ndza ha ka koriwal ma bay ana, dəreŋ ta mevel ma tsar ma bəzey təɓaŋ.

¹⁷ Hərway pas ma mevel ata ma tsatar kambəlaɓa na tsoy ka husawa tsoy, ma da slafa me lətsey ka slam dey ta na na, way?.»