Apokalis 5 - MEY HAYNA WAYNA MA YEZU KRISTE MA MEVEY

Ɗeriwel ta bəzey təɓaŋ

¹ Arka i ma nəkada ɗeriwel da har zəmay ma ndaw ana, ma ndza ha ka koriwal ma bay ana. Ɗeriwel ana ma winda ha da huɗa na, ta dəba na dzay, ma wuɗa ha, ma slərɓa ha ta ndepeɗ slam tsəla.

² Arka i ma nəkada madurlam gədaŋ aha, a tələkey aha mey ta magala ha: «Ndaw ana ɗa ma slafa ma wura ɗeriwel ana, arka ma hukwata ta ndepeɗ ana ma slərɓa na hay na way?»

³ Amana kwa ndaw da 'ərlam, kwa ka dala dakay, kwa da tsəvay ma slafa ma wura ɗeriwel ana, ma da kəley dey a huɗa na dakay.

⁴ I ka yey vaw ma tuway, hərway ka ndzafam ndaw ana ɗa ma wura ɗeriwel ana, dakay na ma da kəley dey a huɗa dakay.

⁵ Ama ndaw asləta da walaŋ ma ndaw ma səka na hay ma ləvaya: «Ka tuway zlay! Nəkafa mabar ma gedzek ma Zuda, Bəzey ma hwaɗ ma David ka zəga 'ar ma sleɗ ba, a da wura ɗeriwel ana, ta ma hukwata ndepeɗ ma slərɓa ha slam tsəla na.

⁶ Arka i ma nəkada da wuzlah ma koriwal ana ta gənaw ana hay faɗ ana, da 'ərev ma ndaw ma səka na hay, Bəzey təɓaŋ ma lətsa ha, a nəkey andza ma slaha ba ma kuley. Dərom aŋga hay tsəla ta dey ahiya tsəla, na ŋga na hay na, mesəfrey ma Bay ma Bəla hay tsəla na ma sləram ka dala tabiyaha na.

⁷ Ŋga ma gurey ma da təɓa ɗeriwel ana da har zəmay ma ndaw ma ndza ha da koriwal ana.

⁸ Andza ŋga ma təɓa ɗeriwel ana ba na, gənaw a hay faɗ ana, ta ndaw ma səka na hay kokurow tsew kava faɗ ana, ma nam dəba ka slam dey ma bəzey təɓaŋ ana. Kwa way way ma zəga gandzaval aha da har ta kokwom ma gura hiya ma rəha ha ta wurdey, na ŋga na hay na, ma ɗula mey ma ndaw Kokwaɗ ana hay.

⁹ A kam walay wayna: «Kah na təɗe, kassla ma təɓa ɗeriwel ana, arka ma hukwata ndepeɗ ma slərɓa ha ana hay, hərway ka sləmaka ba ma kuley, arka ta mambaz a ɗek na, kah ka mbəɗatərawa ndaw hay ba a Bay ma Bəla, ndaw ma me səmbərey hay tabiyaha, ma mey hay tabiyaha, ma səkway hay tabiyaha, ndaw ma dala hay tabiyaha.

¹⁰ Arka ka da ləmar a Bay ma Bəla a lakwa na slala, ta baba me key kuley ana hay, arka a da kam bay ka dala.»

¹¹ Arka na i ma nəkada: arka i ma tsənada vəɗe ma ɗay ma madurlam hay haɗadzidzay, ma gənaw hay ta ndaw ma səka na hay, ma lətsaya teleleview ka slam ma koriwal ma bay ana. Taya ka slam ana a kam gabal haɗadzidzay, kwa a mbəsley vaw kakay.

¹² A tələkam mey ta magala ha: «Bəzey təɓaŋ ana ma slaha ba ma kuley ana na, ŋga na təɗe, me ndzefey ma slafa, zleley, me sərey 'ar, gədaŋ, me hesəkey bəzay, me wezley dey ta me Səmbərey.»

¹³ Arka tek na ma ka ahiya tabiya ha da 'ərlam ana, ka dala, da tsəvay ta ka 'ar ma bəlay ta tek na da huɗa na hay tabiyaha, i ma tsənada a tələkam aha mey a ləvam: «A ndaw na ma ndza ha ka koriwal ma bay ana, ta bəzey təɓaŋ ana satsa na, ka ndzafam ma Səmbərey ma hasəka bəzay, me wezley dey, bay da mevey temere da mevey temere»

¹⁴ Arka gənaw ahay faɗ ana ma ləvam: «Amen!» Arka ndaw ma səka na hay ma gərdam ma namar dəba.