Apokalis 21 - MEY HAYNA WAYNA MA YEZU KRISTE MA MEVEY

Həzlay ma 'ərlam wayna ta dala wayna

¹ Arka i ma nəkada ndasl ma 'ərlam waya ha ta dala waya ha, hərway ndasl ma 'ərlam tsəfəmey ana ta dala na tsəfəmey ana na, ka davasam ba, arka bəlay na ŋga dasakay.

² Arka wuraw Kokwaɗ ana, Zeruzalem na wayna, i da nəkada tok na, a hərɗawa ha da 'ərlam ka slam ma Bay ma Bəla, andza ma kokwa ma ləmadara vaw a zel aŋga.

³ Arka i ma tsənada vəɗe ma ɗay ma bawa da koriwal ma bay, ta magala ha a ləvey: «Nəkafama ka 'ay me ndzey ma Bay ma Bəla da walaŋ ma ndaw hay, a da ndzey ta taya. A da təram na səkway ŋga ahiya, ŋga a da tərey tey na Bay ma Bəla na ma ndzaha ta taya na tey.

⁴ A da səfadatara yam dey ta ba ka dey, memətsey a da key dasakay, kwa ma tuway vagay dasakay, kwa me wudey, kwa banay a da key dasakay, hərway bəla guram ana ka devesey tsoy.»

⁵ Arka ndaw ana ma ndza ha ka koriwal ma bay ana me ləvey: «Nəkafama i key tek hay tabiyaha waya ahiya.» Arka ŋga me ləvey: «Windey: Guma neney hay na, ɗerre dərka na»

⁶ Arka ŋga ma ləvaya: «Ma ka ha tsoy! Yah na Alfa ta Omega, me zley ta me ndesley. A ndaw yam ma harta na na, i da vəlar ’ar yam na me vey ana ma hayaha.

⁷ Ndaw ma da zəga 'ar ma sleɗ ana na, a da zəma zleley ana, i da tərey Bay ma Bəla aŋga ha, ŋga tey a da tərey bəzey ɗaw aha.

⁸ Ama ndaw zluwer ana hay, ndaw me mbəɗey sler a guma ta na hay, ndaw me key tek haya kakay kambəlaɓa na hay, ndaw me kəɗey ndaw vagay ana hay, ndaw me ney ta ndaw hay so ha na hay, ndaw me key hila hay, ndaw ma nəmatar dəba a ’ərlam ndəraya ta har ana hay, ndaw maləwaɗay ana hay tabiyaha na. Mala ma ta ma vəla ha na, da bəlay ma waw ta burəhway me dəlɓey ndaw ana. Ma ndaw ana ŋga na hay na, memətsey me tsetsew ana.»

Zeruzalem Wayna

⁹ Arka ndaw asləta da walaŋ ma madurlam ana hay tsəla na, ma zəga vəliyem ana hay tsəla ma rəha hiya ta magədama ana hay tsəla madakwaydok ana hay ma sawa, ma tsaya guma, ma ləvaya: «Sawa i da ɓafaka ka madəlay, ka kokwa ma bəzey təɓaŋ.»

¹⁰ Ma zəga mezek a ɗaw ka 'ar ma mamba ɗuhwa ha, sololo ha, arka ŋga ma ɓafaya ka wuraw Kokwaɗ ana, Zeruzalem, a hərɗawa ha da 'ərlam ka slam ma Bay ma Bəla.

¹¹ A wezley dey ta me wezley dey ma Bay ma Bəla ana, mewezley dey ŋga na na, a nəkey andza ŋgwa ma sumkwo haɗadzidzay ana, me nəkey ŋga na na, andza ŋgwa daha a zəlamar zaspe dey tsar tsar ta huɗa na.

¹² Zleɗ aŋga na na, debesem aha, zozom aha, mambaw kava kurow kava tsew. Arka ka mambaw ana hay na, madurlam hay kurow kava tsew, ta mezəley ma winda hiya kava, mezəley ma ndaw ma gedzek a hay kurow kava tsew ma bəzey ma Israyel hay.

¹³ 'Ar a bəzay, mambaw makar, ta tsakay lam mambaw makar, ta mey dzandzar mambaw makar, ta mey ŋgwa mambaw makar.

¹⁴ Zleɗ ma wuraw ana ma zla ha ka 'ar ma sek begəney hay kurow kava tsew, arka ka sek begəney ana hana hay kurow kava tsew ana hay na, mezəley ma maslaŋ ma bəzey təɓaŋ ana hay kurow kava tsew ana hay.

¹⁵ Ndaw ana ma tsaya guma na na, ta tek me wey tek aha da har, zeleŋ ma gura, ma da wada wuraw ana, mambaw aŋga na hay ta zleɗ aŋga na hay.

¹⁶ Wuraw ana na, tsakay ŋga na hay na, kal kal faɗ ata ahiya, ma zozom, ma zlepetem aŋga na hay na kal kal, ŋga ma wa ta zeleŋ, mawa kilometre gabal tsew ta temere tsew, ma zozom, ma zlepetem ta ma dzəgəlak aŋga na, a 'ərlam na andza ha atsa.

¹⁷ Ŋga ma wa zleɗ ana na, ma mbəsla har ɓe ɓe temere ta kokurow faɗ kava faɗ, madurlam a wa na, andza ma ndaw hay ma wam ana.

¹⁸ Zleɗ ana ma zla ha na ta ŋgwa ma zaspa, wuraw ana ma ka ha ta gura tsəzlakka, a nəkey tsəzlakka andza malam na dey tsar tsar ta huɗa na.

¹⁹ Ŋgwa ma sek begəney ma zleɗ ma wuraw ana na, ma mbatsa ha ta ŋgwa mambay ana hay gəle gəle. Ŋgwa ma sek begəney tsəfəmey ana na, zaspa, na ma tsetsew ana na, safir, na ma makar ana na, ma kalseduwaŋ, na ma faɗ ana na, ma emerod,

²⁰ na ma zlam ana na, ma sarduwaŋ, na ma mukwa na na, ma kornalin, na ma tsəla na na, ma krisolit, na ma tsakar ana na, ma beril, na ma tsəfaɗ ana na, ma topaz, na ma kurow ana na, ma krisopras, na ma kurow kava ka asləta na na, ma iyaseŋte, na ma kurow kava tsew ana na, ma ametiste.

²¹ Mambaw ana hay kurow kava tsew ana hay na tek ma ɗay hay kurow kava tsew tey. Mambaw asləta na ma ka ha ta tek ma ɗay asləta tey. Slam me tsəhey 'ar ma wuraw ana na ma gura tsəzlakka na, a nəkey andza malam na dey tsar tsar ta huɗa na.

²² Ama da wuraw ana tok na, i ka nəkada 'ay me key kuley da huɗa sakay, hərway 'ay me key kuley ŋga na na, Bay’ərlam ana Bay ma Bəla ma slafa tabiyaha na, ta bəzey təɓaŋ adzay ana.

²³ Wuraw ana na, a wuɗey pas, kwa kiya ka nəkar dey tikay, hərway me wezley dey ma Bay ma Bəla a wuɗatar dey, arka waw aŋga na ma la ha na na bəzey təɓaŋ.

²⁴ Ndaw ma dala hay tabiyaha a da halam ka dey waw aŋga. Bay ma dala hay tabiyaha a da dadama zleley ta hay a huɗa.

²⁵ Mambaw ŋga na hay a da ndzam re ma wura ahiya, ɗaɗa ndaw a da wuɗadata ha kakay, hərway da slam ana ŋga na na, dəvaɗ a key aha daha sa tikay.

²⁶ A da dadəmara mewezley dey ta mehesəkey bəzay ma ndaw ma dala hay a huɗa.

²⁷ Da huɗa na, tek ma zləɓa na, ndaw ma ney dəba a tek hay so na, ta ndaw me tsey maləwaɗay so na hay dakay. Ama sey ndaw ana ŋga na hay ma winda ahiya da ɗeriwel ma mendzey ma bəzey təɓaŋ ana dada.