Apokalis 19 - MEY HAYNA WAYNA MA YEZU KRISTE MA MEVEY

Walay ma ma gawla ley

¹ Arka i ma tsənada me yey mey ma ndaw ma kusa hiya vam vamma da 'ərlam, a ləvam aha: Aleluiya! Me buwey, me wezley dey, ma slafa na na ma vəlaya na ma Bay ma Bəla lakwa.

² Hərway sariya ŋga hay na dərka na, dzerey ahiya, ŋga ka kadara sariya ma bordel ana ŋga na ɗuhwa na ba, hərway ka zləgada dala ba, ta bordel aŋga na, ŋga ma madara gandaf aŋga, hərway ma mambaz ma gawla ma 'ay ŋga hay.

³ Arka satsa na, ma ləvam: Aleluiya! Arka geŋges aŋga na, a dərzey a 'ərlam ka mevey temere ka mevey temere.

⁴ Ndaw ana ma səka na hay kokurow tsew kava faɗ ana, ta gənaw ana hay faɗ ana hay ma gərdam. Ma namar dəba a Bay ma Bəla ma ndza ha ka koriwal ma bay ana, ta me ləvey aha: Amen! Aleluiya!

⁵ Arka vəɗe ma ɗay ma tsənawa da koriwal ma bay ana, me ləvey: Sambərama Bay ma Bəla a lakwa kuray a neney tabiyaha, gawla ma 'ay ŋga na hay. Kuray a neney ma wasadama na hay, bəza hay ta ndaw ɗuhwa na hay!

⁶ Arka i ma tsənada andza me yey mey ma ndaw ma kusa hiya vam vamma, andza me bebətsey ma bəlay, andza me me rəvey ma yam gədaŋ ana hay. A ləvam: Aleluiya! Hərway Bay’ərlam a lakwa na Bay ma Bəla ma slafa tabiyaha na, ka ɓadərawa Slala ŋga ba.

⁷ Ndzakwama da wuiya, gərvakwama! Hasəkadukwara bəzay, hərway ma mey na, magurlam ma me zəgey kokwa ma bəzey təɓaŋ, kokwa ŋga na ka həlada vaw tsoy.

⁸ Ma vəlamar tsəveɗ ka kəlawa ka vaw na, suwal tsəzlakk ana, a wezley dey ana, hərway suwal ana ŋga na na, meslərey dzerey ana ma ndaw kokwoɗ ana hay.

⁹ Madurlam asləta ma ləvaya: windey. Ndaw ma wunaya a magurlam me zəgey kokwa ma bəzey təɓaŋ ana hay na, taya da wuiya! Arka ŋga ma ləvaya: Neney na guma ma huɗa mey ma Bay ma Bəla ana ta 'ar aŋga na.

¹⁰ Arka i me gərdey ka slam sek aŋga, ma da nar dəba, ama ŋga me ləvaya: ɗaɗa ka da key andza ha zlay, yah na mandala ma meslərey, na ŋga ɗek ta malam ɗek hay na, ma wafama vaw ka seydewe ma Yezu ana. Ka da nar dəba na sey a Bay ma Bəla, hərway seydewe ma Yezu, na mesəfrey ma ndaw sek.

Ndaw Bay'ərlam ma vahara 'ar ana na, ma zəga 'ar ma sleɗ

¹¹ Arka i ma nəkada həzlay ma 'ərlam ma wura ha, pəles daha babara ha, ndaw ana ma tsəla ha ka 'arra na na, a zəlamar Ndaw me mbəɗey sler a guma ŋga tikay ana dərka na, a key sariya, a kəɗey vaw na, da dzerey.

¹² Dey ŋga na hay na andza 'erneh ma waw, ka 'ar aŋga na na, zlembetse hay haɗadzidzay, arka ma winda ha ka vaw ŋga na na, mezəley ana daha sey ma sərada na, ŋga na asləta.

¹³ Zana ŋga na me kəley ka vaw ana na, ma dzuhəɓa ha ba da mambaz, mezəley ŋga na na ‹Guma ma Bay ma Bəla›.

¹⁴ Sidzew ma 'ərlam hay tabiyaha a səpamar aha bəzay, ma tsəla hiya ka 'ar ma pəles babara ahiya, ta zana ma suwal babara ahiya tsəzlakka.

¹⁵ Sleɗ ma tsakay me zəmey aha ma bawa da huɗa mey ŋga, ma da bazladata ndaw ma dala hay. A da tsukurata ta tapay ma ɓərey, a da ndərsla bəzey ma viŋe da kulok zom aha, a betekwey aha a me tsey mevel ma Bay ma Bəla ma slafa tabiyaha na.

¹⁶ Ka zana ma memeɗ aŋga na, ka tuwal aŋga na na, mezəley ma winda ha kava: Bay ɗuhwa na ma bay ɗuhwa na hay, Bay’ərlam ma bay hay.

¹⁷ Arka i ma nəkada madurlam ma lətsa ha da pas. Ŋga ma wudatar ta magala ha a mamba na ma tsəvam soŋ soŋ da 'ərlam ana hay: Səmawa da tsəham 'ar ka hwohwaɓay ɗuhwa na ma Bay ma Bəla,

¹⁸ ma da ndey slaw ma bay ɗuhwa na hay, slaw ma bay ma sidzew hay, slaw ma sidzew gədaŋ ana hay, slaw ma pəles hay ta slaw ma ndaw ma tsəla hiya ka arra na hay, slaw ma ndaw hay tabiyaha, slaw ma ndaw ma wama 'ar ata na hay ta beke hay, ma ndaw ɗuhwa na hay ta na ma bəza hay.

¹⁹ Arka i ma nəkada gənaw ana, bay ma dala hay ta sidzew ata hay ma kusa 'ar ahiya, ma da key vərom ta ndaw ana hana na ta sidzew aŋga hay tey.

²⁰ Ma zəgama gənaw ana ba andza ndaw sek maləwaɗay ana. Ŋga, ta hila ŋga na hay me key ka slam dey ma gənaw ana na, ma pafata wuiya ka ndaw ma ndzafam zeheɗ ma gənaw ana, ma namar dəba a mey ərdey ŋga na hay. Tsetsuwe ta ahiya na, ma kuyadəmata ta dey a bəlay ma waw ma lahaɗa ha ka vaw ta burəhway ma dəlɓey ndaw na.

²¹ Sa na hay a da mətsam na ta sleɗ ma tsakay ma bawa da huɗa mey ma ndaw ma 'ar pəles ana. Arka na, mamba hay tabiyaha, ma rəham ta slaw ata na hay.