Apokalis 18 - MEY HAYNA WAYNA MA YEZU KRISTE MA MEVEY

Me təɗey ma Babiloŋ

¹ Arka i ma nəkada madurlam mekelehe a hərɗawa ha da 'ərlam, slam har aŋga na na ɗuhwa ha dzay, dala me wuɗey ta me wezley dey ŋga na.

² Ŋga me wudey ta veɗ ma ɗay ta magala ha: «Ŋga ka təɗey tsoy, ŋga ka təɗey tsoy, Babiloŋ ana ɗuhwa na, ka tərey tsoy 'ay ma fakalaw hay, 'ay ma mesəfrey ma zləɓa na hay, 'ay ma ɗiyeŋ ma zləɓa ana hay, ma kam zluwer ana hay.

³ Hərway ŋga ka sadata zom ba ta ndaw ma dala hay tabiya ha, zom me seweɗ ma bordel aŋga na, bay ɗuhwa na ma dala ka nam ba ta ŋga. Ndaw me key filaw ma dala hay ka kam zleley ba mavəday ma zleley ŋga na haɗa na.»

⁴ Arka i ma tsənada vəɗe ma ɗay mekelehe ma tsənawa da 'ərlam, a ləvey: «Səkway ɗaw, bawa ba da wuraw ana ŋga na na, me wesey na kuray ka da dzəmam ba ma ŋgəsam dzaya, arka na aza kuray ka da wanəkadama magədama na hay ma vəlaya ma ŋga na zlay.

⁵ Hərway meŋgəsey ŋga na hay ma tsəham na ma mbaha kasl a 'ərlam, arka na Bay ma Bəla ka da sərafa ba ka tek aŋga me key da dzerey kakay ana hay.

⁶ Madəmara tek aŋga na me key ana ka sele tey, tek aŋga na me key ana na, madəmara na dey tsew. Da vəliyem aŋga na, ŋga na me dzeheɓey zom da wuɗa na na, madəmara da huɗa, dey tsew dzay.

⁷ Kassla andza ma ŋga na ma ndzawa da maram ma zleley ana na, andza ha sa tey na, fənadəmara mevel na ka ndzey andza da 'ay vagay, hərway a ləvey da mevel aŋga na: i mandza ha da koriwal ma bay, bay aha, i madakway aha kakay, ɗaɗa vagay a da kafaya ha tikay.

⁸ Hərwuiya tok na, magədama ma tek ana hay ma vəla ha ma ŋga na hay na, a da safəmərawa da meney asləta tok, memətsey, ma tuway vagay, ta may, arka a da kakərama na da waw. Hərway gədaŋ aha na Bay'ərlam Bay ma bəla ma kərawa sariya na.

⁹ Arka na, bay ma dala hay, na taya ma kam bordel dzaya na, ma kam wuiya dzaya na hay na, a da tuwafama, a da kəlafama walay vagay, andza a da nəkadama geŋges ma me kekərey ŋga na na.

¹⁰ A da lətsam na dəreŋ hərway a wasam ta tatakway ŋga na, arka a da ləvam: Viya waray, Viya waray! Babiloŋ wuraw ɗuhwa na, wurow gədaŋ ana, da ndzemdey asləta tsana, sariya ɗek ana ma ka ha tsoy tsa!

¹¹ Ndaw filaw ma dala hay a da tuwafama, a kam vagay ŋga na, hərway kwa ndaw ma heɗəkey tek ma filaw ata na hay, dasakay:

¹² tek ma gura, ma dala, ma ŋgwa ma sumkwo haɗadzidzay ana, ma tek ma ɗay, suwal, veveze ta na mazza na, na me wezley dey ana ta mbəsak ana; tuwaw me zey hayna, tek ma ləmaya ta sler ma begəney, tuwaw na ma sumkwo haɗadzidzay ana hay, mendeleŋ ta mewuyer, ta ŋgwa mambay ana,

¹³ tek ma tsəray lar (andza kanel ta amone) wurdey, mal me zey hayna ta tek me durzey, zom ta mal, hapa hayna ta daw, sla ta təɓaŋ hay, pəles ta Saret ma vərom, beke hay ta ndaw ma hələmawa ka mey ma vərom ana hay.

¹⁴ Tek ma mevel eɗek me wuɗey ana na, ka daway təŋga dəreŋ ta kah. Tek na ma tsəray ana, ta na mambay ana hay na, ka zəɗafəmaka ba, ɗaɗa ndaw a da ndzafata ha sakay.

¹⁵ Ndaw me key filaw ana ŋga na hay, ma kam zleley ta filaw ana ŋga na hay na, a da lətsam na dəreŋ hərway a zluram ta tatakway ŋga na. Da ma tuway ta, da me ndzey ta andza da 'ay vagay ana na,

¹⁶ a da ləvam: Viya waray! Viya waray! Viya waray! Babiloŋ a neney ɗuhwa na ma kəla ta zana ma suwal aha na, ta veveze, ta na mazza na, a wezley dey ta gura ha, ta ŋgwa mambay ana hay, ta tek ma ɗay hayna hay,

¹⁷ da ndzemdey asləta tsana, zleley a neney hay tabiyaha ma davasa ha tsoy tsa! Tobiyaha ndaw me ɓəley kombiwal ɗuhwa na hay, ndaw na ka 'ar ma yam ta slam ana ŋga na hay, ndaw me key mber da bəlay ana hay, ta ndaw na ma pam har a mey ta mber ma bəlay ana hay ma lətsa hiya dəreŋ.

¹⁸ Andza taya ma nəkadama geŋges ma me təɓey ŋga na na, a wudam: Wuraw waray, me wey ta wuraw a neney ɗuhwa na na?

¹⁹ A ndzəkam burhway ka 'ar, a wudam ta yam dey aha andza da 'ay vagay, ta me ləvey aha: viya waray! Viya waray! wuraw a neney ɗuhwa na ma kadata zleley ta ndaw na kombiwal ata hay ka 'ar ma bəlay ana, da ndzemdey asləta tsa na tsoy ma davasa ha ha tsoy!

²⁰ Ka me zəɗey ŋga neney na, key wuiya tok həzlay ma'ərlam, arka kuray tiyatsa ndaw kokwaɗ ana hay, maslaŋ hay ta ndaw sek hay, hərway da ma kadara sariya ŋga na na, Bay ma Bəla a da vəladakwar dzerey na a kuray.

²¹ Arka madurlam gədaŋ aha me zəgey ŋgwa me ləhey aha, ŋga zur kəlada a bəlay ta me ləvey aha kava: Andza ma kəladama ŋgwa neney zur ana na, a da kəladama Babiloŋ wuraw ɗuhwa na na andza ha, kwa a da ndzafama ha sakay.

²² Arka na walay ma ndaw me fey gandzaval hay, ta ndaw ma wasa hay, ndaw me fey fagwam hay ta ndaw me fey talom hay na, a da tsənadamaha da 'ay ɗek dasakay. Kwa ndaw ndaraw ana me ləmey tek ana hay na, kwa asləta a da ndzafam aha da 'ay ɗek dasakay, walay me kərey a da tsəney aha da 'ay ɗek dasakay.

²³ Waw ma lalam a da wuɗey aha da 'ay ɗek dasakay, ɗay ma gawla ta kokwa ŋga, ndaw a da tsənada ha da 'ay ɗek dasakay. Hərway ndaw filaw eɗek ana hay kete na, ndaw ɗuhwa na ma bəla hay, hərway madaŋ eɗek ana me key na, ka pafata wuiya ba ka ndaw ma dala hay tabiyaha.

²⁴ Arka da 'ay ɗek na, ka ndzafam mambaz ma ndaw sek hay, ma ndaw Kokwaɗ ana hay, ta mambaz ma ndaw ma sləmata ka dala na hay ba tabiyaha da 'ay ɗek.