Apokalis 17 - MEY HAYNA WAYNA MA YEZU KRISTE MA MEVEY

Sariya ma bordel ɗuhwa na

¹ Arka ndaw asləta da walaŋ ma madurlam ana hay tsəla na, ta vəliyem ahiya da har tsəla na hay, ma gurafiyawa, ma tsaya guma andza neney: «Sawa i da ɓadaka sariya ma bordel a neney ɗuhwa na, ma ndza ha ka mey ma bəlay ana.

² Bay ma dala hay tabiyaha ka nam ba ta ŋga, arka ndaw ma dala hay tabiyaha, ka wam ba ta zom ma bordel aŋga na.»

³ Arka ŋga ma zəga mezek a ɗaw, ma dada a palah, arka i ma nəkada ŋgwas ana daha ma ndza ha ka 'ar ma gənaw gagaza ha, mezəley ma me tseɗey Bay'ərlam ma winda ha ka vaw ŋga na tabiyaha, 'ar ma gənaw ana hay tsəla, ta dərom ahiya kurow.

⁴ Ŋgwas ana tok na, zana ŋga na mambay aha gagaza ha, vaw ŋga na tabiyaha a wezley dey ta tek ma gura, ta ŋgwa ma sumkwo haɗadzidzay ana, ta tek ma ɗay mambay ana. Ŋga ma zəga vəliyem ma gura ha da har, ma rəha ha ta tek haya kakay ana hay kambəlaɓa ma me zləɓey ta bordel aŋga na.

⁵ Mezəley ma tek ana ma winda ha ka 'ərdey ŋga na, ndaw a slafa ma sərada kakay: Babiloŋ ɗuhwa ha, maya ma bordel hay, ta tek hayakakay ana hay kambəlaɓa ka dala na hay.

⁶ Arka i ma nəkada ŋgwas ana ma wa ha ta mambaz ma ndaw Kokwaɗ ana hay, ta na ma ndaw seydewe ma Yezu hay. Andza i ma nəkada na, a rəzlaya kambəlaɓa.

⁷ Arka madurlam ana ma ləvaya: «Ma rəzlaka kambəlaɓa na mey? I da ɓadaka guma na ma kəzla ha ka ŋgwas a neney, ta gənaw a neney ta 'ar tsəla na, ta dərom ahiya kurow ana ma zəga ŋgwas ana.

⁸ Gənaw ana kah ma nəkada na ha na na, ka key ba daha dərka na, ama ekəɗey na ŋga dasakay. A da bawa da babaŋ tsəvay, a da daway a me zəɗey. Arka ndaw ma dala hay, na mezəley ta ma winda ahiya da ɗeriwel ma mendzey kakay, zla da mezley ma bəla ana hay na, a da rəzlata andza a da nəkadama gənaw ana na, hərway ŋga ka key ba daha, ŋga dasakay, amana, a da mawa.

⁹ Neney na har ma me sərey tek na ma səra ’ar ma ɓey waw kava na: 'ar ana hay tsəla na na, mamba na hay tsəla na, na ŋgwas ana ma ndza ha da huɗa na. A ɓey satsa na, bay ɗuhwa na hay tsəla.

¹⁰ Zlam da walaŋ ata na ka təɗam ba, na ma mukwa na na, a key aha bay, na ma tsəla na na, ka sawa tsaray kakay. Ama andza ŋga ka da sawa ba na, a da ndzey na nekəɗey dada tsa.

¹¹ Gənaw ana zlekete ŋga daha, ekəɗey ŋga dasakay ana na, ŋga na bay ma tsakar ana, ŋga ma mbəsla ha da dey ma neney tsəla na hay, a daway na a me zəɗey.

¹² Dərom ana hay kurow kah ma nəkadatərawa na na, bay hay kurow ka pəmata a bay tsaray kakay, ama ma ndzemdey pal na, a da kam bay andza gənaw ana ka masləta ha.

¹³ Tek ata me dzeley na ŋga asləta, ma slafa ta ta bay ta ma kam na, a kadəmara mber a gənaw ana.

¹⁴ A da kam vərom ta bəzey təɓaŋ, amana bəzey təɓaŋ a da zəgafata 'ar ma sleɗ ba, hərway ŋga na, Bay’ərlam ma bay hay, Bay ɗuhwa na ma bay ɗuhwa na hay. Arka andza ŋga na, ndaw ma zəla na hay, ndaw ma gaɗəma na hay, ta ndaw ma tsənamar sləmay ana hay a da zəgama 'ar ma sleɗ tiyatsa.»

¹⁵ Arka ŋga ma ləvaya: «Yam ana kah ma nəkadərawa na, ka slam ma bordel ana ma ndza ha da huɗa na na, na ŋga na hay na səkway hay, ndaw ma kusa hiya, ndaw ma dala hay ta mey hay gəle gəle.

¹⁶ Dərom ana hay kurow ta gənaw ana kah ma nəkadərawa na na, a da ŋgəladama ha dey ta bordel ana sakay, a da mbəkadama makəraŋga, vaw kəne ha. A da pəɗama slaw ma vaw ŋga ba, a da kakərama ta waw.

¹⁷ Hərway Bay ma Bəla ka padatərawa ba a mevel tek aŋga me dzeley ana, tek ana na ŋga asləta: ma vəlada slam har ata ka kamar meslərey a gənaw ana, ha kasl ka me ndesley ma guma ma Bay ma Bəla me ləvey ana hay.

¹⁸ Ŋgwas ana ka ma nəkada na na, wuraw ana ɗuhwa na, na ma wata bay ma dala hay tabiyaha na.»