Apokalis 15 - MEY HAYNA WAYNA MA YEZU KRISTE MA MEVEY

Madurlam hay tsəla ta magədama hay tsəla

¹ Arka i ma nəkada zeheɗ mekelehe da 'ərlam ɗuhwa ha, a rəzley ndaw: madurlam hay tsəla ta magədama hiya da har tsəla, na ma dakwaydakw ana hay, hərway me tsey mevel ma Bay ma Bəla a da ndesley da taya.

² Arka i ma nəkada malam ma tek ana andza ma dzahaɓa ha ka vaw ta waw aha. Ndaw ana hay ma zəgafama 'ar ma sleɗ ba ka gənaw ana, ka mey 'ərdey ŋga na, ta lamba ma mezəley ŋga na hay na, ma lətsa hiya ka bəlay ma malam ana, ta gandzaval ma Bay ma Bəla ahiya da har.

³ A kəlam walay ma Moyiz, gawla ma 'ay ma Bay ma Bəla, ta walay ma Bəzey təɓaŋ: «Mber a ɗek hay na ɗuhw hiya, a rəzlam ndaw, Bay’ərlam Bay ma bəla ma slafa tabiyaha na. Dzerey ahiya, dərka ahiya na tsəveɗ a ɗek hay, Bay ɗuhwa na ma ndaw ma dala hay.

⁴ Bay’ərlam, ma da wasadaka, ma da səmbəra mezəley ɗek kakay na way? Hərway kokwoɗ aha na kah asləta, ndaw ma dala hay tabiyaha a da səmawa, a da gərdam ka slam dey ɗek, hərway ma sariya ɗek ka ɓey vaw ba.»

⁵ A dəba na na i ma nəkada: 'ay me key kuley ta slam me pey tek ma kuley, ma ɓada seydewe ha da huɗa na, me wurey da 'ərlam.

⁶ Arka na madurlam ana hay tsəla, ma zəga hiya magədama hay tsəla da har ana, ma bəmawa da 'ay me key kuley, ma kəla keləmedzey ma suwal ahiya ka vaw tsəzlakka, ma dzuwa ha da bəzay hwoɗ ta kanda ma gura.

⁷ Gənaw asləta da walaŋ ma gənaw a hay faɗ ana, ma vəlatar vəliyem hay tsəla a madurlam ana hay tsəla na, ma rəha hiya ta me tsey mevel ma Bay ma Bəla na, ma ndza ha bay aha ka mevey temere ka mevey temere na.

⁸ Arka 'ay me key kuley ana, me rəhey ta geŋges hərway ma maram ma Bay ma Bəla, ta ma slafa aŋga na. Arka na kwa ndaw a slafa me fuləkwey a 'ay me key kuley ana kakay, ha kasl ka har ma magədama na hay tsəla, da har ma madurlam ana hay tsəla na, ka ndaslam ba ɗagay.