Apokalis 14 - MEY HAYNA WAYNA MA YEZU KRISTE MA MEVEY

Bəzey təɓaŋ ta ndaw ma mbəkadəmatərawa na hay

¹ Arka i ma nəkada: Bəzey təɓaŋ ma lətsa ha ka 'ar ma mamba ma Siyoŋ, arka ka tsakay ŋga na na, ndaw gabal temere ta kokurow faɗ kava faɗ ana hay, na ta mezəley ŋga, ta mezəley ma Baba ŋga ma winda ahiya ka 'ərdey ta na hay.

² Arka i ma tsənada vəɗe ma ɗay a tsənawa da 'ərlam, andza me tsəney ma bəlay ɗuhwa na, andza ma bebətsey ma yam me rəvey ana ŋga na na gədaŋ aha na, vəɗe ma ɗay ana i ma tsənada na na, andza walay ma ndaw ma fam gandzaval hay, ma fam ana.

³ A kəlam aha walay waya ha ka mey 'ərdey ma koriwal ma bay ana, ka mey 'ərdey ma gənaw ana hay faɗ ana, ta ndaw ma səka na hay. Kwa ndaw a slafa ma tatəka walay ana kakay, dakay na sey ndaw ana hay gabal temere ta kokurow faɗ kava faɗ ana hay, na ma mbəɗəmatərawa ka dala na hay.

⁴ Ka zləɓam vaw andza ŋgwas hay tikay, hərway taya na ka zlaram ta ŋgwas hay tikay, a səpamar bəzay a bəzey təɓaŋ, kendzey a daway ka waray ka waray na. A mbəɗəmatərawa da walaŋ ma ndaw hay, andza kəla ma haləfaw me nəhey tsəfəmey ana, a Bay ma Bəla ta bəzey təɓaŋ.

⁵ Arka da huɗa mey ta na, ndaw a ndzefey maləwaɗay tikay, ndaw a slafa ma ŋgəlatar bəzay kakay.

Madurlam hay makar maslaŋ ahiya na

⁶ Arka i ma nəkada madurlam mekelehe a tsəvey aha soŋ soŋ da 'ərlam. Ta Mey Wayna ma koza ha, ma da tələkadatara mey a ndaw ma ndza hiya ka dala na hay, a ndaw ma dala hay tabiyaha, a me Səmbərey hay, a mey hay gəle gəle, a səkway hay.

⁷ A ləvey ta magala ha: «Wasadama ta Bay ma Bəla, hasəkadəmara bəzay, hərway har ma da key sariya ŋga ka slawa tsoy. Namar dəba a ndaw ma kərawa həzlay ma 'ərlam ta dala na, bəlay ta 'ar yam hay tabiyaha na.»

⁸ Arka madurlam mekelehe me tsetsew ana a səpa ha, a ləvey: «Ŋga ka təɗey tsoy, ŋga ka təɗey tsoy, Babiloŋ wuraw ana ɗuhwa na, ŋga ma sadata zom ta ndaw ma dala hay tabiya ha, zom me seweɗ, ma bordel aŋga na»

⁹ Arka mekelehe sa, madurlam ma makar ana, ma səpata me ləvey ta magala ha: «Haɗaw ndaw ana ka nar dəba a gənaw ana, a mey 'ərdey ŋga na, haɗaw ka ndzefey zeheɗ aŋga ka 'ərdey dakay ka har na, ŋga na tiyatsa na,

¹⁰ a da sey zom ma me tsey mevel ma Bay ma Bəla tiyatsa, ma mbəɗa ha da vəley ma me tsey mevel aŋga mandzara ka dzeheɓey, a da sərada banay na da waw ta burəhway a dəlɓey ndaw ana, ka slam dey ma madurlam kokwaɗ ana hay, ka slam dey ma bəzey təɓaŋ.

¹¹ Ndaw ana hay ma namar dəba a gənaw ana ta mey 'ərdey ŋga na, andza kwa way way ma ndzefey zeheɗ ma mezəley ŋga na, ma sesəkey vaw ta na daha tikay, ka key na rəpas dəvaɗ ana. Geŋges ma banay ta na a dərzey aha na, ka mevey temere ka mevey temere.

¹² Neney na har ma matandroŋ ma ndaw kokwaɗ ana hay, na ma wafama vaw ka mey ma mewey ma Bay ma Bəla, ta me pey 'ar ka Yezu.

¹³ I ma tsənada vəɗe ma ɗay me tsəney da 'ərlam, me ləvey: «Windey: ndaw ma mətsam zla ekəɗey da mezəley Bay’ərlam ana hay na, taya da wuiya! Mesəfrey ana me ləvey: Ayaw, ka sasəkam vaw da meslərey ta ger ana hay, hərway tek ata ma kəmaɓa na hay a səpa ta ha.»

Me tsuwey daw ta me sley bəzey ma viŋe

¹⁴ Arka i ma nəkada: tek ana andza pazlay babara ha, ka 'ar ma pazlay ana hana na ndaw ma ndza ha andza bəzey ma ndaw, ma vaha 'ar aha ta gura, membey me zəmey aha da har.

¹⁵ Arka madurlam mekelehe ma bawa da 'ay me key kuley, arka ma wudar ta magala ha a ndaw ana hana na, ka 'ar ma pazlay ana: «Kəlada membey ɗek ana na, tsuwey daw, hərway tek ma zlagwam ma dala hay ma nəha hiya tsoy.»

¹⁶ Arka ndaw a hana na ma ndza ha ka 'ar ma pazlay ana, ma kəlada membey ŋga ka dala, arka na tek ma zlagwam ma dala tabiyaha ma ɓətsa hiya tsoy.

¹⁷ Arka madurlam mekelehe ma bawa da 'ay me key kuley da 'ərlam, ŋga tiyatsa na, ta membey me zəmey aha da har.

¹⁸ Arka madurlam mekelehe ma bawa da ŋgwa ma kuley, ŋga na a war 'ar a waw, ma wudar ta magala ha a ndaw a hana na ta membey aha me zəmey aha da har ana: «Kəlada membey ɗek ana me zəmey ana na, slata bəzey ma viŋe ma dala na hay, hərway ma nəha hiya tsoy.»

¹⁹ Arka madurlam a hana, ma kəlada membey ŋga ka dala, ma slata bəzey ma viŋe hay ka dala. Ma kuiyada bəzey ma viŋe ana hay a gəzla ma tek ana ɗuhwa ha ma me tsey mevel ma Bay ma Bəla.

²⁰ Ma ndərslama bəzey viŋe ana, da gəzla ma tek ana pərazl wuraw, arka da gəzla ma tek ana na, ma bawa na mambaz a key kasl ka tsalalaw ma mey ma pəles, me vey a key kilometre temere makar.