Apokalis 12 - MEY HAYNA WAYNA MA YEZU KRISTE MA MEVEY

Ŋgwas ta zezekw

¹ Zeheɗ me nəkey ɗuhwa ha da 'ərlam, ŋgwas ma kəla pas aha ka vaw, sek ma paha ka kiya, 'ar aŋga ma vaha ha da wurzla hay kurow kava tsew.

² Ŋga ta bəzey aha da hwoɗ, a wudey aha da zləbeŋ ta viya ma me yey bəzey ana.

³ Arka zeheɗ mekelehe me nəkey da 'ərlam sa: ŋga tey na zezekw ma tek ana ɗuhwa ha, a nəkey gagazaha andza waw. 'Ar aŋga na hay tsəla ta dərom ahiya kurow, arka ka 'ar ana hay tsəla na na, zlembetse hay tsəla.

⁴ Welek aŋga na a kwarsatərawa diya ma makar ana ma wurzla ma 'ərlam hay, ma kuyadatərawa ka dala. Zezekw ana me lətsey ka mey dey ma ŋgwas ana hana na, ma da yey bəzey ana, ma aza ka da yərawa wawa na ba tsana, ka pəɗa ba.

⁵ Ŋga ma yawa bəzey, wawa mawal aha, ma da tsəkurata ndaw ma dala hay tabiyaha, ta tapay ma ɓərey na ŋga. Ma tsakafama wawa ŋga na ba ka slam ma Bay ma Bəla ta koriwal ma bay ŋga.

⁶ Arka ŋgwas ana ma hway təŋga a palah, da huɗa na Bay ma Bəla ka ləmadara slam aŋga ba ka vaw, ma ka vəlamar tek me zəmey da huɗa, ma meney gabal ta temere tsew ta kokurow mukwa.

⁷ Arka na me kəɗey vaw ka key da 'ərlam: Mikayiel ta madurlam aŋga hay ma kəɗam vaw ta zezekw a hana na, zezekw ana hana tiyatsa ma kam ka vaw ta, ta madurlam aŋga hay,

⁸ amana ŋga ka zəga 'ar ma sleɗ kakay, slam ata me ndzey da 'ərlam dasakay.

⁹ Ma pəmərawa teker a zezekw ana ɗuhwa ha na ka dala, ŋga na govaŋ a zlezle na, na ma zəlamar fakalaw, dakay na Sataŋ ana. Ndaw me pey wuiya ka bəla gədem ana. Ma kəladəmərawa ka dala ta madurlam aŋga hay dzay.

¹⁰ Arka i ma tsənada vəɗe ma ɗay me wudey ta magala ha da 'ərlam, me ləvey: «Nəkafama har ma me buwey ka slawa ba, ma slafa ta me key bay ma Bay ma Bəla lakwa, ta me wey bəla ma Kriste aŋga. Hərway ndaw ana ma ŋgəlafata ka malam a lakwa na hay na, ka pamar teker tsoy. Ndaw ma ŋgəlafata dəvaɗ ta rəpas adzay ka tsakay ma Bay ma Bəla alakwa na.

¹¹ Ama taya na ka zəgafama 'ar ma sleɗ ba, ta mambaz ma bəzey təɓaŋ, ta guma na taya ma kadama seydewe na. Taya ka wuɗam mendzey ta kakay, ha ka wasam ta memətsey kakay.

¹² Hərway ma mey, ndasl ma 'ərlam ndzey da wuiya, ta kuray a neney slam a kwar me ndzey da huɗa daha na na! Kah dala ta bəlay na tuwam vaw kwar, hərway Setene ka hərɗaɓa tsoy 'ar a 'ay kwar, mevel a tsar aha, hərway a sərada mendzey ana na, a zərawa na nekəɗey.»

¹³ Andza zezekw ana ma nəkada ka kəladəmərawa tsoy ka dala na, ŋga na ɓa a bəzay ma ŋgwas ana hana, ma yawa bəzey mawal aha na.

¹⁴ Amana ma vəlamar babazla ma matsav ɗuhwa na hay tsew a ŋgwas ana, ma ka tsəvada a palah ka slam ana ma ləmadəmara, ma da vəlamar tek mezəmey da huɗa na, dəreŋ ta govaŋ ana, ha a key mevey makar ta rita.

¹⁵ Arka govaŋ ana ma venəhey andza wayaŋ ɗuhwa ha ma yam ana ka vada ŋgwas ana ba.

¹⁶ Ama dala ma sawa ma da buwa ŋgwas ana; dala me wurey, ma sa yam ana hana govaŋ ma vənəhawa na ba.

¹⁷ Da mevel aŋga ma tsar ka ŋgwas ana hana na, govaŋ ana hana ma mbəɗada vərom ana ka sa ma bəzey ma hwoɗ ma ŋgwas ana hay, ndaw ma tsənamatar sləmay a mey ma mewey ma Bay ma Bəla ana hay, ta na ma mbəɗamar sler a seydewe ma Yezu kakay ana hay.

¹⁸ Arka na ŋga me ndzey təŋga ka wuyeŋ ma mey ma bəlay.