Apokalis 11 - MEY HAYNA WAYNA MA YEZU KRISTE MA MEVEY

Seydewe hay tsew

¹ Arka tok na, ma vələmaya zeleŋ, kal kal andza tapay ma ndaw me zley 'ay hay, arka ma ləvəmaya: «Lətsey, wa 'ay me key kuley ma Bay ma Bəla ta ŋgwa ma kuley, ta ndaw na ma nam dəba da huɗa na hay dzay.

² Ama ka mey mambaw ma 'ay me key kuley ana na, mbəkada, ka da wa tizlay, hərway ka mbəkadəmatara ba a ndaw ma dala Zuif ahiya kakay ana hay, ma da dadəslama Wuraw kokwaɗ ana da kiya kokurow faɗ kava tsew.

³ Arka i da vəlatar slam har a ndaw seydewe ɗaw hay tsew, ka tsam guma andza ma ndaw sek hay, ta zana ma burhwa ahiya ka vaw, meney gabal ta temere tsew ta kokurow mukwa.

⁴ Taya na vəɗe tetəɗez a hay tsew ana, ta tek me key waw tsew ta hawal ahiya kava, ma lətsam ka slam dey ma Bay’ərlam ma dala na.

⁵ Kendzey ndaw a wuɗey ma katar tek hayakakay aha na, waw a bawa da huɗa mey ta, a fukwata ndaw duŋgwan ata na hay ba. Ayaw, kendzey ndaw a wuɗey ma katar tek hayakakay aha na, a da mətsey na andza ha tok.

⁶ A slafama ma wuɗa ndasl ma 'ərlam, kwa yam a slafa ma pawa da har ata na a tsam aha guma andza ndaw sek ana kakay. A slafama ma təradata yam hay mambaz aha. A slafama ma kamar tek hayakakay aha a dala ta magədama hay gəle gəle haɗadzidzay, andza ma ta ma wuɗam ana.

⁷ Ama tsoy andza ka ndakadama ba me key seydewe na, gənaw ana a da tsəlawa da babaŋ tsəvay ana, ma da key vərom ta taya, a da zəga 'ar ma sleɗ, a da bazlata.

⁸ Vagay ta na hay a da ndzam ma kuiya hiya, ka slam ma tsəhey 'ar da wuraw ɗuhwa na, na ndaw sek hay ma zəlama Sodom ta Ezipte, wuraw ana ŋga na, ma daradama Bay’ərlam ata da huɗa na.

⁹ Səkway hay, mesəmbərey hay, mey hay gəle gəle, ndaw ma dala hay gəle gəle, a da səmawa ma da nəkafata ka vagay ta na hay da meney makar ta rita, mandzara ndaw ka zləlata.

¹⁰ Ndaw ma dala hay tabiyaha a da kam wuiya hərway ta, a da ndzam na da wuiya, a da vəlam tek hay a vaw ma hayaha, hərway ndaw sek a neney tsew ana na, ka sləmatar zay bəzakakay.

¹¹ Ama a dəba ma meney a neney hay makar ta rita ana na, mesəfrey ma mendzey ma sawa da Bay ma Bəla, me fuləkwey a vaw ta, taya ma lətsam. Arka na zluwer ɗuhwaha ma katar a ndaw ma nəkafəmata na hay.

¹² Taya ma tsənadama vəɗe ma ɗay, ta magala ha ma tsənawa da 'ərlam, a ləvatar: «Tsələmawa ka sləna.» Arka na taya ma tsəlam a 'ərlam da pazlay, ma dey ma ndaw dugwan ata hay.

¹³ Da har ana hana tsana, dala me ɓəley ma gədaŋ. Tsakay ma kurow ana ma Wurow ana me mbəzley; ndaw hay gabal tsəla ma bazlam da magədama na. Sa ma ndaw ma zəmawa na hay na, zluwer ma katar na, ma hasəkadəmara bəzay a Bay ma Bəla ma ’ərlam.

¹⁴ Viya na ma tsetsew ana ka daw tsoy, nəkafa viya ma makar ana a sawa ha da bəse sa.

Tolom ma tsəla na

¹⁵ Madurlam ma tsəla na ma fa tolom aŋga, vəɗe ma ɗay ɗuhwa hiya ma tsənəmawa da 'ərlam, a ləvam: «Slala ma bəla ekəɗey ma vəla ha na ma Bay’ərlam a lakwa ta Kriste ŋga, a da key bay na ka mevey temere ka mevey temere.

¹⁶ Ndaw ana ma səka na hay kokurow tsew kava faɗ ana hay, ka slam dey ma Bay ma Bəla ana hay, ma ndzaya ka koriwal ma bay ta hay, ma bərtam ərdey ta ka dala, ma namar a Bay ma Bəla.

¹⁷ ta me ləvey aha kava: «La madəmaka sise Bay’ərlam Bay ma Bəla ma slafa tabiyaha na, kah daha zla ekəɗey kakay na, hərway kah ka ɓada ɗuhwa ma ma slafa ɗek, kah ka ləmada Slala ɗek ba.

¹⁸ ndaw ma dala hay mevel a tsatar, ama ma sawa na, mevel a ɗek ana ma tsaka na. Na ŋga na na, har ma da key sariya ma ndaw ma mətsa na hay, ta har ma da təɓey masa ma gawla ma 'ay ɗek hay ndaw sek hay, ndaw kokwoɗ ana hay, ta ndaw ma wasadama ta mezəley ɗek ana hay, bəza hay ta ndaw ɗuhwa na hay, har me bezley ndaw ma mbəzladama dala na hay.»

¹⁹ Arka na, 'ay me key kuley ma Bay ma Bəla da 'ərlam me wurey, arka na akwotey ma zeheɗ ma me dzəmey vaw ma ɓawa da 'ay me key kuley ŋga. Arka me weteɗey ma yam, vəɗe ma ɗay hay ma tsənam, me rəvey ma yam, dala me ɓəley, ndzala ma kwiyawa lamba ha.