2 Timotey 4 - MEY HAYNA WAYNA MA YEZU KRISTE MA MEVEY

Tələkada mey ta Guma ma Bay'ərlam

¹ I kaka amboh ka slam dey ma Bay ma Bəla ta Kriste Yezu, na ma da sawa ma da key sariya ma ndaw ta dey ana hay, ta ndaw ma mətsa na hay, ta mezəley ma ma ɓada vaw ŋga, ta ma da key Bay ŋga.

² tələkada mey ta guma na, hərafa waw da har hayna, da har ger ana, katar say, ŋgərzafata, həladatara bəzay ka pas ka pas, da me zəgey mevel, da me dzeley 'ar ka me tetəkey.

³ Akwa har ana ka da slawa ba na, sa ma ndaw hay a da wuɗam aha me tetəkey a neney hayna sakay, ama a da səpam na tek ma mevel ata ma wuɗam ana, da me bərey ta na na, a da haləmawa miter hay haɗadzidzay, ma da pafəmata sləmay ka guma ta, ma tsəmatar mekele hiya na.

⁴ A da mbəɗamar dəba a dərka, a da mbəɗam dey na ka 'ərmbez hay.

⁵ Ama kah na, hayna war 'ar a vaw ɗek da tek hay tabiyaha, ɓəsa banay, key mber ma Mey Hayna Wayna, ndakada meslərey ɗek.

Har ma ma daw ɗaw ka husawa tsoy

⁶ Nəkafa ekəɗey na ŋga ɗaw na, i ma vəla ha tsoy andza tek ma key kuley aha, har a ma daway ɗaw ka slawa tsoy.

⁷ I ka kəɗawa vaw ba mambay aha, i ka ndaslada ma hway ɗaw tsoy, i ka wafa vaw ba ka me pey 'ar ɗaw.

⁸ Zla ekəɗey na, tek ma sise ma dzerey ɗaw a hutaya ha, na Bay’ərlam ma da vəlaya andza masa ha na. Ta pas ana ŋga na na, ŋga ndaw ma sariya dzerey ana; a da vəlaya na a yah asləta tsa kakay, amana, a ndaw hay tabiyaha, ma wuɗəmawa me hutey pas ana ŋga na, da ma ɓey vaw ana.

Guma me tsey a 'ar madakwaydok ana

⁹ Hayna kawa gədaŋ ma husawa ka tsakay ɗaw da bəse.

¹⁰ Hərway Demas ka mbəkadaya ba hərway a wuɗey na bəla neney, ŋga ka ndzey a Tesalonik, Kreseŋ a Galasi, Tit tey a Dalmasi.

¹¹ Ka tsakay ɗaw na Luk asləta dada, ŋgələrawa Mark, səmawa tsetsuwe, hərway a nafaya kambəlaɓa da meslərey a neney.

¹² I ka slərada Tisik ba a Efez.

¹³ Zana ma memeɗ aŋga na i ma mbəkadərawa da Trowas da 'ay Karpos ana na, gadiyawa da har ka sawa ha na, ɗeriwel hay, ɗoh na, na ma windaya ka mbal ana hay.

¹⁴ Alekzaŋdre ndaw ma vəɗey aŋga na, ka kaya seweɗ ba kambəlaɓa, Bay’ərlam ana a da madara andza ma mber aŋga na.

¹⁵ Kah tiyatsa na, wey daw ka vaw hərway ŋga. Hərway ma guma la ma tsam na, a hərɗey ka sləna ka taɗay, a wuɗey kakay tabiyaha ha.

¹⁶ Dey tsəfəmey ana, andza i ma zlar ma dzəŋgərey ka vaw ɗaw, ka slam ma sariya na, kwa ndaw ka tsakay ɗaw dakay, tabiyaha ka mbəkadəmaya ba, ka da tərafata meŋgəsey aha zlay.

¹⁷ Bay’ərlam, ŋga na, ŋga daha ka tsakay ɗaw, ma vəlaya gədaŋ, ma ta huɗa mey ɗaw na, guma na ka pey mey tabiyaha, ma ndaw Zuif ahiya kakay ana hay ka tsənadama. Arka na, ka ləhadəmiyawa ba da mey ma mabor.

¹⁸ Bay’ərlam a da ləhadiyawa da tek ma kəmaya hayakakay ana hay tabiyaha, a da buwaya a Slala ŋga da 'ərlam ana. Ŋga ndaw ma wezley dey da mevey temere da mevey temere ana. Amen!

Me tsey guma a vaw

¹⁹ Tsadəmatara guma andza Akilas ta Priska, ka zəgawa veɗ 'ay ma Onezifore.

²⁰ Eraste na ka ndzawa təŋga da Koreŋt. I ka mbəkadərawa Trofim ba, vaw a tsafa da Milet.

²¹ Kawa gədaŋ, sawa, maga memeɗ kusey a da key na. Eobul, Pudens, Leŋ, Klodis ta sa ma malam a sa na hay tabiyaha ka tsadəməkuraɓa guma.

²² Bay’ərlam ka ndzey ta mesəfrey ɗek. Hahaya ka ndzey ta kuray tabiyaha.