2 Timotey 3 - MEY HAYNA WAYNA MA YEZU KRISTE MA MEVEY

Tek ma da key ger ana hay ta pas madakwaydok ana

¹ Hayna sərada tek a neney haya haya: ta pas madakwaydok ana na, tek ger ana hay a da kam.

² Akwa ndaw hay a da təram ndaw mavahay ahiya, dzam ma sumkwo ahiya. A da ŋgalakam, a ɓam ta vaw. A da tsaɗama Bay’ərlam. A da tsənam sləmay a baba ta, ta may ta hay kakay, a da sam a ha ’ar ta tek kakay. A da rəsata tek ma kuley hay.

³ Taya a da təram həma ahiya, ndaw a katar da vaw kakay, a da ŋgəlam bəzay a ndaw hay. A da kam tek hay so ha, səkom ahiya, ndaw dugwan ma tek hayna hay.

⁴ A da haɗəkadəmata ndaw hay, mevel ahiya haɗa. Me rəsey vaw ta na a da təradata wulaf ahiya. A hiyam na tek ata madatar ’ar ana hay ta me wuɗey Bay ma Bəla na.

⁵ Ta bəla na ma təra hiya andza ndaw me pey 'ar ahiya, amana a mbəɗamar mey a ma slafa ma me pey 'ar ana. Kah na mbəɗatar dəba a ndaw ana ŋga na hay satsa!

⁶ Hərway da walaŋ ata na, ndaw ma fuləkwam a 'ay hay, ma həlam ŋgwas na ndaw ma tsəhata dakay ana hay, ma rəha vaw ahiya ta meŋgəsey, ma tatəkaya ta tek me sey gəle gəle.

⁷ Ŋgwas ana ŋga na hay na, taya zarra ka ma tetəkey, amana, mandzara ka slafama me husey ma sərada dərka na kakay.

⁸ Kal kal andza mandza Zanes ta Zambres, ma wuɗam guma ma Moyiz kakay ana, ndaw a neney hay a wuɗam dərka kakay na andza ha atsa, ndaw ana ŋga na hay na, ma kaya andza 'ar a mbəɗatar, me pey 'ar ata na tedehe.

⁹ Amana, a da dawam aha dəreŋ dakay, hərway ma mbəɗa 'ar ata na, a da nəkey ma dey ma ndaw hay tabiyaha, a da key na, andza ma ndaw a neney hay tsew ana.

Kah na, ndzey gədaŋ gədaŋ

¹⁰ Ama kah na, kah ka səpiyawa bəzay ba tərre da ma tetəkey ɗaw, da mendzey ɗaw, da tek a ɗaw me dzeley ma da key ana hay, da me pey 'ar, da me zəgey mevel, da ma wuɗa vaw, da matandəroŋ,

¹¹ da tatakway, tsetseh na i me sey da Antiyos, da Ikoniyum, da Listres. I sawa da huɗa kakay na, tatakway waray! Ama da huɗa tabiyaha na, Bay’ərlam ka buwiyawa ba!

¹² Akwa na, ndaw ma wuɗam me ndzey da me tsəney sləmay da Kriste Yezu ana hay na a da kadəmata tatakway.

¹³ Andza ma ndaw haya kakay ana hay, ta ndaw ma mbukwam ndaw ana hay na, a da tsəlam ka mey ka mey da tek ata haya kakay ana hay, a zləgam ndaw hay, a zləgam bay 'ar ma vaw ta na.

¹⁴ Ama kah na, ndzey gədaŋ gədaŋ da tek ana, kah ma tatəkawa, ma təɓa andza tek me tsey dey kava na: ka sərada ha ka tatəkərawa na ka way seŋgey.

¹⁵ Zla kah bəza ha mba na, ka səradata Mewindey Kokwoɗ ana hay, a slafama ma vələmaka me sərey 'ar, na me kəsey ndaw a mebuwey da me pey 'ar na da Kriste Yezu ana.

¹⁶ Mewindey Kokwoɗ ana hay tabiyaha na, Mesəfrey ma Bay ma Bəla da huɗa, a nefey ma tatəkadata ndaw hay, ma tsahəɗada malay ba, ma lətsadərawa ndaw, ma ləmada ndaw da dzerey,

¹⁷ ma aza ndaw ma Bay ma Bəla na, ka key na ɗa ndaw aha, ma həla vaw aha, ma da kada meslərey hayna hay tabiyaha.