2 Timotey 1 - MEY HAYNA WAYNA MA YEZU KRISTE MA MEVEY

Me tsey guma a vaw ta me sərey vaw

¹ Yah Pol maslaŋ ma Kriste Yezu, andza na ma Bay ma Bəla me wuɗey ana, andza na ma tsa ha kava na, da mendzey na da Kriste Yezu ana,

² a Timotey, bəzey ɗaw na i ma wuɗa haɗa na: hayna ndzefey hahaya, me key da vaw ta zozoy da har ma Bay ma Bəla Baba, ta Kriste Yezu Bay’ərlam a lakwa.

Ma madara sise a Bay'ərlam

³ I madara sise haɗadzidzay a Bay ma Bəla, na i ma kar meslərey a veɗ ma Baba tete ɗaw hay ta mezek a ɗaw adzay ’ar piokw ana, andza dəvaɗ ta rəpas adzay zarra i sləfaka da ma ɗula mey ɗaw na.

⁴ Andza i sərafa ka yam dey ɗek na, a saya nduk nduk ma nəkadaka, ma aza i ka rəhey ta wuiya.

⁵ I sərafa ka me pey 'ar eɗek ana gədaŋ aha na, me pey 'ar ana, na tsəfəmey ana da mama ɗek Lowiys, ta Eonis may ɗek, ekəɗey i sərada ha dey ta kava, ŋga da vaw ɗek ana satsa.

Ma kəɗada vaw haya haya ka Mey Wayna

⁶ Hərway ma mey ekəɗey i madaka na, hayna pərkadərawa tek ma Hayaha ma Bay ma Bəla na da vaw ɗek ana, zla da har andza i ma bazləhafəkawa har ana.

⁷ Hərway ma mey Bay ma Bəla a vəlandukurawa na Mesəfrey ma zluwer kakay, amana Mesəfrey ma gədaŋ, ma ma wuɗa vaw ta me wey 'ar a vaw.

⁸ Arka tok na, hwaray ka da kaka ma kar seydewe a Bay’ərlam a lakwa zlay, hwaray ka da kaka hərway ɗaw zlay, yah a neney da daŋgay hərway ŋga na. Amana, kama banay tsetsuwe, hərway ma Mey Wayna da me pey 'ar ka ma slafa ma Bay ma Bəla.

⁹ Ŋga ma buwandukurawa, ma zəlandukurawa ta mezəley kokwoɗ ana, na ŋga na na, ka vəday ma mber a lakwa me key hayna kakay, amana ka vəday ma tek aŋga ma dzeley ana, ta hahaya ŋga. Hahaya na, ŋga na ma vəladandukurawa da Kriste Yezu ana, zla bəla ka zley tsaray kakay ana.

¹⁰ Hahaya na a da sərey na, da ma ɓawa vaw ma me buwey lakwa Kriste Yezu. Ma davasada memətsey na ŋga, ma wuɗadərawa mendzey, ta memətsey dasakay ana, ta Mey Wayna.

¹¹ Na ma padəmaya ma gawla ley aha, maslaŋ aha ta ndaw me tetəkey ndaw aha.

¹² Nəkafa i sey banay ana ekəɗey na hərwuiya. Amana a kaya hwaray kakay, hərway i sərada 'ar a ɗaw ma pa ha na ka way, i səradaha dey ta kava, ŋga na a slafa ma wafa vaw ka tek na ma vəla ha, da har a ɗaw ana, kasl ka meney ana.

¹³ Zəgey andza tek me tsey dey kava ha na, guma na hay hayna hay, kah ma tsənadata ka yah ana, da me pey 'ar, ta ma wuɗa vaw na da Kriste Yezu ana.

¹⁴ Wafa vaw ka tek ana hayna, ma pa ha ta har ma Mesəfrey Kokwoɗ ana, na da vaw lakwa na.

Seydewe ma dzam hayna

¹⁵ Kah na, ka səradata ha ndaw ma Azi hay tabiyaha ka mbəkadəmaya ba, da walaŋ ana na, andza Fizel ta Ermozeŋ.

¹⁶ Hayna Bay’ərlam ka batəkwafatərawa kokwoɗ aŋga ka veɗ 'ay ma Onezifor, hərway ŋga ka maya 'ərev ba dey haɗadzidzay, kwa hwaray ka kar hərway ma tsalalaw a ɗaw hay kakay.

¹⁷ Dzadzak na, andza ma husaɓa ŋga a Rom tsa na, ŋga ma səpaya ta yam aha da gula, arka ma ndzafaya.

¹⁸ Hayna Bay’ərlam ka vəlar ka ndzefey kokwoɗ na ka slam ma Bay’ərlam ana, ta pas ana ŋga na. Ta meslərey ŋga na hay tabiyaha ma kadiyawa da Efez ana na, kah ana ka sərada a fənata ndaw hay seŋgey!