2 Tesalonisieŋ 2 - MEY HAYNA WAYNA MA YEZU KRISTE MA MEVEY

Tek ma da key mba ka ma da sawa ma Bay’ərlam

¹ Ka guma ma ma da sawa ma Bay’ərlam a lakwa Yezu Kriste, ta ma da kusey lakwa ka tsakay ŋga na, la tsəhafəmakwar ŋgey malam a ɗaw hay:

² ka da həɓakwar 'ar tsam tsam zlay, kwa ka da tsəlafakwar zluwer kavəday ma tek ma ɓəmakwar andza ma ndaw sek ana hay zlay, da guma ma tsəmakwar, dakay andza ɗeriwel ma ɓəmakwar ka ləva na, na la ma windəməkuraɓa, arka a da dzaladakwar 'ar na, pas ma Bay’ərlam ka husawa tsoy zlay.

³ Kwa ndaw ka da pətənakwar ta ndaraw waray waray zlay, hayna har ana ndaw hay ma mbəɗamar dəba a Bay'ərlam ana na, ka husawa ba ɗagay, Bay ma meŋgəsey ka ɓey vaw ba ɗagay, Bəzey ma me zəɗey.

⁴ Ŋga me lətsey 'ar, ma kar vərom a tek ana ma zəlamar 'ərlam ana, dakay na, na ma namar dəba na, ha ŋga na ta 'ar aŋga na ma ndzey da 'Ay me key Kuley ma Bay ma Bəla, arka ŋga me tələkey mey, waya ŋga na Bay ma Bəla.

⁵ Ka sərafəmata ha, ka na i ma tsəkurawa kava da har andza i da 'ay kwar mba na sakay ɗaw?

⁶ Ekəɗey na, ka səradama tek ana ma zəgada na, ma aza ka da ɓey vaw na ka har ana.

⁷ Hərway tek ma kəzla na ma meŋgəsey na, tsoy a key aha mber ka dəba, akwa a zarawa na, ma gədzəhadama ndaw ma zəgada ekəɗey ana ba na tsoy.

⁸ Arka na, Bay ma meŋgəsey a da ɓawa vaw tok, na Bay’ərlam Yezu ma da zəɗadara 'ar ta Mesəfrey ma huɗa mey ŋga na, arka a da davasada ta ma wezley dey ma ma sawa ŋga.

⁹ Andza ma da sawa ma bay ma meŋgəsey tey na, a da sərey na da mber ma Sataŋ, a da ɓey vaw da mber hay gəle gəle ma ma slafa, ta ɗeɗew hay, ta tek ma rəzley ndaw ma zləgey ndaw ana hay,

¹⁰ ta tek me pətəney ndaw hay tabiyaha ma dzerey kakay ana hay, ma ndaw ma zəɗam ana hay, hərway ma mey na, ka təɓama ma wuɗa vaw ma dərka, akwa ka buwata na kakay.

¹¹ Bay ma Bəla a sləratərawa ma slafa ma zləgadata ka pam 'ar ka malwaɗay na hərwuiya.

¹² Kəɗey na, ndaw me pey 'ar ka dərka kakay ana hay tabiyaha, ama ma zəgam tsəveɗ ma dzerey kakay ana hay na, a da kadəmatara sariya ta na.

Ndzam gədaŋ gədaŋ ahiya da 'ar me pey

¹³ Ŋga la tey na, hayna la ka madəmara sise dzeɓelle a Bay ma Bəla hərway kwar, malam na Bay’ərlam ma wuɗata na hay, hərway Bay ma Bəla ka gaɗəmakwar ba zla da mezley, ma aza ka buwəmakwar ta Mesəfrey ma tərada ndaw kokwoɗ aha, ta me pey 'ar ka dərka ana.

¹⁴ A zələməkurawa kava na, ta Mey Wayna la: ma kuray ka ndzafam maram ma Bay’ərlam a lakwa Yezu Kriste.

¹⁵ Kəɗey tok ŋgey malam a ɗaw hay, ndzam gədaŋ gədaŋ ahiya, zəgafama har haya haya ka guma na la ma tatəkadəməkurawa ta huɗa mey la na, dakay na la ma windəməkuraɓa da ɗeriwel ana hay.

¹⁶ Hayna Bay’ərlam a lakwa Yezu Kriste na ta 'ar aŋga, ta Baba lakwa Bay ma Bəla, ma wuɗandəkurawa na, ma vəlandukurawa hahaya ŋga ma mey 'ərev na me ndəvey kakay ana, ta me pey dey hayna,

¹⁷ hayna ka makwar 'ərev, ka vəlakwar gədaŋ da tek a kwar ma kam tabiyaha na hay, ta tek a kwar ma tsam ka tek hayna hay tabiyaha.