2 Korintieŋ 9 - MEY HAYNA WAYNA MA YEZU KRISTE MA MEVEY

Me tsey ka guma ma tek me tsekeley mekelehe sa

¹ Ka guma ma dzənada ndaw Kokwaɗ ana hay na, la windəmukuraɓa dzay kakay.

² I sərada ha me dzeley 'ar a kwar hayna, kəɗey na, i ŋgalakadakwar ka slam ma ndaw ma Maseduwan hay: i ləvatar na, ndaw ma Akayi hay na, ma wa vaw aya zla tasanaha, kəɗey na, vatsa vatsa kwar ana na, ka vəlatar gədaŋ ba a sa ma Egliz hay haɗadzidzay.

³ I sləraɓa malam a neney hay ka tsakay kwar na, ma wuiya ɗaw ana me key hərway kwar ana na, ka da tərey tedehe zlay. Andza na i me tsey ana na, hayna ndzam ma həla vaw ahiya dərka.

⁴ I wesey na, kendzey andza la dəmaɓa andza ndaw ma Maseduwan hay na, la ndzafəmakwar ma həla vaw aya kakay na, me pey 'ar ala na ka kuray haya hayaha na na, ka da tərey hwaray aha zlay, ɗoh na ma kwar.

⁵ I me dzeley tok na, i ma kəlaɓa malam hay ka dəmaɓa ka mey a 'ay kwar, ma kuray ka həladama vaw ta tek a kwar ma da vəley ana hay: andza tek ma me wurey har a kwar ana, ma tsəmawa kava na, ma tsəha 'ar aya tsoy na, ka key na me wurey har ana hayna dərka na, ta dey aha da bəziya zlay.

⁶ Hayna səradama a tsəmawa na: «Ndaw ana ma sləkey ketekuɗey na, a da kəzley ketekuɗey tey. Ndaw ma sləkey haɗadzidzay na, a da kəzley haɗadzidzay tey!»

⁷ Kwa wa yway ka vəley na, andza ma mevel aŋga me dzeley ana, mandzara ka key mevel, ma gədaŋ kakay, hərway Bay ma Bəla a wuɗey na, ndaw ma vəlada tek ta wuiya ha na.

⁸ Bay ma Bəla a slafa ma vəlakwar hahaya hay gəle gəle tabiya ma ka pas ka pas tek ka rafakwar daha, arka ka key ka 'arra daha, ma kada tek hayna hay tabiyaha.

⁹ Andza na ma winda ha da ɗeriwel kokwaɗ ana: «Ŋga ka wanəkada ba, a vəladatara a ndaw mbarga na hay, dzerey ŋga na a ndzey na ma kwaza ha.»

¹⁰ Ndaw ma vəlar haləfaw a ndaw me sləkey, peŋ me zəmey ana na, a da vəlakwar haləfaw ana tiyatsa, a da səkada adiya, a da gəladərawa tek me dzerey kwar hay.

¹¹ Ka da kam zleley ahiya da tek hay tabiyaha, ta ndaraw hay gəle gəle, ma aza da me wurey har a kwar a ndaw hay na, ndaw hay a da madəmara sise a Bay ma Bəla, hərway ma tek a kwar ma vələmatəraɓa ta har ala na.

¹² Hərway mber ma tek a neney me tsekeley ana na, ka da nafatar a ndaw Kokwaɗ ana hay dada tsa kakay, amana, ma səkada sise ma ndaw hay ma kamar a Bay ma Bəla ana.

¹³ Andza mber a neney ka datar 'ar ba kassla na, a da səmbərama Bay ma Bəla, hərway ma me tsəney sləmay kwar ma ɓadama da Mey Wayna ma Kriste, da ma wama ’ar hərway ma me wurey har a kwar, kuray ma wanəkadama tek a kwar hay, ta taya, ta sa ma ndaw hay tabiyaha na.

¹⁴ Arka ta me ɗuley mey ta, hərway kwar na, a da madəmukurawa kokwoɗ a kwar, kavəday ma hahaya kwar a neney haɗadzidzay, Bay ma Bəla ma vəlakwar ana.

¹⁵ Təɗe ma madara sise a Bay ma Bəla ma tek aŋga ma hayaha tek ma malada dakay ana!