2 Korintieŋ 8 - MEY HAYNA WAYNA MA YEZU KRISTE MA MEVEY

Ma səmadata ndaw hay ka ndakadama me tsekeley tek

¹ A sandar ma ɓadəmakwar na malam a ɗaw hay, hahaya ma Bay ma Bəla ma katar a Egliz ma Masedowan hay.

² Da walaŋ ma viya ta neney hay haɗadzidzay, taya ma sam ana na, wuiya ta na, ɗuhwa ha dzay, ta mbarga ta na toloy toloy ana na, a da rəhey na, ta zleley ma me wurey har.

³ Ma vələmawa na, andza na ma ta ma slafama na, i ka seydewe na, ka fəna ma ta ma slafama na ba, ta mevel ata adzay,

⁴ Taya ma tsəfafəmandar waya tsəmma la ka dzəmam a me key meslərey ma hahaya, kavəday ma ndaw Kokwaɗ ana hay.

⁵ Ma vəlam na ka fəna na la ma dzalam ana ba, taya na, ma vəladama vaw ta na, ka mey na, a Bay’ərlam, a dəba na na, a la, da me wuɗey ma Bay ma Bəla.

⁶ Satsa na, la ma təkamar ɗay a Tit, ma ka ndəvadərawa mber ma me wurey har a neney da 'ay kwar ana, andza na ma zlərawa na.

⁷ Ama andza ekəɗey kuray na, zleley ahiya da tek hay tabiyaha: da me pey 'ar, da ndaraw ma guma, da me sərey tek ta hatsatsa kwar da tek hay tabiyaha, da ma wuɗa vaw na kuray ma ndzafəmaɓa da la na. Ekəɗey sa tey na, kam zleley da me wurey har da varay a neney sa tey.

⁸ I tsəraɓa na, andza mewey aha kakay, ama andza i ma sləfadakwar ta hatsatsa ma sa ma ndaw hay na, i key na, i vəlakwar slam har, ma ha ɓadama ma wura har a kwar ana da dərka na.

⁹ Ka səradama ha akwa seŋgey, ma wura har ma Bay’ərlam a lakwa Yezu Kriste, ma kadakwar a kuray ana, ŋga ndaw zleley aha, amana, ma tərada vaw ŋga mbarga ha, ma da kadakwar zleley ahiya ta mbarga ŋga.

¹⁰ Da tek a neney hay na, i tsukuraɓa andza na ŋga ɗaw i me wuɗey ana. Nəkafama təɗe ma kwar na neney: ma zugwatar har tsəfəmey aha a kretieŋ ma Zeruzalem hay na kuray. Tasana ha ma dzalərawa tek a neney ka mey na kuray ana satsa.

¹¹ Ama ekəɗey tok na, ndəvadama ka ndesley tok; kəɗey na, tek a kwar ana hayna kuray ma dzaləmərawa na na, ka dam ka vaw, ka ndesley andza na kuray ma slafama na tiyatsa.

¹² Kendzey me dzeley 'ar ana na, haya ha dərka na, ta tek a lakwa na ma ndzafəkwawa na na, a ŋgələmandakwar mambay mambay aha, na dakay ana na, a key da 'ar kakay!

¹³ Ka da tələkadama vaw kwar a mbarga mavəday ma me dzəney sa ma ndaw hay tsa zlay, amana, ka key na kal kal.

¹⁴ Da tek a neney tok na, tek na andza kuray ma ndzafam kambəlaɓa ka 'arra na na, a da dzənata ka slam ma tek ma hətsatar ana, ma aza pas asləta tey na, tek na ma mbəlatar ana na, a da dzənakwar a veɗ ma na ma hətsakwar ana tey: kəɗey na, a da key na kal kal tok

¹⁵ andza na ma winda ha da ɗeriwel kokwaɗ ana na: «Ndaw ana andza ka kwersey ba kambəlaɓa na na, tek ana ka da mbəlar dakay, ndaw ma kwersey ketekuɗey ana na, ka hətsar dakay.»

¹⁶ Təɗe ma ma madara sise a Bay ma Bəla ŋga ma pərawa hatsatsa a mevel ma Tit, andza ma kwar ana tiyatsa.

¹⁷ La ma zələmərawa na, ka sawa ba dərka na, ma fəna sa na, mandzara me sesəkey vaw, ta mevel aŋga dzay na, ma daɓa a 'ay kwar.

¹⁸ La ma sləradəməraɓa ta ŋga, malam ana ŋga na Egliz hay tabiyaha, ma səmbərama, hərway ma Mey Wayna na.

¹⁹ A fəna satsa na, Egliz hay tabiyaha ma gaɗəmama da walaŋ ma ndaw hay, ma ka tərey ndaw ma kəsadandar da me heley la, da mber ala ma me wurey har a ndaw hay, mber na la ma kama ma hasəkadara bəzay a Bay’ərlam ana ta ’ar aŋga na, ma la ka kama mber ala ma dzalama ana təɗe təɗe.

²⁰ La wam daw ka vaw haya hayaha, ma ka da ŋgələmandar bəzay ka mber ma sumkwo neney haɗadzidzay ana, ma vəla ha da har ala na zlay.

²¹ La wuɗam me key tek hayna na, ka slam dey ma Bay ma Bəla dada tsa kakay, amana, ka slam dey ma ndaw hay tiyatsa.

²² Ta ndaw ma gaɗəma hiya na hay na, la ma sləradəməraɓa malam a lakwa, na andza, da tek hay haɗadzidzay na, la ka səradama hatsatsa ŋga na ba, ekəɗey satsa na, a ɓada adiya a fəna sa, hərway ma mey na, a pakwar 'ar haya hayaha.

²³ Tit na, mandala ɗaw, la kam mber tsetsuwe ka slam a kwar ana, malam ala na hay na, taya na bəzey meslərey ma Egliz ahiya, ma maram ma Kriste.

²⁴ Äadəmatara ma wuɗa vaw kwar ka slam dey ma Egliz hay, ta ma mbafəmandar a kwar ka slam dey ta.