2 Korintieŋ 7 - MEY HAYNA WAYNA MA YEZU KRISTE MA MEVEY

¹ Haɗaw azlakwa i wafakwa ha vaw ka guma na ma tsəmandakwar ana na, dzam a ɗaw hay, lakwa na na, bazləmakwa vaw lakwa hay ba tabiyaha da meŋgəsey ma slaw vaw, ta na ma mesəfrey; ndakadakwa ma tərada vaw kokwoɗ aha, da me wesey ta Bay ma Bəla.

Wuiya ma Pol ka ma mbəɗada mendzey ma Koreŋtiyeŋ hay

² Aŋga kəmandar slam da mevel a kwar hay tey, la ka ŋgəsamar a ndaw kakay, la ka təradama ndaw mbarga ha dakay, la ka zəmam merɓey ma ndaw dakay.

³ I tsa ɗey na, ma da dzuwakwar kakay, hərway ɓa i ka tsa ba: kuray da mevel ala, a memətsey a mendzey.

⁴ 'Ar a ɗaw me pey ka kuray na, ɗuhwa ha dzay, wuiya ɗaw me ndzefey da kuray na, ɗuhwa ha dzay, kuray ka məmaya 'ərev ba, da viya la ma kam tabiyaha na, i ma rəha ha ta wuiya.

⁵ Akwa na, andza me husey la a Masedowan na, la ka ndzafam me sesəkey vaw dakay, amana, tsetseh hay gəle gəle dey haɗadzidzay, ta bəla na, me kəɗey vaw; ta 'ay na, zluwer.

⁶ Ama Bay ma Bəla, ndaw me bədey ndaw ləfeɗeɗe na hay na, ma mandar 'ərev ta ma daɓa ma Tit.

⁷ Ma ma husaɓa ŋga tsa kakay, amana, ma mesəmey vaw kwar kuray ma səmadəraɓa na. Ka ɓadandar tek a kwar ma sakwar nduk nduk ana ba, yam dey kwar, ta hatsatsa kwar ma dzaŋgərafaya na, ha ma daya 'ar na afəna sa.

⁸ Ayaw, kwa i ka fənadakwar mevel ba da ɗeriwel a ɗaw ma windukuraɓa na na, i hwehuney kakay…-kwa andza i ka hwehuney ba mavəday ma ɗeriwel ana ŋga na na, i sərafa, ka fənadakwar mevel ba, da mendzey nekəɗey na-,

⁹ ama ekəɗey na i da wuiya, hərway ma mevel a kwar ma tsəkurawa na kakay, amana, hərway mevel a kwar ma ma mbəɗey ana. Hərway mevel ma tsəkurawa na na, andza ma Bay ma Bəla me wuɗey ana; kəɗey kwa la ka kəmakwar tek dakay

¹⁰ Hərway me tsey mevel andza ma Bay ma Bəla me wuɗey ana na, a vəley me mbəɗey mendzey, a kəsey ndaw a me buwey, kwa a mbəkar slam a ma hwehuney kakay… Ama me tsey mevel andza ma bəla ɗey na, a vəley memətsey.

¹¹ Nəkafama dzadzak ka tek me tsey mevel ana me key da 'ay kwar ana, andza ma Bay ma Bəla me wuɗey ana, amana ayaw! Haf haf waray da me key tek hay! Me key kwezekw waray! Me hwehuney waray! Zluwer me key tek ta huɗa kakay ana waray Haway waray ma da nəkadaya na na! Me həley vaw waray! Ma daka ’ar na me hətey ndaw ɗaw! Akwa dzadzak na, da tek a neney hay tabiya ha na, kuray ka ɓadama andza malay kwar da huɗa dakay.

¹² Ka key degwele ha na, andza i ma windəkuraɓa na na, kwa kavəday ma ndaw me key tek a ndaw ana kakay, kwa kavəday ma ndaw ma kamar tek ana kakay atsa, amana, ma ɓada ka slam dey kwar, ka slam dey ma Bay ma Bəla, hatsatsa kwar me key hərway la.

¹³ Nəkafama tek na, ma bədadandərawa na. Mbəkada me mey ’ərev a yah ana dada na na, ma da dandar ’ar na, wuiya ma Tit na kuray tabiyaha ma məmərawa mevel haɗadzidzay ana.

¹⁴ Kwa andza i ka ŋgalakadakwar ba ka tsakay ŋga na, hwaray a da kaya ha kava dakay, ama andza la ma tsəmakwar ka pas ka pas na dərka na na, ma ŋgalakadəmakwar ala na ka slam ma Tit ana na, ka tərey ba dzerey aha.

¹⁵ Kokwoɗ aŋga ma kakwar ana a səkey adiya, kendzey a dzalada me tsəney sləmay kwar tabiyaha, zluwer a kwar ta ma wasamar a kwar da har andza kuray ma ŋgəlama na na.

¹⁶ I ma rəha ha ta wuiya da me pey 'ar a ɗaw ka kuray, da tek hay tabiyaha.