2 Korintieŋ 6 - MEY HAYNA WAYNA MA YEZU KRISTE MA MEVEY

¹ Ana azlakwa la kam aha mber ta ŋga sana, la həladəmakwar bəzay akwa na, ka da gəradama hahaya kuray ma ndzəmafəmawa da Bay ma Bəla na, ka da ndzey tedehe zlay.

² Hərway Bay ma Bəla a ləvey na, kassla ka har hayna na, i da mbəɗafaka kava, arka ta pas ma me buwey na, i daɓa, ma da dzənaka Nəkafama ekəɗey tok na, har ana hayna ka slawa ba tsoy tok. Nəkafama ekəɗey na, pas ma me buwey ana tok.

Ndaw hay ma meslərey ma Bay'ərlam

³ La wuɗam ma par hwaray a dey a ndaw kakay, ma aza da mber ala na, la ma kam ana na, ndaw ka da ŋgəlandar bəzay zlay.

⁴ Dzadzak na la wuɗam ma ɓada da tek hay tabiya ha na la andza gawla ma Bay ma Bəla ahiya, kəɗey na la ɓəsəmata tek hay da me zəgey mevel haɗadzidzay: da viya hay, da me geɗətsey, da me dzəmey ka vaw,

⁵ da me kəɗey, da daŋgay, da slam ma tsəhafəmaya 'ar, da me yey vaw, da me rəzley ta dey, da me key sumaya,

⁶ ta tsəzlakka, ma sərada tek, me pey dey, kokwoɗ, ta Mesəfrey Kokwoɗ ana, ma wuɗa vaw mandzara malwaɗay,

⁷ guma ma dərka, ma slafa ma Bay ma Bəla, ta tek ma har na ma kəɗada vaw, ta na me dzəŋgərey ka vaw ma dzerey ana.

⁸ da maram ta ma rəsa vaw, a ŋgələmandar bəzay, a tsafəmandar haya kakay aha, a tsafəmandar hayna, a təradəmandar andza ndaw maləwaɗay ahiya, azlakwa zlay la tsam na dərka,

⁹ andza a səradəmandar kakay, azlakwa zlay a səradəmandar haya hayaha; andza ndaw a mətsam ahiya, azlakwa zlay la ta dey, a hətəmandar mandzara ka kəɗəmandar vagay ahiya.

¹⁰ A kəmandar tek ma ndeley ana hay, ama la ka pas ka pas na da wuiya, mbarga hiya, amana, i kadəmata zleley haya hayaha, tek ala dakay, ama tek hay tabiyaha na, na ŋga la!

¹¹ La ma tsadəməkuraɓa guma neney hay na, ndar ndar, kuray Koreŋtiyeŋ hay, la na, la ka wuradəmakwar mevel ala hay ba hayahaya.

¹² Ka la na, kuray ma gaɗətsaya tikay, dzadzak kuray ma gaɗətsaya na, ka 'ar vaw kwar ana.

¹³ Hayna madəmandar ka sele tey: i tsakwar guma na, andza a wawa ɗaw hay, wuradama mevel a kwar haya hayaha, kuray ana tiyatsa!

Me weley tek me nefey ana

¹⁴ Ka da dzəmam a tuwaw ma ɗay ma sla ta ndaw ma pam 'ar kakay ana hay zlay; andza dzerey ta meŋgəsey a dzəmam na da may? Andza ləvaŋ ta waw me nəkey dey a dzəmam na da may?

¹⁵ Da walaŋ mandza Kriste ta Beliyar, a da dzəmam na ka mey? Ma dzəmadata andza ndaw me pey 'ar ta ndaw me pey 'ar kakay ana na mey?

¹⁶ Ɗagay ma dzəmadata ’ay ma kuley ma Bay ma Bəla, ta na ma ’ərlam ma ndəra ta har ana hay na mey? Hərway lakwa na, lakwa 'ay me kuley ma Bay ma Bəla na ŋga ta dey ana, andza na ma Bay ma Bəla ma ləvawa na: «Da walaŋ ata na, i da ndzey, i da heley, i da tərey Bay ma Bəla ata ha, taya a da təram səkway ɗaw aha.»

¹⁷ Bay’ərlam a ləvey na: «Bəmawa ba da walaŋ ma ndaw ana ŋga na hay, ndzam slam a kwar gəle, ɗaɗa ka da ɓəlamar a tek na ma zləɓa na zlay, arka yah tey na, i da ŋgəlakwar.

¹⁸ I da tərey na, Baba kwar aha, ka da təram na bəzey ɗaw ahiya, ta dem a ɗaw ahiya.» Bay’ərlam ma slafa tabiyaha na a ləvey na andza neney.