2 Korintieŋ 4 - MEY HAYNA WAYNA MA YEZU KRISTE MA MEVEY

Me ɓey vaw ma Kriste da mber hay

¹ Haɗaw azlakwa ta kokwoɗ aŋga satsa na, meslərey a neney la ma zəgadama na na, a mətsandar har kakay.

² La ka mbəɗəmatar mey ba a tek ma kəzla na, ma kam hwaray ana hay, da mendzey la na, la təkənam ndaw tikay, la zləgadama guma ma Bay ma Bəla tikay, dzadzak na, da ma ɓada dərka na na, la səpam na, ma ndaw hay tabiyaha ka pəmandar ’ar ka slam dey ma Bay ma Bəla.

³ Haɗaw azlakwa Mey Wayna na la ma taləkadama mey ana ma ndza ha ma sahəta ha na, ma sahəta ha na, ka ndaw ma zəɗadama mendzey ta dəreŋ ta Bay’ərlam ana hay,

⁴ ma ndaw me pey 'ar kakay na hay, na 'ərlam ma bəla neney ma waləfadatara me sərey tek ata ba, ma aza ka da nəkadama me wuɗey dey ma Mey Wayna ma maram ma Kriste na zlay, ŋga na, mey 'ərdey ma Bay ma Bəla.

⁵ A ’ay! La tsam na ka ’ar vaw ala na hay kakay, ama la tələkam mey na, ta Yezu Kriste Bay’ərlam, haɗaw la na ta 'ar a la na na, la ma tələkam mey ana na, la gawla ma 'ay kwar hay, hərway ma Yezu.

⁶ Hərway Bay ma Bəla ana me ləvey: «Hayna waw ka wuɗey da wuzlah ma ləvaŋ.» Me wuɗey na, ŋga na ta 'ar aŋga da mevel a lakwa hay, ma da wazlada dey ta tek me sərey ma maram aŋga, me wuɗey ka mey 'ərdey ma Kriste na.

⁷ Ama zleley ana na, i zəgakwa ha, ta tek na ma ndəra hiya ta ndəleɓ ana, ma tek a neney, gədaŋ ma tek ana na, tek ma malada dakay ana, ma Bay ma Bəla zləna, na ŋga la kakay.

⁸ A gaɗətsəmandar ta sləna ta sləna, amana, la ma kəra hiya kakay. A kəmandar tek ger ana hay haɗadzidzay, ama na ka mətsandar har kakay.

⁹ A husləmandar, amana ka zəgəmandar kakay, ka gartəmandar tsoy, amana, ka ndəvadəmandar kakay.

¹⁰ Zarra la zəgama tsetseh ma Yezu da vaw la, ma aza mendzey ma Yezu ka nəkey da vaw la tiyatsa.

¹¹ Ka pas ka pas, akwa lakwa ndaw ta dey ana hay na, lakwa ma ŋgwaha ahiya a mey ma memətsey hərway ma Yezu, ma aza mendzey ma Yezu ana tiyatsa na, ka nəkey da vaw lakwa neney memətsey ma slafa na.

¹² Kəɗey na, memətsey a key aha mber da vaw la na, ama mendzey na a key mber da kuray.

¹³ Mavəday ma gədaŋ ma mesəfrey ana ŋga na, da me pey 'ar andza na ma winda ha da ɗeriwel kokwaɗ ana na: «I ka pey 'ar ba, i da tsey guma na, hərwuiya.» La pam 'ar tiyatsa, la da tsam guma ɗey na, hərwuiya.

¹⁴ Hərway la səradama, Ndaw ma mbəladərawa Bay’ərlam Yezu ana na, a da mbəladandərawa la neney, andza Yezu ana tiyatsa, a da padandakwar andza kuray kəreh ka tsakay ŋga na.

¹⁵ Tek a neney hay tabiyaha da mendzey la na na, ma vəday kwar, ma hahaya ma Bay'ərlam ka gəley, ka səkey ta har ma kominite a wesey aha na, ma da madara sise a maram ma Bay ma Bəla.

Mendzey ta 'ar me pey aha

¹⁶ A da mətsandar har eɗey kakay na hərwuiya, kwa andza slaw vaw a lakwa neney, a mey ’ar a me zəɗey ŋga na, ndaw ana da vaw lakwa na na, a tərey waya ha ka pas ka pas.

¹⁷ Hərway viya lakwa ma kakwa ma mendzey nekəɗey ana na a ləham kakay kendzey ma malada ta me ləhey ma maram ana ma gegətsey ’ar ana, ma ndəvey kakay ma ləmadəmandakwar ana na.

¹⁸ Tek ala me wuɗey ma da husey kava na na, tek na me nəkey ana tikay, amana, tek na me nəkey kakay ana; tek na me nəkey ana na, a ndzey haɗadzidzay kakay, ama tek na me nəkey kakay ana na, a ndəvey kakay.