2 Korintieŋ 3 - MEY HAYNA WAYNA MA YEZU KRISTE MA MEVEY

Ndaw ma kəley ka mey ma Me dzəmey Vaw Wayna

¹ Ekəɗey na, la ka ɓəmakwar vaw dey mekelehe sa ɗaw? Tsukuɗu i ka kam andza na ma ndaw ana hay ma kəmakwar ɗeriwel ma me ɓey vaw ana sa ɗaw, dakay na da har a kwar sa tey ɗaw?

² Ɗeriwel ala na, kuray ana, ɗeriwel ana ma winda ha na, da mevel ala hay, ndaw hay a səradama, ka dzaŋgama tsoy.

³ Dey ta kava kuray na ɗeriwel ana Kriste me windey ana hay, ma ɓada na la, ma winda ha na ta bik kakay, ama na, ta Mesəfrey ma Bay ma Bəla na ta dey ana. Ma winda ha na ka beleler ma ŋgwa kakay, ama na, ma slaw vaw, da mevel a kwar hay.

⁴ Neney na tek ala ma sərafa na, la ma ndzafəmawa kuse ma Kriste ka slam dey ma Bay ma Bəla.

⁵ Ma gədaŋ ma vaw la na na, la slafama me key tek a neney kakay, gədaŋ ala a sawa na, da Bay ma Bəla.

⁶ Ma təradandar ɗa ndaw me key meslərey ma me dzəmey vaw wayna na ŋga. Hərway mewey ma mewindey na a dada ndaw a memətsey, ama Mesəfrey Kokwaɗ ana na, a vəley mendzey.

⁷ Haɗaw azlakwa meslərey na ma dada ndaw a memətsey ana ma winda ha ka ŋgwa, a wezley dey, ha bəzey ma Israyel hay a slafama me zezərey mey 'ərdey ma Moyiz kakay hərway ma mewezley dey ŋga na, a devesey vaw ana na,

⁸ sakwa meslərey ma Mesəfrey na, a da ndzefey na a fəna sakay tok ɗaw?

⁹ Haɗaw azlakwa meslərey me dzuwey ndaw ana ka wezley dey ba tok na, meslərey na ma dzerey na, a da ndzefey afəna sakay tok ɗaw?

¹⁰ A-ay, kwa andza tek na zle zle na, tek me wezley dey ka ləmar ba na na, a da nəkey aha sakay, ka slam dey ma mewezley a neney tek ma malada dakay ana na.

¹¹ Hərway haɗaw azlakwa tek me devesey ana na, mewezley dey ŋga ka sərey ba na, na me ndzey tsoy aha na na, a da sərey na hadzəgay!

¹² Kuse ma me pey dey ana andza na ŋga na na na, la ma ndza hiya na, 'ar piokw.

¹³ La na, andza Moyiz tikay, ŋga na, ma sahəta dey aha ba ta lafaya, hərway bəzey ma Israyel hay ka da nəkadama me ndəvey ma mewezley dey ŋga na, me devesey ba na zlay.

¹⁴ Amana, me sərey tek ata ka tərey ba ləvoŋ aha, kasl ekəɗey, kendzey a dzaŋgama da ɗeriwel Gurma na na, lafaya na, ŋga na na, ŋga daha mba, ma wura ha kakay, hərway a da devesey na ta Kriste.

¹⁵ Ayaw kasl ekəɗey, kendzey a dzaŋgama ha ɗeriwel ma Moyiz na, lafaya na ŋga ka mevel ata.

¹⁶ Lafaya na hana a da kəley na, sey ta me mbəɗey mendzey ka Bay’ərlam.

¹⁷ Hərway Bay’ərlam na Mesəfrey aha, arka ka slam ana Mesəfrey ma Bay’ərlam ŋga daha na, ma wa ’ar daha.

¹⁸ Lakwa neney tabiyaha, mey dey lakwa ma sahətaya sakay ana hay na, i nəkakwama andza me wezley dey ma Bay’ərlam. Mey dey lakwa hay ka mbəɗam ba pəla mekelehe, andza mey dey ŋga, ta me wezley dey ɗuhwa ha, ka pas ka pas aha, ta har ma Bay’ərlam, ŋga na Mesəfrey aha na.