2 Korintieŋ 2 - MEY HAYNA WAYNA MA YEZU KRISTE MA MEVEY

¹ Na ŋga ɗaw i me dzeley na neney: i da maɓa ha a 'ay kwar ta mevel aha sakay.

² Haɗaw azlakwa i kakwar tek me tsey mevel aha ba na, ma da vəlaya wuiya na way tok? Ana sey ndaw ana, ma i kar tek me tsey mevel aha na far!

³ I windaɓa na hərway ma guma neney, tsefe aza ma husaɓa ɗaw na, i ka da ndzefey ndaw, mevel a tsar aha da walaŋ ma ndaw ma da vələmaya wuiya na hay zlay. I sərada me key kwar mambay mambay aha, wuiya ɗaw na, wuiya kwar tabiyaha tiyatsa.

⁴ Satsana, i windukuraɓa ɗey na, da viya ɗuhwa ha, da mevel a tsaya ha, ta yam dey aha ka dey, ma kuray ka kam mevel kakay, amana, kuray ka səradama ma wuɗakwar a ɗaw ana kambəlaɓa da mevel a ɗaw ana.

Pol a safa yam ka ndaw ma kar tek haya kakay aha na

⁵ Kendzey ndaw ka key tek me tsey mevel aha ba na, a kadaya na a yah kakay. A kadakwar na a kuray tabiya ha, ama na ka da hərafama waw ka guma na zlay.

⁶ Ma ndaw andza na ŋga na na, kominite ka kar say tsa.

⁷ ŋgama dzadzak na, safama yam, mamar 'ərev, ma da mevel aŋga ma tsar kambəlaɓa na na, har ka da mətsar zlay.

⁸ Kəɗey na i tsəhafakwar satsa na: ɓadama ma wuɗa vaw kwar hərway ŋga.

⁹ Hərway andza i ma windukuraɓa na, i wuɗey ma halafakwar suwet, ma i ka sərada me tsəney sləmay kwar ana na tabiya ha ɗaw.

¹⁰ Ndaw ana andza kuray ka safama yam ba na na, i safa tey! Arka kendzey i ka safa yam ba na, kendzey kassla ma i ka safa yam ana təŋga na, ma ka ha na ma kwar, ka slam dey ma Kriste,

¹¹ ma Sataŋ ka da pafakwar wuiya zlay. Hərway ka səradakwa ha, tek aŋga na hay me dzeley ana seŋgey.

Me dzəmey ka vaw ma Pol ta wuiya ŋga ma da key a dəba na

¹² Andza me husey ɗaw a Trowas, ma da tələkey mey ta Mey Wayna ma Kriste na, hərway Bay’ərlam ma wuradaya mambaw da huɗa haya haya na,

¹³ kwa re i ka ndzafa 'ar a ɗaw haya haya kakay, hərway i ka ndzafa malam a ɗaw Tit kakay. I ma mbəkadata, i ma daway tek a ɗaw a Masedowan.

¹⁴ Təɗe ma madara sise a Bay ma Bəla, ta Kriste na ma dadandakwar da mendzey tabiya ha da me zəgey ’ar me sleɗ aŋga, ta lakwa na, a wetsey wurdey ma me sərey tek aŋga ka waray ka waray tabiya ha.

¹⁵ Akwa na, la na, ka Bay ma Bəla na, la na, wurdey ma Kriste ma vəladara a Bay’ərlam ana. Wurdey ana na ma ndaw na ma buwa na hay, satsa na, ma ndaw ma zəɗadam ana hay.

¹⁶ Ka ndaw ma zəɗam ana hay na, me zey ma memətsey ma me vəley memətsey ana. Ka ndaw sa na hay tey na, me zey ma mendzey me vəley mendzey ana. Ama ma slafa me key mber ana, andza na ŋga na na way?

¹⁷ Akwa na, la na sapa ma ndaw ana ŋga na hay, ma kam tsakana ta mey ma Bay ma Bəla ana hay tikay; na ŋga la na, da dzerey, ma sləradandar kava na Bay ma Bəla, ka slam dey ma Bay ma Bəla ana, la tsama guma neney na, da me dzəmey vaw ta Kriste.