2 Korintieŋ 13 - MEY HAYNA WAYNA MA YEZU KRISTE MA MEVEY

Me tsey guma a 'ar madakwaydok ana, ta me tsey guma a vaw

¹ Ma da daɓa ɗaw a 'ay kwar ekəɗey ana na, dey ma makar ana: mendzey ma sariya hay tabiyaha a da ləvam dərka na na, ka guma ma ndaw seydewe hay tsew makar.

² Äa i ka tsawa ba, andza ta pas ma ma daɓa ɗaw dey ma tsetsew ana ma da nəkəkurawa na, i mada me tsey teseɗey sa, kwa andza i ka tsakay kwar dakay na, a ndaw ana ma ŋgəsam ana kete na hay, ta sa ma ndaw hay tabiyaha: haɗaw i ka da maɓa ba na, ndaw a da kaya ha da vaw dakay.

³ Hərway ka wuɗam me dzedzəmey zeheɗ ma Kriste me tsey guma da yah ana sana. Ŋga bəle ha ka kuray kakay, amana, a ɓada ma slafa ŋga da kuray.

⁴ Dey ta kava, a daradama na da bəle ŋga, amana, ŋga daha ta dey, ta ma slafa ma Bay ma Bəla. Arka la tiyatsa na, la bəle ahiya da ŋga, ama la da ndzam ta dey ta ŋga, ta ma slafa ma Bay ma Bəla da walaŋ a kwar.

⁵ Sasəkam mendzey kwar ana ka 'ar vaw kwar ana, haɗaw kuray ma ndza hiya da 'ar me pey na. Həlam suwet a vaw ka 'ar vaw kwar ana hay, tsukuɗu ka səradama Yezu Kriste na, ŋga da walaŋ a kwar sakay ɗaw? Dakay dakay na, suwet ana ka da makwar ka 'ar a kwar ana zlay.

⁶ Ka səradama ha seŋgey, i ma dzala na, la na, la ka həlama suwet ma vaw la tsoy.

⁷ La ɗulamar mey a Bay ma Bəla na, ma kuray ka da kamar tek haya kakay aha kwa asləta zlay, la kam na, la ɓadama suwet ala kakay, ama la wuɗam na, la ka nəkadama ka kam aha tek hayna, ma suwet ana ka nəkey na, ka mawa na, ka la na.

⁸ Hərway tek ala ma slafa ma kar a dərka na dakay, si la kam na andza ma dərkana na.

⁹ Pas andza la bəle ahiya, ama kuray gədaŋ ahiya na, la da wuiya. Nəkafama, me ɗuley mey la na hərway kwar na, neney: ma kuray ka kam haya ahiya lele.

¹⁰ Hərway i ma wimdukuraɓa neney i dəreŋ ta kuray mba na, ma aza i ka da husaɓa ba na, i da tsada guma na da mey asləta ta gədaŋ ma Bay’ərlam, ma vəliyawa na ma gəlada tek ana, zləna, na ma mbəzlada na kakay.

¹¹ Ekəɗey tok na malam a ɗaw hay, ndzam da wuiya, kam meslərey ma ləmada vaw kwar lele, səmam vaw ka 'ar vaw kwar ana hay, dzəmam ɗay, ndzam da zozoy, arka na, Bay ma Bəla ma ma wuɗa vaw, ma zozoy a da ndzey ta kuray.

¹² Tsam guma a vaw ka 'ar vaw kwar ana hay, sərmam vaw da kokwoɗ. Ndaw Kokwaɗ ana hay tabiyaha ka tsadəməkuraɓa guma.

¹³ Hahaya ma Bay’ərlam Yezu Kriste ta ma wuɗa vaw ma Bay ma Bəla, ta ma dzəma vaw ma Mesəfrey Kokwoɗ ana, ka ndzam ta kuray tabiyaha.