2 Korintieŋ 11 - MEY HAYNA WAYNA MA YEZU KRISTE MA MEVEY

Pol na maslaŋ hayna dərka

¹ Ah! Hana ka ɓəsama 'ar me mbəɗey ɗaw nekəɗey na, ayaw, hayna ɓəsəmaya!

² I key səleŋ da mevel hərway kwar andza ma Bay ma Bəla. I ŋgəladakwar na a zel ana asləta dada. Ma da vəladakwar a Kriste andza dem slaw aha, ma zləɓaha kakay ana.

³ Ama i wesey na -andza ma gwavaŋ ma pafa wuiya ka Ev ta wewer aŋga na-, me dzeley 'ar a kwar a da zləgey ba dəreŋ ta ləfeɗeɗe ma kar a Kriste.

⁴ Akwa haɗaw andza ndaw ma daɓa tsəfəmey aha, ma tsakwar ka Yezu gəle ta na la ma tsəməkurawa ana na, dakay na haɗaw ka təɓam Mesəfrey gəle ta na kuray ma ndzafəmawa na, dakay na ka ŋgəlam Mey Wayna gəle ta na kuray ma ŋgəlam tsəfəmey ana, kuray na ka ɓəsama haɗa seŋgey.

⁵ Andza kafaya tek me hətsey ka yah ka maslaŋ ana ŋga na ɗuhwa na hay na, dakay kam!

⁶ Ma ndaraw me tsey guma na, ayiwa, Naŋgərhay a key, ama da me sərey tek na, na ŋga na na, tek gəle. Akwa na, da tek hay tabiyaha, da ndaw hay gəle gəle na, i ka ɓadəmakwar ba.

⁷ Yah ta ’ar a ɗaw ana i ma mada vaw ɗaw bəza ha, ma kuray ka gəlam na, malay ɗaw? Da i ma tələkadakwar mey ta Mey Wayna ma Bay ma Bəla ma haya ha na.

⁸ I pasləɗata sa ma Egliz a sana hay, i təɓawa tek me zəmey ka taya, ma da kadakwar mber.

⁹ Andza ma ndzawa ɗaw da 'ay kwar, tek ma hətsaya na, kwa i ka zəmey merɓey ma ndaw kakay, andza malam hay ma səmawa da Masedowan na, ma da mbəɗafaya ka tek a ɗaw ma saya na hay na taya. Akwa na, i ka wuɗey me ndzey ka 'ar ma ndaw tikay, kwa ka mey ana na, i da wuɗey aha kakay təŋga.

¹⁰ Ta dərka ma Kriste da yah ana na, i ɓada: ndaw a da slafa ha ma kəzlada meŋgelekey ɗaw a neney da dala ma Akayi hay kakay.

¹¹ Ɗagay na hərway ma mey? Ma vəday i wuɗakwar kakay ɗaw? Bay ma Bəla na a sərada!

¹² Tek ana i me key ana na, i da ka satsa, ma i ka kəlada guma ma ndaw ma wuɗam ma ŋgalakam waya la kal kal ana hay ba.

¹³ Ndaw ana ŋga na hay na, maslaŋ haya kakay ana hay, ndaw maləwaɗay hay, ma təradama vaw ta, andza maslaŋ ma Kriste ahiya.

¹⁴ Tek me rəzley ndaw da huɗa dakay: Sataŋ ana ta 'ar a ŋga na tekeɗe na, a tərada vaw ŋga andza madurlam ma waw me nəkey dey aha.

¹⁵ Ma gawla ma Sataŋ ana ŋga na hay me tərey gawla ma dzerey ahiya na ger aha kakay. Ma da ndəvey ta na na kalkal andza ma mber ata na.

Banay ma Pol me sey ana hay

¹⁶ I mada sa, ka da dzalam 'ar a mbəɗaya zlay. Dakay na, təɓama andza 'ar a mbəɗaya, ma i ka slafa ma ŋgelekey nekəɗey tiyatsa.

¹⁷ Guma ɗaw ana i ma da tsey na, i tsa na, andza ma Bay’ərlam kakay, amana, andza 'ar a mbəɗaya, i sərada ha i key na, i ka ndzefey tek me ŋgelekey.

¹⁸ Hərway ndaw hay haɗadzidzay a ŋgalakam aha ta me dzeley 'ar ma slaw vaw ta na hay na, yah tiyatsa na, i da ŋgelekey tey.

¹⁹ Kuray na, ka wuɗam ma ɓəsəmata 'ar me mbəɗey hay, kuray a neney ma dzalam 'ar hayna hay.

²⁰ Ka ɓəsama ka təradəmakwar beke hiya, ka pəɗəmakwar, ka kwasləɗəmakwar, ka rəsəmakwar, ka kələmakwar marawa ka tsakay sləmay.

²¹ I tsa ɗey na, a kandar hwaray, andza keley la ka kəmawa bəle ba. Ma ndaw a hay ma slafama me ləvey ana na -i tsa na andza ma 'ar me mbəɗey-, i wuiyada tiyatsa.

²² Taya Ebrew ahiya? yah ana tiyatsa! Bəzey ma Israyel ahiya? yah ana tiyatsa! Bəzey ma hwaɗ ma Abraham ahiya? yah ana tiyatsa!

²³ Ndaw me key mber ma Kriste ahiya? - i da tsey andza ma 'ar me mbəɗey - yah na i fənata! Da me yey vaw hay - i fənata. Da daŋgay hay- i ka daway ba dey haɗadzidzay i fənata. Ka kəɗəmaya ba dey haɗadzaidzay. Ma ləhawa da mey me memətsey - dey a key haɗadzidzay.

²⁴ Ka Zuif hay, i ka ndzefey me kəɗey ana har kokurow makar kava tsəfaɗ ana ba, dey zlam.

²⁵ Ma kəɗəmaya ta lagwada dey makar, dey asləta ma kwaytsəmaya ta ŋgwa. Dey makar kwambiwal ma ndəpadaya a yam. Dey pal i me vekey hway pas, kem meney ka ’ar ma yam.

²⁶ Ma daway tsəveɗ dəreŋ ta sek, zarra, i ləhawa gəreŋ gəreŋ da wayaŋ hay, i ləhawa gəreŋ gəreŋ da har ma katsala hay, i ləhawa gəreŋ gəreŋ da har ma malam a ɗaw Zuif ana hay, i ləhawa gəreŋ gəreŋ da har ma ndaw na Zuif ahiya kakay ana hay, i ləhawa gəreŋ gəreŋ da wuraw, i ləhawa gəreŋ gəreŋ da palah, i ləhawa gəreŋ gəreŋ ka 'ar ma bəlay, i ləhawa gəreŋ gəreŋ da har ma malam haya kakay ana hay!

²⁷ Ma yey vaw hay ta tsetseh, me rəzley ta dey zarra, may ta me hertey ta yam, sumaya zarra, memeɗ, tek ma hətsəmaya.

²⁸ Mandzara ma mbəslata sa na hay, me dewerey ɗaw ana ka pas ka pas ana, me dzeley ’ar a ɗaw ka Egliz hay tabiyaha na.

²⁹ Kendzey ndaw ana bəle ha, a kaya na i bəle ha tey, kendzey ka təɗey ba na, a ndalaya kambəlaɓa.

³⁰ Kendzey haɗaw me ŋgelekey na, i da pada meŋgelekey ɗaw na a bəle ɗaw.

³¹ Bay ma Bəla, Baba ma Bay’ərlam Yezu, ma pəsa mey aha ma kwoza ha na, a sərada na i ŋgəley kakay.

³² Da Damas na, Guverner ma bay ɗuhwa na Aretas, me pey sidzew hay ka mambaw ma wuraw, ma ka zəgəmaya.

³³ Amana, ma padəmaya a 'uwaŋ, ma harɗadəmiyawa ta masləkats ka zleɗ, ambay i ma ləhawa da har aŋga.