1 Tesalonisieŋ 5 - MEY HAYNA WAYNA MA YEZU KRISTE MA MEVEY

Ma hutada pas ma Bay Yezu

¹ Ka guma ma lam ana ta har ana na ma Bay’ərlam ma da mawa na na, malam a ɗaw hay, haya ka windəmkuraɓa dzay sakay.

² Kuray ana ka səradama mambay mambay aha, pas ma Bay’ərlam na, a da sawa na, andza ma mahal ta dəvaɗ.

³ Aza andza ndaw hay a da ləvam: «Neney na, bəla ma zozoy, me ndzey sef seffe ana!», arka tok na, dekeslef ma bezley ma tek ana ada hərɗafatərawa tok, andza ma me ndelemey ma safərawa ka ŋgwas da zləbeŋ, arka na, a da slafama ha me ləhey da huɗa kakay.

⁴ Ama kuray na malam a ɗaw hay, kuray na, kuray da ləvaŋ tikay, ma aza pas ana ka da safukurawa andza ma ndaw mahal tizlay.

⁵ Akwa na, kuray tabiyaha na, bəzay ma waw me nəkey dey hay, kuray bəzey ma rəpas hay, lakwa na, kwa bəzey ma dəvaɗ hay kakay, kwa bəzey ma ləvaŋ hay kakay.

⁶ Kəɗey tok na, ka da narakwama andza sa ma ndaw hay zlay, ama hayna ndzakwama tsekerkerre, ndzam mandzara me sey zom.

⁷ Ndaw ma naram ana hay na, a naram na ta dəvaɗ, ndaw ma wam ana hay na, a wam na ta dəvaɗ.

⁸ Ama lakwa neney ndaw ma rəpas hay na, ka da sakwama zom zlay, kəlakwama zana ma mbal, na ma 'ar me pey ta ma wuɗa vaw, mbəram daw, na ma me pey dey a me buwey.

⁹ Hərway Bay ma Bəla a kandukurawa na, ma aza mevel ka da tsar ka lakwa kakay, amana, ma i ka da ndzafakwama me buwey, ta har ma Bay’ərlam a lakwa Yezu Kriste,

¹⁰ me mətsey hərway lakwa, ma aza kendzey andza lakwa ta dey, dakay ma nara hiya na, la ka ndzakwama tok na, ma dzəma hiya ta ŋga.

¹¹ Ekəɗey hərway ma mey na, mam 'ərev a vaw ka 'ar vaw kwar ana hay, gəladama vaw ka 'ar vaw kwar ana hay, andza na a kama ha na.

Me həley bəzay ta me tsey guma madakwaydok ana

¹² La tsəhafəmakwar ŋgey malam a ɗaw hay, hayna ɗəmatar ndaw a ndaw hay na da walaŋ a kwar, ma vəladama vaw ta, ma yam vaw, ma nəkafəmakwar dey da mezəley ma Bay’ərlam, ma tsəmakwar guma a 'ar ana hay.

¹³ Hayna hasəkadəmatara bəzay haya haya, da ma wuɗa vaw kavəday ma meslərey ta, ndzam da zozoy ka 'ar vaw kwar ana.

¹⁴ Malam a ɗaw hay, la həladəmakwar bəzay, hayna tsəmatar kava a ndaw me dzedzəvey mey so na hay, səmadəmata ndaw andza gədaŋ ma hətsatar ana hay, dahəmata ndaw bəle na hay, safəmata yam ka ndaw hay tabiyaha.

¹⁵ Wam daw ka vaw, hayna kwa ndaw ka da madara gandaf ma ndaw zlay, ama səpam ka pas ka pas na, me key hahaya da walaŋ a kwar hərway ma ndaw hay tabiyaha.

¹⁶ Ndzam ka pas ka pas na da wuiya,

¹⁷ ɗulam mey mandzara ka mətsakwar har.

¹⁸ Da tek waray waray na, madəmara sise, hərway tek ma Bay ma Bəla me wuɗey ka kuray da Kriste Yezu na, ŋga ha.

¹⁹ Ka da mətsadama Mesəfrey zlay.

²⁰ Ka da rəsəmata guma ma ndaw sek hay zlay.

²¹ Sasəkamata tek hay tabiyaha, wafəmata vaw ka na hayna hay.

²² Ndzam tsakazlak, dəreŋ ta me səpey tek haya kakay ana hay tabiyaha.

²³ Hayna Bay ma Bəla ma zozoy ana ta 'ar aŋga na, ka təradakwar kərem kokwoɗ ahiya, arka aza na, mesəfrey kwar, mezek a kwar, ta tapay ma vaw kwar, ka da ndzam ma wa vaw aya, mandzara meŋgəsey, mandzara me ŋgəley bəzay, ta pas ma da sawa ma Bay’ərlam lakwa Yezu Kriste.

²⁴ Ndaw ana ma zəlakwar ana na, a mbəɗar sler a guma ŋga tikay, a da ka tek ana na, ŋga na satsa.

²⁵ Malam a ɗaw hay, ɗulam mey hərway la tiyatsa.

²⁶ Tsadəmatara guma a malam hay tabiyaha na, da ma surma vaw, da kokwoɗ.

²⁷ I təkakwar ɗay da Bay’ərlam: hayna ka dzaŋgaɗəmatara ɗeriwel a neney a malam hay tabiyaha.

²⁸ Hayna hahaya ma Bay’ərlam a lakwa Yezu Kriste ka ndzey ta kuray!