1 Tesalonisieŋ 3 - MEY HAYNA WAYNA MA YEZU KRISTE MA MEVEY

¹ Arka satsa na, andza la slafama sakay na, ŋgama la ma dzalama na, ŋgama la ka ndzam tek ala makəra la da Aten,

² arka la ma sləradəməkuraɓa Timotey, malam ala, ndaw ma key mber ma Bay ma Bəla da me tələkey mey ta Mey Wayna ma Kriste, ma ka makwar 'ərev, ka səmadakwar da me pey 'ar a kwar,

³ ma ndaw ka da təɗey ta dəba da walaŋ ma tek me həley suwet ekəɗey ana hay zlay, hərway kuray ana ka səradama haya hayaha, lakwa ma kaya na kava.

⁴ Andza la da 'ay kwar mba na, la ka tsəmakwar ba, ka da ɓəsam tek ma həlafakwar suwet ana hay, ma sawa ekəɗey ana na, tek ana tok seŋgey, kuray ana ka səradama.

⁵ Ma vədiya tok na, andza i ɓəsa sakay na, i ma sləraɓa ndaw ka ɓadiyawa me pey 'ar a kwar, da me wesey na ndaw me petəney ndaw ka da pətənakwar ba na, ma me yey vaw la ka da zəɗey tedehe zlay.

⁶ Ekəɗey na, Timotey ka husawa ba da 'ay kwar ka tsakay la, ka ɓadandar mey ma me pey 'ar a kwar ba, ta ma wuɗa vaw kwar, a ləvey na, waya, ka sərafəmandar aha zarra haya hayaha təŋga, kuray ka wuɗam ma da nəkəmandəraɓa, andza la ma wuɗam me dzeley ma da nəkəməkurawa na sa tey.

⁷ Kəɗey tok ŋgey malam hay, kuray ka səmadəmandar ba, kuse ma me pey 'ar a kwar da walaŋ ma tek ma sandar vaw ana, ta tek ma həlafəmandar suwet ana hay.

⁸ Arka ekəɗey ana na, la səfram aha ka dəba, hərway ma mey na, kuray ma ndzaya gədaŋ ahiya da medzəmey vaw kwar ta Bay’ərlam.

⁹ La da madəmara sise a Bay ma Bəla hərway kwar ana na hadzəgay? Kavəday ma wuiya neney tabiya ha la ma kam hərway kwar ana, ka slam dey ma Bay ma Bəla a lakwa na.

¹⁰ Andza la ɗulam aha mey dəvaɗ ta rəpas aha dzay, mandzara ka mətsandar har na, ma la ka ndzafam bəzay ma da nəkəmkurawa sa, ma la ka da ndakadama tek na me hətsey, da me pey 'ar a kwar ana.

¹¹ Hayna Bay ma Bəla na ta 'ar aŋga na Baba lakwa, ta Bay’ərlam a lakwa Yezu ka kəsadandəraɓa ka tsəveɗ ma daɓa ’ar 'ay kwar ana.

¹² Hayna Bay’ərlam ka gəladərawa, ka səkadərawa ma wuɗa vaw ana, kuray ma wuɗam vaw ka 'ar vaw kwar ana hay tabiyaha na, ka nəkey andza ma wuɗa vaw la ma wuɗəmakwar ana.

¹³ Hayna ka makwar mevel da mendzey kokwoɗ aha, mandzara me ŋgəley bəzay ka slam dey ma Bay ma Bəla Baba lakwa, ta pas ma ma da sawa ma Bay’ərlam lakwa Yezu, ta ndaw aŋga kokwoɗ ana hay tabiyaha.