1 Tesalonisieŋ 1 - MEY HAYNA WAYNA MA YEZU KRISTE MA MEVEY

Me tsey guma ta ma səra vaw

¹ Yah Pol, Silveŋ ta Timotey, a Egliz ma Tesalonisiyeŋ hay, na da Bay ma Bəla Baba, da mezəley ma Bay’ərlam Yezu Kriste. Hayna hahaya, ta zozoy ŋga ka ndzey ta kuray.

Me pey 'ar ma Tesalonisiyeŋ hay ma Mey Wayna

² La madəmara sise a Bay ma Bəla zarra hərway kwar tabiyaha, kendzey andza la sləfəmakwar da me ɗuley mey la hay na.

³ La sərafama ka me pey 'ar a kwar da tek a kwar ma kam, da ma wuɗa vaw, da ma vəlada vaw me key viya hərway ma ndaw hay, da me pey dey kwar ta matanduroŋ aha, da Bay’ərlam a lakwa Yezu Kriste, ka slam dey ma Bay ma Bəla Baba lakwa.

⁴ Səradama haya haya malam a ɗaw na Bay ma Bəla ma wuɗata na hay, ŋga na ka gaɗəmakwar ba.

⁵ Akwa na, ma teləkawa mey la ta Mey Wayna da ’ay kwar ana na, me yey mey tedehe tsa kakay, amana, ta ma slafa, ta me dzəney ma Mesəfrey Kokwoɗ ana, ka ndaslam ba mambay aha. Kəɗey na kuray ana ka səradama, tek ana ma safandərawa da’ay kwar ana kavəday kwar ana.

⁶ Kuray na, kuray ka tsam dey ba ka la ta Bay’ərlam, ha ŋgəlama Guma na ba da viya kambəlaɓa na, ta wuiya ma Mesəfrey Kokwoɗ ana:

⁷ kəɗey na, kuray ka təram ba tek me tsey dey aha kava, ma ndaw me pey 'ar hay tabiyaha da Maseduwan ta Akayi.

⁸ Ma zlar da 'ay kwar na, akwa guma ma Bay’ərlam a tsəney ba, da Maseduwan ta Akay dada kakay, amana, mey ma me pey 'ar a kwar ka Bay ma Bəla, ka pey mey ba haɗadzidzay ka waray ka waray, ma la ka tsam kava dzay sakay.

⁹ Hərway kwa way way a təkərey, a tsey aha ka la, ka ŋgələmandar na teŋgey? arka, ta me mbəɗey dey kwar ’ar ’ay Bay ma Bəla arka ta ma mbəɗar dəba kwar a ’ərlam so na hay, ma da kar mber a Bay ma Bəla ta dey ana, dərka na.

¹⁰ Ma da hutey Bəzey ŋga ma sawa da 'ərlam ana, ŋga ma mbəladərawa da walaŋ ma ndaw ma mətsa na hay, Yezu na ma buwandukurawa da me tsey mevel ma da sawa na.