1 Piyer 3 - MEY HAYNA WAYNA MA YEZU KRISTE MA MEVEY

Mendzey ma ŋgwas ta zel andza ndaw ma Kriste ana hay

¹ Ŋgwas hay, kuray na andza ha satsa, tsənəmatar sləmay a zel a kwar hay, ma aza kwa ndaw ana a wuɗey me pey 'ar ka guma na kakay na, ka tsafama dey mandzar guma, ta mendzey kwar hayna, kuray ŋgwas ata na hay,

² da ma nəka mendzey kwar tsəzlakka ana, ta me ɗey ndaw a a vaw ana.

³ Tek me ləmey vaw kwar hay ka kam na ta bəla dada zlay: 'ar ma tərɗa ha, tek ma wuiya ma gura, ta zana mambay ana hay tsa zlay;

⁴ ama ka key na, me ləmey vaw hayna ma kəzla ha da mevel ana, tek ma wuiya na me ŋgəsey kakay ana, da me dzeley 'ar ləfeɗeɗe na, da zozoy ana, na andza tsekeley ana ɗuhwa ha ka slam dey ma Bay ma Bəla ana na, ŋga ha.

⁵ Ŋgwas a hay zlezle kokwoɗ ahiya, ma pəmawa 'ar ka Bay ma Bəla, a tsənəmatərawa sləmay a zel ata hay, a ləməma vaw na andza ha:

⁶ andza ma Sara ma tsənar sləmay a Abraham, a zəla na Ŋgalaka ɗaw, kuray a neney ma təram dem aŋga hiya da hahaya kwar me key ana, kwa mandzara zluwer ma tek ka həɓakwar 'ar.

⁷ Kuray zel ana hay, andza ha atsa, ndzama mendzey kwar ana ka masləta ha na na, hayna sərafəmata ka bəle ma vaw ma ŋgwas a kwar hay; ɗəmatar ndaw a vaw, hərway ka da zəmama hahaya me mendzey na, kamasləta ha, ma aza tek ka da tsada metsembeɗ ta ma ɗula mey kwar zlay.

Mendzey da ma wuɗa vaw andza malam hay

⁸ Arka tok na, me dzeley 'ar a kwar ka key na asləta, sam yam ka vaw, ndzam ta malam aya da ma wuɗa vaw, ndaw hay ka kəmakwar da vaw, təram ləfeɗeɗe.

⁹ Ndaw ka kakwar tek haya kakay ana ba na, ka da madəmara ke sele zlay, dakay ka tsaɗakwar ba na, ka da madəmara me tseɗey ana ka sele zlay; dzadzak na, pəsafəmata mey, hərway a zələməkurawa na kava, ma aza ha da ndzafam me pəsey mey tey.

¹⁰ Akwa ma winda ha na: ndaw ana a wuɗey mendzey, ma nəkadata pas ma wuiya hay na, ka wafa vaw ka erneh a ŋga ka guma hayakay ana hay, ta tebeləmey ŋga ka guma me zləgey ndaw ana hay

¹¹ ma mbəɗar dəba a tek haya kakay ana, me key tek hayna, me səpey zozoy, ma səpar bəzay,

¹² hərway dey ma Bay’ərlam na, ma pa ha ka ndaw dzerey ana hay, sləmay ŋga ma pa ha, ka ma ɗula mey ta; ama Bay’ərlam na a mbəɗatar takwar a ndaw ma kam tek haya kakay ana hay.

Me key matanduroŋ da tatakway

¹³ Ma da kakwar tek haya kakay aha na way, kendzey andza ka ɓadama ha vaw kwar hatsatsa ka me key tek hayna na?

¹⁴ A fəna satsa na, ka key ba, azlakwa ka da kam tsetseh na hərway ma dzerey na, na ŋga na na, kuray da wuiya. Kwa ka da wasadəmata zlay, ka da pəslakwar 'ar zlay;

¹⁵ amana səmbərama da mevel a kwar: Kriste na ŋga Bay’ərlam aha. Ndzam ka pas ka pas na, ma həla vaw ahiya, ma ɓada me pey dey kwar, ka slam dey ma ndaw ma da tsəhafəmakwar ana hay.

¹⁶ Ama ka key na da ləfeɗeɗe ta me ɗey ndaw a vaw, da me dzeley 'ar hayna, ma aza ka guma na ma tsafəmakwar haya kakay ana hay na, ka mendzey kwar hayna da Kriste na, da har ana deŋge na, hwaray ka katar.

¹⁷ Hərway hayna, ŋgama me key tsetseh da me key tek hayna, haɗaw andza ma me wuɗey ma Bay ma Bəla na, ta neney me key tek haya kakay ana na.

Da me memətsey ma Kriste a me zəgey 'ar ma sleɗ aŋga

¹⁸ Akwa na, Kriste na ta 'ar aŋga ka mətsey ba hərway ma meŋgəsey hay dey asləta ma tur dey, ŋga ndaw dzerey ana, hərway ma ndaw dzerey kakay ana hay hay, ma aza ka da ɓadakwar a Bay ma Bəla, ŋga aŋga na ma kəɗama da slaw vaw aŋga na vagay aha na, amana ka madərawa ba a mesəfrey, ta gədaŋ ma Mesəfrey Kokwoɗ ana.

¹⁹ Arka tok na, kwa a ndaw ma tsəvay ma Marta hay tekeɗe na, ka daway ka tələkadərawa mey ba,

²⁰ a ndaw ma tsənamar sləmay kakay ana hay zlezle na, andza Bay ma Bəla a par aha dey a Noey, a ləmey aha kombiwal aŋga mba na, ma da daw a huɗa na ndaw nekəɗey, ndaw tsakar dada ma da ləhey da mey ma yam ana na.

²¹ Na ŋga na na, mey ’ərdey ma me dzuhəɓey ma buwakwar ekəɗey ana: ŋga na me bəzləmey luweɗ ma slaw vaw dada kakay, amana, ma vəladara vaw ŋga a Bay ma Bəla, da me dzeley 'ar hayna; a buwakwar ta ma mbəlawa ma Yezu Kriste,

²² na ma daway təŋga a 'ərlam, me ndzey ta har zəmay ma Bay ma Bəla, arka a watar 'ar a madurlam hay, a bay hay, ta ma slafa hay.