1 Piyer 2 - MEY HAYNA WAYNA MA YEZU KRISTE MA MEVEY

¹ Arka tok na, andza seweɗ, wewer, me ndzey 'erneh da mey tsew, tek me sey ta me ŋgəley bəzay na, kuiyadəmata ba tabiya ha.

² Kal kal andza na ma wawa gwendez ahiya na na, wuɗam na 'uwa tsəzlakka ana ma Guma, ma aza ta ŋga na, kuray ka da gəlam a me buwey,

³ haɗaw ha ndzəkama Bay’ərlam ba, a tsəray na!

Ŋgwa na ta dey ana ta səkway na kokwoɗ ana

⁴ Da ma gurey kwar ka tsakay ma Yezu, ŋgwa na ta dey ana, na ndaw hay ma kəladama ba na, amana, Bay ma Bəla ka gaɗəma ba, hayaha bəza kakay.

⁵ kuray ana na, andza ŋgwa ta dey ana hay, fuləkwam a me zley ma ’ay ma mesəfrey ana, ma da tərada səkway kokwoɗ ana, ma baba me key kuley ahiya, ma da kar kuley ta mezek, na ma dar 'ar a Bay ma Bəla ana, ta har ma Yezu Kriste.

⁶ Hərway a ndzafama da Mewindey Kokwoɗ ana hay na, andza neney: nəkafama i pey ŋgwa ma mede da Siyoŋ, i ma wala, hayaha bəzakakay, arka ndaw ana ma pada 'ar aŋga ka ŋga na, a da pamar aha hwaray a dey kakay.

⁷ A kuray ndaw me pey 'ar ana hay tok na, ma hasəka bəzay; ama ndaw me pey 'ar tikay ana hay na ŋgwa aŋga na ndaw me zley 'ay hay ma kəladəmarawa ba na na, ka tərey ba ŋgwa ma telkwemere aha,

⁸ Arka satsa na, ŋgwa me tsey metsembeɗ aha, hwatakwam me təɗey ndaw. Taya a tsadama metsembeɗ mavəday a wuɗam ma pam 'ar ka guma ma Bay ma Bəla kakay, hərway taya ma kaya na kava təŋga.

⁹ Ama kuray na, kuray da me Səmbərey ma gaɗəma na, gwalay ma baba me key kuley ma 'ay Bay, ndaw ma dala kokwoɗ ana hay, səkway na ma vəla ha ma Bay ma Bəla na, ma kuray ka tələkadama mey ta tek ma ka hiya ɗuhwa hiya na hay, ma Ndaw ma zələkurawa da ləvaŋ, a waw me nəkey dey haya bəza kakay ana,

¹⁰ kuray a neney zlekete kuray ndaw ma səkway ŋga hay kakay ana hay, ama ekəɗey na, kuray ndaw ma səkway ma Bay ma Bəla ahiya; kuray a zlekete ma kamar davaw kakay ana hay na, ama ekəɗey na ka kamar da vaw kadəba.

Mendzey ma Kretieŋ hay da walaŋ ma ndaw Zuif ahiya kakay ana hay

¹¹ Kuray a neney i ma wuɗakwar bəzakakay ana hay, i həladakwar bəzay na, hayna mbəkadama tek me sey ma slaw vaw na, ma kar vərom a mezek ma vaw ana, kam andza ma mbəlak hay, ta ndaw na a dawam aha tek ata na hay.

¹² Hayna mendzey kwar ka nəkey mambay aha da walaŋ ma ndaw Zuif ahiya kakay ana hay, ma aza ka slam ana andza a ŋgələmakwar aha bəzay, andza a ndaw me key tek haya kakay ana hay na, tek a kwar me key hayna hay ka ɓatar waw, ma ka da səmbərama Bay ma Bəla, ta pas ma ma da sawa ŋga.

Ma tsənatar sləmay a ndaw me wey ndaw ana hay

¹³ Hayna tsənəmatar sləmay a ndaw ma paya ka bəla na hay, hərway ma Bay’ərlam: kendzey agəna a bay, hərway ma bay ŋga me key,

¹⁴ dakay na a guverner hay, zləna ma sləradatərawa na bay ana ma da hətata ndaw me key tek haya kakay ana hay, arka ka da səmbərəmata ndaw me key tek hayna hay.

¹⁵ Hərway andza ma Bay ma Bəla me wuɗey ana, ma da key tek hayna na, ka wuɗəmatara mey a dəla ma ndaw ma səradama 'ar kakay ana hay.

¹⁶ Ndzam na andza ndaw ma war 'ar a vaw ta na hay, mandzara ha kəzladama dey, ma kuray ka fiyadama ndaw ta me wey 'ar a kwar ana hana ma seweɗ zlay, ama ndzam na andza ma gawla ma 'ay ma Bay ma Bəla hay.

¹⁷ Ɗəmatar ndaw a ndaw hay tabiyaha, wuɗəmata malam a kwar hay, wasadama ta Bay ma Bəla, ɗamar ndaw a bay.

Mber ma beke hay ka slam dey ma Miter ata

¹⁸ Beke hay, tsənəmatar sləmay a Miter kwar ana hay na, ta me wesey aha, ana kokwoɗ ana ta na ləfeɗeɗe na hay dada kakay, amana ta na me ndey kakay ana hay dzay.

¹⁹ Hərway me ɓəsey tek ma ndaw ma kaka haya kakay aha ka seweɗ, hərway ka wuɗey ma tsənar sləmay a Bay ma Bəla na, na ŋga na na, hahaya.

²⁰ Akwa kendzey a kəɗəmaka na ka malay ɗek na, a da hasəkadəmaka bəzay na ka na waray? Ama haɗaw a dəba ma tek a ɗek me key hayna na, ka sama banay ana na ta me zəgey mevel ha, na ŋgana na, hahaya ka slam dey ma Bay ma Bəla.

²¹ Arka azlakwa a zələməkurawa na kava tok, hərway Kriste ana tiyatsa na, ka kawa tsetseh ba hərway kwar, ma mbəkakwar tek me tsey dey kava, ma ha səpama slam sek aŋga:

²² ŋga aŋga na ka ŋgəsey tikay ana, da huɗa mey ŋga na, ndaw ka ndzefey maləwaɗay dakay ana;

²³ ŋga aŋga na ma tsaɗama na, amana ka tseɗey ka sele tikay, da tsetseh aŋga na, ka gwaguvey ndaw tikay, amana, ma vəladara vaw na, a Ndaw me key sariya dzerey ana;

²⁴ ŋga na ta Bay 'ar ma vaw ŋga na na, ma zəga meŋgəsey lakwa hay ka 'ar ma tuwaw, ma aza lakwa ma mətsaya ba da meŋgəsey lakwa hay na, i ka da ndzakwama da dzerey; ŋga aŋga na mbəlek aŋga hay ma ndaladakwar ana.

²⁵ Hərway akwa na, kuray ma zəɗaya tsoy andza təɓaŋ hay, ama ekəɗey na, kuray ka mbəɗam dey tsoy 'ar a 'ay ndaw me tsukurey, ndaw me nəkey dey ka mezek kwar ana hay.