1 Korintieŋ 9 - MEY HAYNA WAYNA MA YEZU KRISTE MA MEVEY

Pol ma mbəkada tek aŋga me ndzefey da maslaŋ

¹ I wa 'ar a ɗaw kakay ɗaw? I maslaŋ aha kakay ɗaw? I ka nəkada Yezu, Bay’ərlam a lakwa kakay ɗaw? Da mezəley ma Bay’ərlam na, kuray na tek ma merɓey ɗaw hay kakay ɗaw?

² Kendzey ka ndaw sa na hay i kafata na i maslaŋ kakay na, ama ka kuray dada na, i maslaŋ aha. Hərway da mezəley ma Bay’ərlam na, kuray na, zeheɗ ma mber a ɗaw hay kakay ɗaw?

³ Mey me dzəŋgərey ka vaw ɗaw, ka ndaw ma ŋgəlafəmaya na hay na neney:

⁴ Tsəveɗ ala daha ma slafa me zəmey tek, me sey yam na, dakay ɗaw?

⁵ La slafama me zəgey ŋgwas kretieŋ aha ka bəzay andza sa ma maslaŋ ana hay, malam ma Bay’ərlam Yezu ana hay ta Sefas tikay ɗaw?

⁶ Yah asləta ta Barnabas dada la slafama me ndzey mandzara ka kam mber na, sey la makəra la ɗaw?

⁷ Ɗaɗa ndaw ka key mber ma sodzey ba, ta tek ma dey har aŋga na na, daha ɗaw? Ɗaɗa ndaw ka key ley ma viŋe ba, mamdzara ka zəmey bəzey ŋga na ɗaw? Dakay na ndaw a tsukurey welde na mandzara ka sey 'uwa ma welde na ɗaw?

⁸ Neney na, guma ma slaw vaw tedehe, tsukuɗu Mewey a ləvey na andza ha atsa kakay ɗaw?

⁹ Akwa na, ma winda ha da Mewey ma Moiz na, andza neney: «Kendzey sla a ndərsley aha daw na, ka da radara mey zlay.» Sla hay na a kamar da 'ar a Bay ma Bəla ɗaw?

¹⁰ tsukuɗu a tsəmərawa andza ha na, na ŋga la makəra la ɗaw? Ayaw, a windəmərawa na hərway la, ndaw ma həvey na, a dafa na ka pey dey, ndaw me kəzley a dafa na hayna ka pey dey ma da ndzefey ma ŋga ba da huɗa.

¹¹ Haɗaw la ka sləkəməkurawa zleley ma Mesəfrey ba na, la ka ndzafadəmərawa zleley ma har akwar na, a kafakwar na haɗa ɗaw?

¹² Haɗaw ndaw sa na hay na, a yəmam da slam har ana ŋga na na, azlakwa la dzadzak tikay na ka mey? Ama tok na, la ka wuɗam me yəmey da slam har ana ŋga na tikay. La dzadzak na, la ɓəsəmata tek hay tabiyaha, ma la ka da kam tek kwa asləta ma tsada metsembeɗ ta Mey Wayna ma Kriste zlay.

¹³ Ka səradama ndaw me key kuley hay na, ma vəlatar tek me zəmey na, 'Ay me key Kuley. Ndaw ma kam mber ka ŋgwa ma kuley ana hay na, a ndzafam da tek ana ma kadama kuley ana kakay ɗaw

¹⁴ andza ha satsa na, Bay’ərlam ma vəlatar slam har a ndaw ma taləkadama mey ta Mey Wayna na hay na, ka ndzam na ta Mey Wayna na tey.

¹⁵ Ama yah na, i ka wuɗey me yəmey da bəzay ma slam har a neney tikay, i windaɓa ɗey na, kəla ma me tsəhey tek kakay. Ŋgama i ka mətsey! Guma ma meŋgelekey ɗaw a neney na, ndaw aslafa ma təɓadaya ba tata dakay.

¹⁶ Hərway me tələkey mey ta Mey Wayna na, ka yah na, guma ma meŋgelekey da huɗa dakay, hərway a i taləkada mey na ma mbarga ma zay. Haɗaw i tələkada mey ta Mey Wayna sakay na, i ka tuway vaw ɗaw!

¹⁷ Hana na i key na ma 'ar a ɗaw ana na, na ŋga na na, slam har a ɗaw ma ndzafada tek ma merɓey daha; ama i ka ma mbarga ma zay na, mber ana ma vəla ha na na ŋga ɗaw.

¹⁸ Andza masa ɗaw ana na, mey tok? Masa ɗaw ana na, ma vəladatara Mey Wayna a ndaw hay ma haya ha, mandzara i ka yəmey da bəziya da slam har ana Mey Wayna ma vəlaya na.

¹⁹ Ayaw, ndaw ma waya na, dakay, ka slam dey ma ndaw hay tabiyaha na, ama i ma tərada vaw ɗaw na, beke ma ndaw hay tabiyaha, ma i ka ndzefey ndaw hay haɗadzidzay.

²⁰ I ma ndzawa ta Zuif hay na, kal kal andza i Zuif aha; ma i ka ndzafawa Zuif hay; ta ndaw mewey ma wata na hay na, i ma kada vaw andza ma ta tey, -ama azlakwa zlay yah na ta ’ar a ɗaw ana na, andza ha kakay-, ma aza i ka da ndzafawa ndaw Mewey ma wata na hay.

²¹ Ta ndaw Mewey ta dakay ana hay na, yah kal kal andza mewey ɗaw dakay tey, -azlakwa zlay yah na ndaw mandzara mewey ma Bay ma Bəla ha kakay, zləna Kriste na, mewey ɗaw aha- ma aza i ka ndzafawa ndaw Mewey ta dakay ana hay.

²² I ka wanəkadama bəle ma ndaw bəle na hay ba, ma aza i ka ndzafawa ndaw bəle na hay. I ma kada vaw ɗaw teŋgey teŋgey na, ma ndaw tabiyaha, ma dakay dakay na, dey ta kava i da ləhawa ha ndaw hay ba nekəɗey.

²³ Tek a neney hay tabiyaha i kata na, kavəday ma Mey Wayna, ma aza i ka ndzefey da huɗa tey.

Ndaw me key waway hay

²⁴ Ka səradama kakay ɗaw? Ndaw ma hway hay ka dala ma wasa na, a hwam na tabiya ta ahiya, ama ma da tsey mey na ndaw asləta kakay ɗaw? Hwam tok, ma kəla ha da tsam mey.

²⁵ Ndaw ma hwam tabiya ha na, a həladama vaw na haya hayaha, ma gərafata sa ma tek hay ba. Taya ma kam andza ha na, ma aza taya ka da ndzafadama gursam me ŋgəsey ana, na ŋga la na, gursam me ŋgəsey tikay ana.

²⁶ Yah na, i hway na andza neney: i hway na dah 'ar kakay; i kəɗey vaw na andza neney: i kəɗey na a batam kakay.

²⁷ I kada beke ta vaw ɗaw, i war ’ar a vaw ɗaw, me wesey na, i ka tələkadatara mey tsoy a sa ma ndaw hay tok na, ka da parzləmiyawa yah ana zlay.