1 Korintieŋ 8 - MEY HAYNA WAYNA MA YEZU KRISTE MA MEVEY

Slaw ma 'ar kuley ma vələmatar a ’ərlam so na hay

¹ Ka slaw ma sladəmatara a ’ərlam ma ndəra hiya ta har ana hay na, andza na kuray ma tsəmawa na na, tobiya lakwa ha ka səradakwa; kwa way way na a sərada, me sərey tek na, a zlemberey ndaw, ama ma wuɗa vaw na a gəley ndaw.

² Haɗaw ndaw a dzala da 'ar aŋga, waya i sərada tek na, a sərada andza na a dafa ŋga ka sərada na kakay.

³ Ama, haɗaw ndaw ana a wuɗa Bay ma Bəla na, Bay ma Bəla na a sərada ŋga na tey.

⁴ Kəɗey tok na, ndaw a slafa me pəɗey slaw ma gənaw ma sladəmatara a 'ərlam ma ndəra hiya ta har ana hay ɗaw? Ka səradakwa ha ’ərlam so na hay na a nafam kakay. 'ərlam mekele ahiya dakay, sey Bay ma Bəla ana asləta.

⁵ Kwa andza a ləvam 'ərlam hay daha da 'ərlam dakay ka dala na, - tek a hay ma zələmata 'ərlam ana hay na haɗa, bay hay haɗa-.

⁶ Na ŋga lakwa na, Bay ma Bəla na ŋga asləta, Baba: na tek hay ma bəmawa da ŋga na, na lakwa ma makwa a 'ay ŋga na, arka Bay’ərlam na ŋga asləta, Yezu Kriste, na tek hay tabiyaha a səfəram na ta ŋga na, na lakwa ma ndza hiya hərway ŋga na.

⁷ Amana, ndaw hay tabiyaha na, a səradama tek kal kal kakay, sa na hay andza ma bəmawa bəse da kuley ma ndəra hiya ta har ana hay, masəɗəkaya, a pəɗama slaw ana na, a kafata na, andza slaw ma kuley ma vələmatar a ’ərlam so na hay dərka na, arka me dzeley 'ar ata bəle ha na na, ka zləɓey tsoy.

⁸ Ma da guradakwar ka vaw ta Bay ma Bəla na tek me zəmey kakay, kendzey andza lakwa ka zəmakwa kakay na, a da madandakwar aha ta dəba kakay, kendzey lakwa ka zəmakwa ba na, a da tsəladandakwar aha ka mey kakay.

⁹ Amana, wam daw ka vaw da me wey 'ar a kwar a neney, ka da tərey tek ma təɗada ndaw bəle na hay zlay.

¹⁰ Hərway haɗaw a nəkadəmaka kah a neney, ma sərada tek ana, ka zəmey aha tek da 'ay me kuley ma ’ərlam ma ndəra ahiya ta har ana hay, tek a ɗek a neney ma dadaka ka mey ka mey ana na, a da dahəɗa ndaw a hana me pey 'ar aŋga me hətsey ana, me pəɗey slaw ma kuley ana hay kakay ɗaw?

¹¹ Arka kavəday tek a ɗek a hana ma sərada na na, ndaw bəle na ka zəɗey tsoy, malam aŋga na, Kriste me mətsey hərway ŋga na.

¹² Ta maŋgəsatar andza neney a malam a kwar hay na, ta ma ŋgəsadatara 'ar ata me dzeley bəle ha na na, kəɗey na ka ŋgəsamar na a Kriste.

¹³ Nəkafama, azlakwa hərway ma tek me zəmey a da təɗada malam a ɗaw ba na, ŋgama i ka mbəkada ba, i ka pəɗey slaw sazlay tabiyaha ta na i ma da təɗada malam a ɗaw na.