1 Korintieŋ 5 - MEY HAYNA WAYNA MA YEZU KRISTE MA MEVEY

Madama da Egliz

¹ A tsəney ka waray ka waray na, a ləvam, waya ndaw ka zləɓey ba da'ay kwar, me zləɓey na na, a gegərey ndaw, kwa tekeɗe ndaw Zuif ahiya kakay ana hay na, a kam aha andza ha kakay: a ləvam waya ndaw da walaŋ a kwar ka dzəmam ba ta ŋgwas ma baba ŋga.

² Andza ha tekeɗe na, re ka ŋgalakam sa! A dafa hana dzadzak na, kuray ka tuwam andza da 'ay vagay, ma kuray ka ɓəlama ndaw ana, ŋga na me key tek ana, ŋga na ba, da walaŋ a kwar.

³ Na ŋga ɗaw na, vaw ɗaw na ŋga ka tsakay kwar dakay, ama mesəfrey ɗaw na, ŋga ka tsakay kwar, i ka ka sariya na tsoy andza i daha, ndaw me key tek ana andza na ŋga na na,

⁴ ta mezəley ma Bay’ərlam Yezu, ta gədaŋ aŋga na, da har ma me kusey 'ar a kwar na, mesəfrey ɗaw ŋga daha da walaŋ a kwar,

⁵ ndaw andza na ŋga na na, ka vəladəmara a Sataŋ, ma ka zəɗada me dzeley ’ar aŋga ma slaw vaw ŋga na ba, ma aza mezek aŋga na na, a da buwama ta pas ma Bay’ərlam ma da mawa na.

⁶ Me ŋgelekey kwar ana na, a mbay kakay! Ka səradama tikay ɗaw, is ketekwəɗey na, a mbəslada hapa ma haləɓa ha tabiyaha kakay ɗaw?

⁷ Bazləma is gurma na ba ka vaw kwar, ma kuray ka təram hapa na ma haləɓa ha wayna, ma vəday kuray na, mandzara is ahiya. Hərway ma mey na, Kriste Pak a lakwa na, ka kadama kuley ba.

⁸ Kakwama magurlam tok, amana, ta is gurma na kakay, ta is ma seweɗ, ta na me key tek so lamba na hay kakay, amana, ta peŋ na mandzara is ana, da tsəzlakka ta dərka.

⁹ Da ɗeriwel a ɗaw ma windəkuraɓa na na, i ləvəkuraɓa na, kuray ka da dzəmam ta ndaw na ma tsəlam so na hay zlay.

¹⁰ I tsaɓa na, ka ndaw gədem, ka bəla neney ma tsəlam so na hay na hay kakay, dakay na ka mahal hay tabiyaha kakay, ka ndaw həzay ana hay tabiyaha kakay, dakay na, ndaw ma nam dəba a ’ərlam ma ndəra ta har ana hay kakay. Haɗaw andza ha na, sey ka bam ba da bəla neney!

¹¹ A ’ay! I windəkuraɓa na, ma kuray ka da dzəmam ta ndaw aŋga na, kwa andza a zəlama ŋga na malam da Yezu ana, amana haɗaw a tsəley so ha, dakay na mahal aha, a ney dəba a ’ərlam ma ndəra ta har ana hay, a tseɗey sa ma ndaw hay ana. I tsaɓa na ka ndaw ana me sey zom kambəlaɓa, dakay na a wuɗey sumkwo kambəlaɓa na, kwa ka da zəmam tek dzaya andza ndaw ana andza na ŋga na na zlay.

¹² Akwa ndaw ma 'ar bəla hay na, ma da kadatara sariya ta na na, yah ɗaw? Akwa a kam sariya na, ma ndaw ma veɗ 'ay hay kakay ɗaw?

¹³ Ndaw ma 'ar bəla hay na, ma da kadatara sariya na na, Bay ma Bəla. Andza ma winda ha da ɗeriwel kokwaɗ ana: kəladama ndaw seweɗ ba da walaŋ a kwar.