1 Korintieŋ 4 - MEY HAYNA WAYNA MA YEZU KRISTE MA MEVEY

Mendzey ma Pol ta Korintieŋ hay

¹ Hayna ka nəkafəmandar na, andza gawla ma 'ay ma Kriste hay, na andza guma ma dzerey ma Bay ma Bəla ma kəzla na hay, ma vəlaya da har ata na.

² Azlakwa tok na, tek na ma tsəhafama ka ndaw me nəkey dey ka tek ana na, ma ɓada vaw na a tsəney sləmay.

³ Na ŋga ɗaw na, kuray ka kadəmaya sariya ɗaw, dakay na, ndaw me key sariya ma bəla neney hay na, a kiyaɓa ha da 'ar tikay. Yah ana na, i kafa sariya ka bay ’ar ma vaw ɗaw ana kakay tiyatsa.

⁴ Mambaz ma vaw ɗaw ana a ŋgəlaya bəzay kakay, amana, ma ɓada i dzerey aha na, ŋga kakay; ndaw ma kadaya sariya ɗaw na, Bay’ərlam ana.

⁵ Akwa na ma har ana ka slawa tsaray kakay na, ka da kam sariya zlay, amba Bay ərlam ka sawa na. A da ɓafata waw ka tek ma kəzla ha da ləvaŋ ana hay, a da ɓada tek na ma kəzla ahiya da mevel ana hay. Arka na kwa way way a da ndzefey mesəmbərey ŋga, kassla ka tek aŋga me key, da har ma Bay ma Bəla.

⁶ Hərway kwar malam a ɗaw hay, i ma ɓada tek a neney ana ta ndaraw gəle, ma Apolos ta yah adzay, ma ha tsafama dey ka tek ala ma kam, ka səradama na, ha da həslam 'ar ta me ŋgelekey ka tsakay ma ndaw naŋgar a fəna ndaw naŋgar zlay.

⁷ Akwa na, ma təradaka ɗuhwa ha a fəna sa ma ndaw hay na way? Tek eɗek ana tabiyaha da har eɗek ana, andza kah me ndzefey kakay ana na, mey? Azlakwa kah ka ndzefey ba sana, ka ŋgelekey andza kah ka ndzefey kakay na, ka mey?

⁸ Kuray ekəɗey na, ma rəha hiya tsoy! Kuray ekəɗey na tsoy zleley ahiya! Mandzar la na, kuray ka təram ba bay ahiya! Kay! Azlakwa kuray bay ahiya dərka sana, lakwa ka kwakwama bay ahiya dzaya tiyatsa kwa!

⁹ Hərway i dzeley na, la maslaŋ hay na, Bay ma Bəla ka padandar ba ka slam madakwaydok ana, andza ma ndaw ma dzuwaya a memətsey ana hay: la ka təram ba tek ma wasa ma bəla me nəkey dey kava, ma madurlam hay ta sa ma ndaw hay.

¹⁰ La na, 'ar a mbəɗandar, hərway ma Kriste, ama kuray na, ka səradama 'ar da Kriste; la na bəle ahiya, amana, kuray na, gədaŋ ahiya, kuray na, a hasəkadəmakwar bəzay, ama la na, ma kəra hiya.

¹¹ Ka har a neney satsa na, may a tsafandar, la hartam ta yam, la tetez ahiya, a kadəmandar tatakway, la ma kalalaŋ ahiya.

¹² Arka na, la yam vaw me key mber ta har ala na hay. A tsaɗəmandar, la na, la pəsam mey, a kadəmandar tatakway, lana i ɓəsama tsa.

¹³ A ŋgələmandar bəzay, la na la bədəmata. La, ha ekəɗey na, andza kwaskwalay ma bəla, zay ma bəla gədem.

Tek ma kar da 'ar a Pol ana

¹⁴ I windadukuraɓa na, ma ka da pakwar hwaray a dey kakay, ama i kakwar ka ’ar ɗaf andza a bəzey ɗaw ma wuɗata na hay.

¹⁵ Akwa na, kwa kuray ka ndzafam ndaw ma kəsadakwar ka Kriste na hay gabal kurow tekeɗe na, baba kwar hay na haɗadzidzay kakay. Ta Mey Wayna na, ma yəkurawa na yah da Yezu Kriste.

¹⁶ Tek a ɗaw ma tsəhafakwar ekəɗey na, kam na kal kal andza na ŋga ɗaw me key ana.

¹⁷ I sləradukuraɓa Timotey, wawa ɗaw na i ma wuɗa haɗa da mezəley ma Bay’ərlam ana, ma tsənaya sləmay da mezəley ma Bay’ərlam ana na, mavədiya, ma aza ka madakwar me tetəkey ɗaw na ma kəsadaya da mendzey ɗaw ana ta Kriste, andza na i ma tatəkadara a ndaw hay ka waray ka waray da Egliz hay tabiyaha na.

¹⁸ Arka azlakwa sa ma ndaw sana hay na, nəkarafama andza i da maɓa a 'ay kwar sakay na, ma həsladama 'ar ata, ta me ŋgelekey.

¹⁹ Amana, i da maɓa da bəse ɗey a 'ay kwar ana, kendzey andza Bay'ərlam ka wuɗey ba na, i da tsənadərawa na guma ma ndaw ana ŋga na hay, ma ŋgalakam ana tikay, amana, ta tek ata ma kam ana.

²⁰ Hərway Slala ma Bay'ərlam na tek na me tsey ta mey dada kakay, amana, ta tek me key ana.

²¹ Ka wuɗam na, na waray? I ka daɓa ka tsakay kwar ana, ta lagwada ha da har tsutsuɗu, ta ma wuɗa vaw, ta Mesəfrey ləfeɗeɗe na ɗaw?