1 Korintieŋ 15 - MEY HAYNA WAYNA MA YEZU KRISTE MA MEVEY

Ma mbəlawa ma Kriste

¹ Malam a ɗaw hay, i madakwar Mey Wayna, na i ma ɓadukurawa na sa, na kuray ma təɓama, na kuray ma ndzaya ma tapaya kava na.

² Ta ŋga na, a da buwəmakwar, ka ndzey kuray ka padama ba a 'ar andza na ŋga ɗaw ma ɓadukurawa na na. Haɗaw andza ha kakay na, na ŋga na 'ar a kwar me pey na, na tedehe.

³ I ɓəkurawa tsəfmey aha na, tek na yah ana ma ndzafawa ta 'ar a ɗaw ana: Kriste a mətsey na, hərway ma meŋgəsey lakwa hay, andza ma Mewindey Kokwoɗ ana hay.

⁴ Ma padama a tsəvay, ŋga ma mbəlawa da meney ma makar, ana andza ma Mewindey Kokwoɗ ana hay.

⁵ Ŋga ma ɓar vaw a Sefas, arka a na kurow kava tsew ana hay.

⁶ Arka ma ɓatar vaw a malam hay a fəna temere zlam dey pal kamasləta ha, har avatar a sa na hay na, taya ta dey mba, sa na hay nekəɗey na ka mətsam ba.

⁷ A dəba na na, ma ɓar vaw a Zak, arka na, a maslaŋ hay tabiyaha.

⁸ Tsoy andza ma dakwaydok ana na, ma ɓaya vaw tiyatsa, a yah a neney ma pa ha te pey ana.

⁹ Hərway yah na, bəzaha da walaŋ ma maslaŋ hay tobiya, yah a neney akwa, i ɗa ndaw aha ka zələmaya maslaŋ a ha kakay zləna, hərway i ka kada tatakway ba ta Egliz ma Bay ma Bəla.

¹⁰ Ama i da key andza neney na, i da ndzefey na, sise ma hahaya ma Bay ma Bəla, hahaya ŋga ma kaya na na, ka tərey tek tedehe kakay. Dzadzak na, i ka key mber ba a fəna taya na tabiyaha. Me key na yah ana kakay, amana, hahaya ma Bay ma Bəla ŋga ta yah ana.

¹¹ Kəɗey na, a da key na yah, dakay taya na, tek ala na la ma tələkadama mey ana na, ŋga kəɗey, nəkafama neney na, tek a kwar ana ma pawa 'ar kava na.

Ma mbəlawa ma ndaw ma mətsa na hay

¹² Haɗaw a tələkadama mey Kriste ka mbəlawa ba da walaŋ ma ndaw ma mətsa na hay na, haya ha tok. Ana re ndaw hay da walaŋ a kwar, waya ma mbəlawa ma ndaw ma mətsa na hay dakay ana, teŋgey?

¹³ Haɗaw azlakwa ma mbəlawa ma ndaw ma mətsa na hay dakay na, na ŋga na na, Kriste na tiyatsa na, ka mbəlawa kakay.

¹⁴ Ana haɗaw azlakwa Kriste ka mbəlawa kakay na, na ŋga na na, me tələkey mey lana na tedehe, me pey 'ar a kwar a da key na tedehe satsa.

¹⁵ Kəɗey a da key na andza la na ndaw seydewe ma Bay ma Bəla malwaɗay ahiya na. Hərway kalkal andza la ka tsam malwaɗay ka Bay ma Bəla la ma ləvam, ka mbəladərawa Kriste ba, azlakwa zlay ka mbəladərawa kakay, haɗaw dərka na ndaw ma mətsa na hay a da mbələmawa kakay na.

¹⁶ Haɗaw azlakwa ndaw ma mətsa na hay a da mbələmawa kakay na, Kriste tiyatsa na, ka mbəlawa kakay atsa.

¹⁷ Arka haɗaw azlakwa Kriste ka mbəlawa kakay na, me pey 'ar a kwar na, a nefey kakay, kuray ma ndza hiya re da meŋgəsey kwar mba.

¹⁸ Haɗaw andza ha na zla da na ŋga na na, ndaw ma mətsam da mezəley ma Kriste na hay na, ma zəɗaya ba.

¹⁹ Haɗaw i pakwama dey ka Kriste na, ka mendzey ma bəla neney dada na, na ŋga na na, da walaŋ ma ndaw hay tabiya ha ka bəla na, ma zəɗaya, ɗohw na lakwa.

²⁰ Amana, a-ay, Kriste na, ka mbəlawa ba da walaŋ ma ndaw ma mətsa na hay, ndaw tsəfəmey ana da walaŋ ma ndaw ma mətsa na hay.

²¹ Ana azlakwa, haɗaw azlakwa memətsey a sawa na ta har ma ndaw ana asləta na, ma mbəlawa da walaŋ ma ndaw ma mətsa na hay, a sawa na ta har ma ndaw asləta tiyatsa.

²² Andza ma ndaw hay ma mətsam tabiyaha da mezəley ma Adam ana na, da mezəley ma Kriste na, ndaw hay tabiyaha a da ndzafam mendzey tey.

²³ Amana, ka membere ka membere: tsəfəmey aha na, Kriste ana, andza tek ma zlagwam me nəhey tsəfəmey ana, ma sawa a dəba na na, ndaw ma vəlaya ma Kriste na hay, da har ma da sawa ŋga.

²⁴ Arka a dəba na ma da sawa na, me ndəvey, andza a da madara Slala ŋga a Bay ma Bəla Baba, a dəba andza ka davasadata bay hay ba tabiyaha, mewey hay ba tabiyaha, ma slafa hay ba tabiyaha.

²⁵ Hərway haya ka key bay na, ha kasl ka padata ndaw dugwan aŋga hay ba tabiyaha, a huɗa sek aŋga ha ba ɗagay.

²⁶ Ndaw dugwan ana madakwaydok ma da davasada na na memətsey,

²⁷ hərway ŋga ka padata tek hay tsoy a huɗa sek aŋga. Ama andza ka da ləvey ba: «Tek hay tabiyaha ma waya tsoy» na, na ŋga na na, sey ma zarawa na, ndaw ma vələrawa gədaŋ ma wadata tek ana hay tabiyaha na.

²⁸ Andza ka da wata tek hay ba tabiyaha na, arka Bəzey ana ta ’ar aŋga na, a da vəladara vaw a ndaw ma vəladərawa tek hay tabiyaha, ma aza ka da key na, Bay ma Bəla na, ŋga ka 'ar ma tek hay tabiyaha, ta ndaw hay tabiyaha.

²⁹ Haɗaw azlakwa akwatay andza ha kakay na, ndaw ma dzuhəɓam hərway ma ndaw ma mətsa na hay, a səpam na mey tok? Haɗaw azlakwa ndaw ma mətsa ha a da mbəlawa ha sakay na, a dzuhəɓam vaw hərway ta na, ka mey?

³⁰ Azlakwa la na ta 'ar a la na zarra, la ŋgwahadama vaw a tek ma zəɗey ndaw na, hərway ma mey?

³¹ Ka pas ka pas i ma ŋgwaha vaw aha a memətsey, ayaw, i ɓadakwar dərka na, malam a ɗaw hay, kuray na, tek ma me ŋgelekey ɗaw da mezəley ma Yezu Kriste Bay’ərlam a lakwa.

³² Azlakwa a da nafaya na mey? Ha i ma kəɗawa vaw ta gənaw hay da Efez na, haɗaw i nəkey dey na andza ma slaw vaw dada na? Haɗaw azlakwa ndaw ma mətsa na hay a da mbələmawa kakay na, zəmakwa tek, sakwa tek hərway medew na, i da mətsakwa seŋgey.

³³ Ka da zləgam zlay, mandala haya kakay ana hay, a zləgadəmata ndaw ma səra 'ar ana hay.

³⁴ Bəmawa ba da mewey ma tur dey, ka da ŋgəsam sazlay! Hərway sa na hay a kam na, a səradama Bay ma Bəla kakay. I tsa ɗey na ka kakwar hwaray.

Vaw ma ndaw ma da mbəlawa na hay

³⁵ Amana, a da ləvam: ndaw ma mətsa na hay a da mbələmawa na teŋgey? A da mbələmawa na, ta vaw waray?

³⁶ Dəla! Kah ana, tek eɗek ma sləka na na, a da pətsawa na, sey a zey ba ɗagay kakay seŋgey.

³⁷ Arka tek eɗek ma sləka na na, ma pətsa ha ka vaw ta ɓaslah aha kakay seŋgey, amana, daw salay aha, dakay na tek mekelehe bəzey ŋga na tedehe seŋgey.

³⁸ Arka Bay ma Bəla a vəlar tapay ma vaw, andza ma ŋga me wuɗey ana, ka sləlay ka sləlay, gəle gəle ta na sa na hay.

³⁹ Ɗaɗa slaw vaw hay ka bəla ma nəkam asləta na, dakay, me weley ta na ka vaw na daha: ma ndaw ta na ma gənaw a dzəmam kakay, ma ɗiyeŋ hay ta na ma kəlef hay a dzəmam kakay.

⁴⁰ Vaw ma tek ma 'ərlam hay daha, vaw ma tek ma dala hay daha, a wazlam dey asləta kakay.

⁴¹ Me wezley dey ma pas gəle, ma kiya gəle, ma wurzla hay gəle; me wezley dey ma wurzla naŋgar satsa na, gəle ta naŋgar.

⁴² Ma dambəlawa ma ndaw ma mətsa na hay na, andza ha atsa, ma sləka ha na, ma za ha, a da mbələmawa na, a zey sakay.

⁴³ A sləkama na, a rəsama, a da mbəlawa na, a wezley dey. Ma sləka ha da bəle na, a da mbəlawa na, ma rəhaha ta gədaŋ.

⁴⁴ Ma sləka ha vaw ma gənaw aha na, a da mbəlawa na, vaw ma mesəfrey aha. Haɗaw vaw gənaw aha daha na, vaw mesəfrey aha daha tiyatsa.

⁴⁵ Ma winda da ɗeriwel kokwaɗ ana na, andza neney: «Adam ndaw tsəfəmey ana na, vaw ŋga na andza ma gənaw, a səfrey, Adam ma dakwaydok ana na, mesəfrey aha, a vəley mendzey.

⁴⁶ Ama tek tsəfəmey ana, tek na gənaw aha na, ŋga na, tek ma mesəfrey aha tikay, a sawa na, a dəba na.

⁴⁷ Ndaw tsəfəmey ana ma badəmərawa da hahay ana na, ndaw ma dala ha. Ndaw ma tsetsew ana na, a sawa da 'ərlam.

⁴⁸ Andza na ndaw ma dala ma ka ha na na, ndaw ma dala hay ma kaya andza ha tey. Andza na ndaw ma 'ərlam ma ka ha na na, ndaw ma 'ərlam hay ma kaya andza ha tey.

⁴⁹ Andza na i ma nəkakwama andza ndaw ma dala na na, i da nəkakwama andza ndaw ma 'ərlam hay tiyatsa.

⁵⁰ Nəkafama tek a ɗaw i ma ləvakwar ana, malam a ɗaw hay: slaw vaw ta mambaz na, a da slafama ha me zəmey Slala ma Bay'ərlam kakay, kwa tek na ma za ha na, a ndzey a veɗ ma tek ma zey kakay ana kakay.

⁵¹ I da ɓadakwar tek daha ma kəzla ha: ka da mətsakwa ha tabiyaha kakay, amana, a da təradəmandakwar tabiyaha gəle,

⁵² da mey asləta, kwa mendzey dakay, ka Me tsəney ma tolom ma dakwaydok ana. Hərway tolom a da tsəney, ndaw ma mətsa na hay a da mbələmawa mandzara ka zam, lakwa tey na, a da təradəmandakwar gəle.

⁵³ A dafa akwa na, vaw a neney me zey na, ka kəley na me zey kakay ana ka vaw. Vaw a neney me mətsey ana, ka kəley ka vaw na me mətsey kakay ana ka vaw.

⁵⁴ Andza vaw a neney me zey ana, ka da kəley na me zey kakay ana ba ka vaw; vaw a neney me mətsey ana ka da kəley na me mətsey kakay ana ba ka vaw na, arka na, guma ma Mewindey a neney Kokwoɗ ana hay a da ndaslam: «Memətsey na, ka ndama ba səɗak, ka zəgafama 'ar ma sleɗ ba.

⁵⁵ Memətsey, ma zəga 'ar ma sleɗ ana na, ŋga da may tok? Memətsey, sumbor eɗek ana na, ŋga da may tok?.»

⁵⁶ Sumbor ma memətsey na, meŋgəsey, masa ma meŋgəsey tey na, Mewey.

⁵⁷ Madəkwara sise a Bay ma Bəla ma vəlandakwar gədaŋ ma zəgada 'ar ma sleɗ, ta har ma Bay’ərlam a lakwa Yezu Kriste.

⁵⁸ Kəɗey tok na malam a ɗaw i ma wuɗata ana hay, ka da mam ta dəba zlay, ka da təɗam zlay, guram ka mey ka mey da meslərey ma Bay’ərlam, səradama me yey vaw kwar da mezəley Bay’ərlam na, tedehe kakay.