1 Korintieŋ 14 - MEY HAYNA WAYNA MA YEZU KRISTE MA MEVEY

Kuley ma ndaw ma Kriste hay ta na sa na hay

¹ Haya səpam na ma wuɗa vaw, mbəkadəmara vaw a ndaraw ma Mesəfrey, ɗuhw na, na ma tsada guma andza ndaw sek ana.

² Hərway ndaw me tsey guma ta mey gəle gəle na, a tsatar guma na, a ndaw hay kakay, amana a Bay ma Bəla. Ndaw ma tsənada guma ŋga na na, dakay. Mezek aŋga a tsey ka tek ma kəzla na hay.

³ Ama ndaw me tsey guma andza ma ndaw sek na, a tsatar na a ndaw hay: a gəladata, a tsatar guma a 'ar, a səmadata.

⁴ Ndaw me tsey guma ta mey gəle gəle na na, a gəley na vaw ŋga na, ama ndaw me tsey guma andza ma ndaw sek na, a gəladata na ndaw ma tsəha 'ar ahiya na.

⁵ A saya akwa na, kuray tabiyaha ka tsam mey gəle gəle, amana, a saya ɗohw na, kuray ka tsam guma andza ma ndaw sek hay. Ndaw me tsey guma andza ma ndaw sek na, a fəna ndaw me tsey guma ta mey gəle gəle na, dakay na sey a slafa ma wandzalada guma ŋga na me tsey ana a ndaw ma tsəha ’ar ana hay ka gəladata.

⁶ Malam a ɗaw hay, kəɗey na, dzalama ɗagay, kendzey i daɓa ma da nəkukurawa tok na, i tsey guma ta mey gəle gəle na: i da nafakwar na mey? Haɗaw guma ɗaw ana a ɓakwar kwa tek me nəkey aha da huɗa dakay, kwa tek me sərey aha da huɗa dakay, kwa guma ma ndaw sek aha da huɗa dakay, kwa a tatəkakwar aha təke da huɗa dakay na?

⁷ Na ŋga na na, kal kal andza tek me key wargay hay, andza fogwam, andza gandzaval: kendzey ndaw afa so ha na, a da səradama a fadama ta fagwam ana, dakay ta gandzaval ana na, walay waray na ta mey?

⁸ Haɗaw me ɗey ma tolom ana ka weley kakay na, ma da həley vaw a vərom na way?

⁹ Kuray ana na, andza ha atsa, haɗaw 'erneh a kwar a walada ha guma kakay na, ndaw a da tsənada guma kwar ana me tsey na teŋgey? Ka da tsamar guma na, a memeɗ tedehe.

¹⁰ I sərada, səpa bəzay ma guma ka bəla na, a key na nday na kakay, ama, na waray, na waray na, me weley ŋga na daha.

¹¹ Haɗaw i sərada ha bəzay ma guma ma ndaw ana ma tsaya kakay na, a da nəkafaya na mbəlak aha, ya tey i da nəkafa na andza mbəlak aha.

¹² Kuray ana na, kal kal andza ha satsa, səpam na, Mesəfrey ka key mber da vaw kwar a fəna satsa, haɗaw a key vaw na, hərway ma mey na, a kakwar aha dey, amana, ka key na, na ma gəlada Egliz ana.

¹³ Ka vəday ma mey na, ndaw me tsey guma ta mey gəle na, ka ɗuley mey na, ma ŋga ka ndzefey tek ma haya ha na ma mbəɗada ŋga na.

¹⁴ Kendzey i ɗuley mey ta mey gəle na, mezek a ɗaw na, a ɗuley aha mey, ama 'ar me dzeley ɗaw na, a key aha mber kakay.

¹⁵ Me key na teŋgey tok? I da ɗuley mey ta gədaŋ ma Mesfrey, ama hayna, i ka ɗuley mey na, ta 'ar a ɗaw me dzeley adzay tiyatsa. I ka key walay ta gədaŋ ma mesəfrey, amana, i ka key ta 'ar a ɗaw me dzeley aha adzay tiyatsa.

¹⁶ Hərway haɗaw azlakwa me key mber na Mesəfrey ana asləta dada na, andza kendzey ka pəsey mey ka tek na, ndaw ma sawa ma da pey sləmay dada na na, a da mbəɗafa «Amen», a sise ɗek ana na teŋgey, kavəday ma mey na a sərada ha tek a ɗek ana me ləvey ana kakay seŋgey.

¹⁷ Dey ta kava ma madara sise ɗek ana na, a sərey, amana, ka gəlada ndaw ana hana kakay.

¹⁸ Sise ma Bay ma Bəla, i tsey guma ta mey gəle gəle, a fəna kuray tabiyaha.

¹⁹ Ama andza da me tsəhey 'ar ana, i wuɗey ŋgama i ka tsey bəzay ma guma hay zlam, me tsəney ana hay, ma saɗəkadata sa ma ndaw hay tiyatsa, ta neney i tsey gabal kurow ta mey gəle na na.

²⁰ Malam a ɗaw hay, ma ’ar me dzeley na, ka da təradama vaw kwar bəza hiya zlay, ayaw, ma tek haya kakay ana na, təradama vaw kwar bəza hiya, ama ma ’ar me dzeley na, təram ndaw ma səka ahiya.

²¹ Ma winda ha da Mewey na: «I da tsar guma a səkway a neney na, ta huɗa mey ma ndaw ma tsam guma ta mey gəle na, ta huɗa mey ma mbəlak hay, kwa andza ha tekeɗe na, a da pəmaya ha sləmay kakay». Bay’ərlam a ləvey na andza neney.

²² Akwa na, me tsey guma ta mey gəle gəle na, ka ndaw ma pam 'ar ana hay na, zeheɗ kakay, sey ma ndaw ma pam 'ar kakay ana hay. Guma ma ndaw sek na, ma ndaw ma pam 'ar kakay ana hay kakay, amana, ma ndaw ma pam 'ar ana hay.

²³ Padakwa andza Egliz ma kusa 'ar aha tabiyaha, tobiya kwar aha ka tsam guma ta mey gəle gəle na, ndaw ma pam sləmay tedehe na hay ta ndaw ma pam 'ar kakay ana hay ma fuləkumaɓa na hay na, a da dzalam na, waya 'ar a mbəɗakwar kakay ɗaw.

²⁴ Haɗaw dzadzak tabiyaha a tsam guma andza ma ndaw sek na, ndaw me pey 'ar kakay ana ta ndaw ma dəmaɓa me pey sləmay tedehe na hay, ma fuləkumaɓa na hay a da nəkafa ka vaw ŋga na, ndaw hay tobiya ta ha a hətama, tabiya ta ha a kafama sariya.

²⁵ Tek aŋga na ma kəzla ha da mevel ana na, ka bawa ba, a da ney dəba 'ar dey dots ka dala, a da nar dəba a Bay ma Bəla, a da tələkada mey na, Bay ma Bəla ŋga daha da walaŋ a kwar dərka na.

Me ləmey tek hay da Egliz

²⁶ Me key na teŋgey tok malam a ɗaw hay? Kendzey andza kuray ka tsəham 'ar ba na, kwa way way da walaŋ a kwar a slafa me kəley walay, ma sadərawa guma me tetəkey, ma ɓada tek ma kəzla na, me tsey guma ta mey gəle gəle, dakay na, me mbəɗey guma. Haya tabiyaha ka key na, ma gəladata ndaw hay tabiyaha.

²⁷ Me tsey guma ta mey gəle na? Ndaw hay tsew ka tsam, dakay na ndaw hay makar, ka da fəna zlay, ka key na, ka membere ka membere, arka ndaw mekelehe ka mbəɗa guma na.

²⁸ Haɗaw ndaw ma mbəɗada dakay na, malam a hana ka ndzey təŋga tete, da walaŋ ma me kusey ana, ka tsar guma a vaw ŋga na, dakay na, a Bay ma Bəla.

²⁹ Haɗaw me tsey guma andza ma ndaw sek na, ndaw hay tsew, makar ka tsam, sa ma ndaw hay na ka dzadzəmama.

³⁰ Haɗaw ndaw asləta da walaŋ ana, Bay'ərlam ka tsərawa guma ba na, ndaw andza a tsey aha guma na, ka ndzey tete.

³¹ Ka slafama me tsey guma andza ma ndaw sek hay tabiyaha; amana, hayna ka key na asləta asləta, ma ndaw hay tabiyaha ka saɗekam, ka həladatara bəzay.

³² Ndaw sek na, a war 'ar a mesəfrey ma ndaw sek me key mber da vaw ŋga na.

³³ Hərway Bay ma Bəla na, Bay ma Bəla me key tek zoɗ zoɗ aha na kakay ana, ama ŋga na Bay ma Bəla ma zozoy. Andza na ma kam tabiya ha da Egliz ma ndaw Kokwaɗ ana hay

³⁴ da me tsəhey 'ar hay na, ŋgwas hay na ka ndzam tete. Slam har ata me tsey guma dakay; ka tsənam sləmay na, andza na ma mewey me ləvey ana tiyatsa.

³⁵ Haɗaw a wuɗam me tsəhey tek da bəzay ma guma hay na, ka tsəhafəmata ka zel ata hay da mbaw. Ŋgwas a tsey guma da me tsəhey 'ar hay na a dada kakay.

³⁶ Guma ma Bay ma Bəla ana a zlar na, da 'ay kwar ɗaw? Ma ndzafa na, kuray asləta ɗaw?

³⁷ Haɗaw ndaw a dzala na, ŋga ndaw sek aha, dakay ta Mesəfrey ma Bay'ərlam da vaw ŋga na, ŋga ka sərada na, mey ma mewey ma Bay’ərlam da guma ɗaw eɗey ma windadukuraɓa na.

³⁸ Haɗaw ndaw ana ka təɓa mewey ana kakay na, na ŋga na na, Bay ma Bəla a sərada ha kakay.

³⁹ Kəɗey tok ŋgey malam a ɗaw hay, səpam ndaraw ma Mesəfrey ma ndaw sek, ka da təkəmata ndaw me tsey guma ta mey gəle gəle na hay zlay.

⁴⁰ Ama tek hay tabiyaha ka kam na, ta tsəveɗ, ka membere ka membere.