1 Korintieŋ 13 - MEY HAYNA WAYNA MA YEZU KRISTE MA MEVEY

Ma wuɗa vaw andza malam hay

¹ Kendzey i ka tsey guma ta mey gəle gəle, guma ma ndaw hay ta na ma madurlam hay, haɗaw ma wuɗa vaw a hətsaya na, na ŋga na na, yah na kal kal andza ɓərey ma ɗey ana, andza gaŋgaŋ ma ɗey bəza kakay ana.

² Kendzey i ka ndzefey tek ma haya ha ma kada ndaw sek, i ka sərada tek ma kəzla na hay, ta na ma me sərey tek hay tabiyaha. Kwa tek ka zafiyawa da 'ar me pey daha zlay, kwa 'ar me pey ana ka key na a guradata mamba hay ba, ama haɗaw ma wuɗa vaw a hətsaya na, yah na təke tedehe.

³ Kendzey i ka wanəkadatara zleley ɗaw ba tabiya ha a ndaw may hay, kwa i ka vəladara vaw ɗaw ba a ’erneh ma waw, ama haɗaw ma wuɗa vaw a hətsaya na, tek a ɗaw ma da ndzefey da huɗa dakay.

⁴ Ma wuɗa vaw na, a ɓəsey mevel, ma wuɗa vaw na a dzəney ndaw, a ney dey kakay, a ŋgelekey kakay, a həsley 'ar ta ndaw kakay.

⁵ Ma wuɗa vaw na, a key tek mambay kakay ana tikay, a səpey riba kakay, mevel a tsar kakay, a key dugwan ta ndaw kakay.

⁶ Tek dzerey aha kakay ana na a vəlar wuiya tikay, ama a ndzafa wuiya ŋga na, da dərka na.

⁷ A sey yam ka tek hay tabiya ha, a pey 'ar a tek tabiya ha, a pey dey ka tek tabiya ha, a ɓəsata tek hay tabiyaha.

⁸ Ma wuɗa vaw na a da zəɗey aha tikay. Guma ma ndaw sek hay? A da ndəvam. Mey gəle gəle? A da ndəvam. Me sərey tek? A da key dasakay.

⁹ Hərway tek a lakwa me sərey na, kokway ŋga na daha, guma lakwa me tsey andza ma ndaw sek ana na, kokway ŋga na daha.

¹⁰ Ama pas ma tek ana hayna ka da sawa ba na, tek ana kokway ŋga na daha na hay na, a da ndəvey.

¹¹ Da har andza i bəza ha na, i tsey guma andza ma bəza hay, me sərey tek a ɗaw na, andza ma bəza hay, i dzeley 'ar na ma bəzahay. Ma gəlawa ɗaw ba ɗuhwa ha na, i ma mbəkada tek na ma bəza hay ba.

¹² Ekəɗey i nəkadakwa da malam na, andza a nəkey haya haya kakay, ama aza a da key tok na ndar ndar. Ekəɗey tek a ɗaw me sərey na, kokway ŋga na daha, arka na, aza i da sərada na, kal kal andza ma Bay'ərlam ma səradaya na.

¹³ Ekəɗey tok na ma da ndzey səlekw na, tek a neney makar ana hay na: me pey 'ar, me pey dey ta ma wuɗa vaw, ama ma fənata ba na, ma wuɗa vaw.