1 Korintieŋ 12 - MEY HAYNA WAYNA MA YEZU KRISTE MA MEVEY

Tek ma Mesəfrey Kokwoɗ ana ma vəley ma haya ha na

¹ Ma tek ma Mesəfrey Kokwaɗ ana me vəley ma haya ha na na, malam a ɗaw hay, a saya na, kuray ka ndzam mandzara ka səradama kakay zlay.

² Kuray ana ka səradama, da har ana ka səradama Bay'ərlam tsaray kakay na, ka dawam na dah 'ar ma da natar dəba a kuley ma ndəraya ta har ana hay, ma tsam guma kakay ana hay.

³ Hərway ma mey i ɓadakwar na: ndaw ta gədaŋ ma Mesəfrey ma Bay ma Bəla aha da vaw ŋga na, a slafa me ləvey: «Yezu na, ma kəla 'ar aha», kakay. Ndaw ma slafa me ləvey mandzara gədaŋ Mesəfrey Kokwoɗ ana: «Yezu na Bay’ərlam na», dakay.

⁴ Tek na ma vəla ma haya ha, ma hahaya na, gəle gəle, ama na Mesəfrey ana asləta.

⁵ Pandzay me Meslərey hay na gəle gəle, amana, Bay’ərlam ana asləta.

⁶ Tek hay me key na gəle, gəle, ama ma kərawa na, Bay ma Bəla ana asləta, da tek hay tabiyaha, da ndaw hay tabiyaha.

⁷ Kwa way way a ndzefey tek na ma vəla ha ma haya ha na na, ma da ɓada gədaŋ ma Mesəfrey Kokwaɗ ana, ka da nafatar a ndaw hay tabiyaha.

⁸ Mesəfrey a vəlar ma tsada mey, ma ma səra 'ar a ndaw; a ndaw naŋgar na, a vəlar mey ma tsada mey ma ma sərada tek, a bawa na da Mesəfrey ana asləta.

⁹ A ndaw mekelehe satsa na, Mesəfrey ana a vəley me pey 'ar, a ndaw mekelehe satsa na, Mesəfrey ana hana na, na asləta na satsa na, a vəlar tek ma haya ha ma ndalada ndaw.

¹⁰ A ndaw mekelehe a vəlar gədaŋ ma kada ɗeɗew hay, a ndaw mekelehe ma tsada guma andza ma ndaw sek, a ndaw mekelehe mawaladata mesəfrey hay ba ka vaw, a ndaw mekelehe satsa na a vəlar ndaraw me tsey guma hay ta mey gəle gəle, a ndaw mekelehe tey na, ma mbəɗadata guma na hay.

¹¹ Ama tabiyaha ma kadata mber na Mesəfrey ana hana asləta na, a wanəkadatara tek ana ma haya ha na na ka ndaraw ka ndaw, gəle gəle, andza ma ŋga me wuɗey ana.

Mezəvey hay gəle gəle, vaw ana ŋga asləta

¹² Akwa na, maladakwa ta tek: tapay ma vaw na ŋga asləta, amana, mezəvey ma vaw ana hay kava haɗadzidzay. Amana, mezəvey ma vaw hay tabiya ha na, kwa taya haɗadzidzay tekeɗe na, a da dzəmey na vaw ma ndaw asləta. Ma Kriste na, andza ha atsa.

¹³ Hərway a dzuhəɓadəmandakwar na a Mesəfrey ana asləta, ma da tərey vaw ma ndaw asləta: Zuif hay, Grek hay, beke hay ta ndaw ma wama 'ar ata na hay, i səkwawa tabiyaha na, Mesəfrey ana asləta.

¹⁴ Akwa vaw ma ləma ha na, ta mezəvey asləta kakay, amana, haɗadzidzay.

¹⁵ Kendzey haɗaw sek ka ləvey: «Yah na har kakay sana, i ma mbəslaha da dey ma vaw tikay» kəɗey na, a slafa ma warzlawa vaw ŋga ba da dey ma vaw tata ɗaw?

¹⁶ Kendzey haɗaw sləmay ka ləvey: «Yah na dey kakay sana, i ma mbəslaha da dey ma vaw tikay.» Kəɗey na, a slafa ma zəga vaw ŋga ba, da dey ma vaw tata ɗaw?

¹⁷ Kendzey haɗaw vaw ana tabiyaha ka key na dey na, ma da tsəney tek na ta mey? Kendzey haɗaw ka key na sləmay aha na, ma da zey tek na ta mey?

¹⁸ Ama ka vaw ana na, Bay ma Bəla ma patərawa mezəvey ana hay ka mezəvey ka mezəvey na, andza ma ŋga me wuɗey.

¹⁹ Hana na ka ləma tabiyaha mezəvey aha asləta na, vaw ana a da bawa na da may?

²⁰ Mezəvey hay na, haɗadzidzay, ama vaw ana na, ŋga asləta.

²¹ Dey a slafa ma ləvar a har: «I da kadaka mey kakay»; dakay na 'ar a slafa ma ləvatar a sek hay: «i da kadakwar mey kakay.»

²² A fəna sa na, mezəvey ma vaw kwa na bəle na hay na, a nafam,

²³ na ma lakwa ma ɗukwatar ndaw kambəlaɓa kakay ana hay na, i ɗukwatar ndaw kambəlaɓa na a taya tok. na ma key hwaray ana hay na, i wafukwata vaw a fəna.

²⁴ na ma nəkam ana hay ha a tsəham me wey vaw andza dzay tikay. Ama Bay ma Bəla a kərawa vaw na, ma hasəkadara bəzay ana ma ɗəmatar ndaw kakay ana hay.

²⁵ Ma me tsey vaw ka da key da vaw daha zlay, amana, mezəvey hay tabiyaha na, medzeley 'ar ata na ka key na kamasləta ha, ka zəgam har ka vaw.

²⁶ Kendzey mezəvey asləta, tek a tsafa na, sa ma mezəvey a sa na hay a wanəkadama me tsey ŋga na tabiyaha; haɗaw mezəvey asləta ma hasəka bəzay aha na, sa ma mezəvey a hay tabiyaha, a wanəkadama wuiya ŋga na.

²⁷ Arka kuray tok na, vaw ma Kriste, kuray na mezəvey ŋga na hay, kwa way way na, ta na ma ŋga.

²⁸ Ndaw na Bay ma Bəla ma padata da Egliz ana hay na, tsəfəmey aha na maslaŋ hay, ma tsetsew ana na, ndaw sek hay, ma makar ana na, ndaw ma paya ma me tetəkey ndaw hay. Arka a dəba na tok na, na ma ndzefey tek ma haya ha ma kada ɗeɗew, me deley ndaw hay, ma ma dzənata ndaw hay, ma ma kəlatar ka mey a ndaw hay ta na ma tek ma haya ha ma tsada guma hay, ta mey gəle gəle na.

²⁹ Tobiya ta ha na, maslaŋ ahiya ɗaw? Tobiya ta ha na ndaw sek ahiya ɗaw? Tobiya ta ha a tatəkam ndaw hay ɗaw? Tobiya ta ha a kam ɗeɗew ɗaw?

³⁰ Tobiya ta ha ka ndzafam tek ma haya ha me ndeley ndaw ba ɗaw? Tobiya ta ha a tsam guma ta mey gəle gəle ɗaw? Tobiya ta ha a slafama me mbəɗey guma ɗaw?

³¹ Səpam tek ma haya ha na hayna ma fənata sa na hay. Afəna satsa na, i da ɓakwar tsəveɗ ana hayna ma fənata na.