1 Korintieŋ 10 - MEY HAYNA WAYNA MA YEZU KRISTE MA MEVEY

Tek ma bəzey ma Israyel ma kəmawa da palah

¹ Malam a ɗaw hay, i wuɗey ma mbəkadakwar mandzara kuray ka səradama zlay kakay, baba lakwa hay na tobiya pazlay ka sahətata ba, tabiyaha a tasəmawa ta bəlay.

² Tobiya ta ha ka dzuhəɓam ba da Moyiz, da pazlay, da bəlay.

³ Tobiya ta ha a zəməmawa na, tek me zəmey ma mesəfrey ana asləta.

⁴ Tobiya ta ha a səmawa na yam ma Mesəfrey ana asləta, hərway a sam yam da hwatakwam ma Mesəfrey, a səpata ha: Hwatakwam ana ŋga na na, Kriste.

⁵ Azlakwa sa tok na, har a var da walaŋ ata na na, ka damar 'ar a Bay ma Bəla kakay, hərway vagay ta na hay ma kuya hiya tololo da palah.

⁶ Tek ana ŋga na hay a kəmawa na, ka da tərəmandakwar tek ma tsafa dey aha,, ma lakwa ka da kakwama dey ka tek haya kakay ana, andza ma ta, ma kəmawa dey kava na zlay.

⁷ Ka da nəmatar dəba a ’ərlam ma ndəra hiya ta har ana hay zlay, andza ma sa ma ndaw ma kam andza ha da walaŋ ata na hay zlay. Hərway ma winda ha da ɗeriwel Kokwoɗ ana na, andza neney: «Səkway me ndzey da me zəmey tek, me sey tek, arka na, ma lətsam, ma kam wasa.»

⁸ Ka da vəladukwara vaw lakwa a me tsəley so, andza ma ndaw hay daha ma kam da walaŋ ata na zlay: pas asləta na, ndaw ma bezley gabal kokurow tsew kava makar.

⁹ Ka da həlakwar suwet a Bay’ərlam zlay satsa, andza sa ma ndaw hay daha da walaŋ ata, ma kam andza ha na, govaŋ hay ma bazləmata.

¹⁰ A dəba na tok na, ka da gwaŋguɗam mey andza ma ndaw hay daha da walaŋ ata ma kam ana zlay; madurlam na me hətey ndaw hay ana ma bazlata.

¹¹ Tek a neney hay tabiyaha a safatərawa na, ma aza ka tərey tek ma tsey dey kava ha, ma windəmərawa na, ma aza ka saɗəkadandakwar, lakwa neney bəse ta me ndəvey ma bəla na.

¹² Kəɗey tok na, ndaw andza ma dzala da vaw ŋga, ma lətsa ha ta lətsey na, ka wey daw ka vaw, ka da təɗey zlay.

¹³ Tek a neney me həley suwet ka ndaw ana hay na, ma kuyadəmakwar swoy ka tsakiya na, ma kaya na diday ma ndaw. Bay ma Bəla na, a mbəɗar sler a guma ŋga tikay. A da vəlar aha tsəveɗ a tek ana me həley suwet ka ndaw ana ka fənakwar gədaŋ akay. Da tek ana me həley suwet ka ndaw ana na, a da vəlakwar wewer ma bawa ba da huɗa, a da vəlakwar gədaŋ ma ɓəsa.

Me dzəmey ta fakalaw hay dakay

¹⁴ Malam a ɗaw i ma wuɗata na hay, hwam ba dəreŋ ta ’ərlam ma ndəra hiya ta har ana hay.

¹⁵ I tsakwar guma na, andza a ndaw ma səradama me dzeley 'ar ana hay, kuray ana sasəkama guma ɗaw ana, i ma tsakwar ana kwa.

¹⁶ Sərafama, vəley kuley ma me pəsey mey, na lakwa ma pəsakwa mey kava na na, a ɓada ma dzəma vaw ta Kriste, da mambaz aŋga kakay ɗaw? Peŋ ana lakwa ma tsadakwa na na, a dzəmadandakwar mey ka vaw ta Kriste kakay ɗaw?

¹⁷ Azlakwa na, peŋ ana ŋga asləta sana, na ŋga na na, lakwa tabiyaha na, vaw ma ndaw asləta, hərway lakwa tabiyaha ka dzəmakwa na, ka peŋ ana asləta.

¹⁸ Nəkafəmata ka Bəzey ma Israyel hay: ndaw na me zəmey slaw ma gənaw ma kadama kuley ana hay na, ma dzəma hiya ka vaw ta ŋgwa ma kuley ana kakay ɗaw?

¹⁹ I ka ləvey na teŋgey? Slaw ana ma sladəmatara a ’ərlam ma ndəra hiya ta har ana hay na, dakay na, a 'ərlam ma ndəra hiya ta har ana na, a nafam təŋga ɗaw?

²⁰ A-ay, ama andza kuley ta na hay na, a kadəmatara na a fakalaw hay, zləna a Bay ma Bəla kakay, i wuɗey na kuray ka dzəmam ka vaw andza fakalaw hay zlay.

²¹ Ka slafama me sey tek da vəley ma kuley ma Bay’ərlam, ta na ma fakalaw hay kamasləta ha kakay. Ka slafama me zəmey tek ma kuley ma Bay’ərlam, ta na ma fakalaw kamasləta ha kakay.

²² Tsukuɗu ka wuɗakwa na, ma fənadara mevel a Bay’ərlam ɗaw? Tsukuɗu i fənakwa ta gədaŋ ɗaw?

Me key tek tabiyaha hərway ma me wezley dey ma Bay ma Bəla

²³ Slam har me key tek hay tabiya ha daha, ama na tabiyaha haya ahiya tsa kakay. Slam har me key tek hay tabiya daha, amana, tabiyaha a gəley ndaw ka mey kakay.

²⁴ Kwa ndaw ka da səpey me yəmey a vaw ŋga na dada zlay, amana, ka nafatar a sa ma ndaw hay.

²⁵ Mendzey ma tek tabiya ha ma haɗəkadama da luma na hay na, zəmam tsa, mandzara kuray ka tsəham, ma ka da sakwar vaw zlay.

²⁶ Hərway dala ta tek ana hay da huɗa na tabiya ha na, ma vəlaya na ma Bay’ərlam.

²⁷ Kendzey andza ndaw me pey ’ar kakay aha ka wunakwar ba na, kendzey ha wuɗam ba ma daway na, tek aŋga ma vəlakwar tabiyaha na, zəmam, mandzara kuray ka tsəham, ma ka sakwar vaw zlay.

²⁸ Ama haɗaw ndaw a ləvakwar: «Neney na slaw ma kuley na» na, na ŋga na na, ka da pəɗam zlay, hərway ma ndaw a hana ma ɓadakwar ana ka da dzəma zlay.

²⁹ I tsey ka sləna na, kavəday a da sakwar vaw ba kakay, amana, ma ndaw mekelehe. Ɗagay i wa ’ar a ɗaw sakay mavəday a da sar vaw ba a ndaw na ka mey?

³⁰ Haɗaw i zəmey tek ta ma mada sise kava na, a da kəmaya say ka tek ma ma sise ha kava na, ka mey?

³¹ Kəɗey tok na, ka key na ka zəmam na tek, ka sam na tek, dakay ka da kam na mey mey na, kama tabiyaha na, ma səmbərada Bay ma Bəla.

³² Ka da təram tek ma təɗey ndaw aha zlay: kwa ma Zuif hay zlay, kwa ma Grek hay zlay, kwa ka Egliz ma Bay ma Bəla zlay.

³³ Yah ana, ta ’ar a ɗaw ana i kəɗey vaw andza neney na, ma i ka datar 'ar a ndaw hay tabiyaha, da tek hay tabiyaha, i səpey na, tek a ɗaw me wuɗey ana kakay, amana, tek na ma dzənata ndaw hay haɗadzidzay, ma ka da buwata na.