1 Korintieŋ 1 - MEY HAYNA WAYNA MA YEZU KRISTE MA MEVEY

Me tsey guma a vaw

¹ Yah Pol, ma zəla ha me tərey maslaŋ ma Kriste Yezu, andza ma Bay ma Bəla me wuɗey ana, ta Sosten malam.

² I windar a Egliz ma Bay ma Bəla da Koreŋt ana, a ndaw na ma təra hiya ba Kokwaɗ ahiya da Kriste Yezu ana. Ma zəlaya ka təram kokwaɗ ahiya ta ndaw na ma zəlama mezəley ma Bay’ərlam a lakwa Yezu Kriste ka waray ka waray ana hay tabiyaha, ŋga Bay’ərlam ta, ŋga Bay’ərlam a lakwa.

³ Hayna Baba lakwa Bay ma Bəla ta Bay’ərlam Yezu Kriste ka vəlakwar hahaya, ta zozoy.

Ma madara sise a Bay'ərlam

⁴ I madara sise a Bay ma Bəla zarra ma vəday kwar, hərway ma hahaya ma Bay ma Bəla ma vələkurawa da Kriste Yezu ana.

⁵ Hərway ta ŋga na, kuray ka rəham ba ta zleley hay tabiyaha, na ma guma hay tabiyaha, na ma me sərey tek tabiyaha.

⁶ Kəɗey na, seydewe ma kamar a Kriste ana, a ɓawa gədaŋ aha na da kuray,

⁷ a da key na tek ma vəlam ma hayaha ma hahaya ma hətsar a ndaw na dasakay, a kuray ma hutam ma da ɓawa vaw ma Bay’ərlam a lakwa Yezu Kriste ana hay na.

⁸ Ma da səmadakwar na ŋga na tiyatsa, ha səlekw, mala ta pas ma Bay’ərlam a lakwa Yezu Kriste na, ka da ŋgələmakwar bəzay zlay.

⁹ Ŋga na a mbəɗey sler a guma ŋga tikay, Bay ma Bəla ana ma zələkurawa ma da dzəmey mey ta Bəzey ŋga Yezu Kriste, Bay’ərlam a lakwa na na.

Ma wanəka vaw da Egliz ma Koreŋt

¹⁰ Amana, i tsəhafakwar malam a ɗaw hay, ta mezəley ma Bay’ərlam a lakwa Yezu Kriste: ndzam tabiyaha ayaw ayaw, me wenəkey vaw ka da key da walaŋ a kwar daha zlay. Dzəmam mey asləta, ta mesəfrey ana asləta, da 'ar me dzeley ana asləta.

¹¹ Akwa na, malam a ɗaw hay, ndaw ma Klowey hay ma ɓadəmaya waya dzendze hay daha da walaŋ a kwar.

¹² I wandzaladakwar; kwa way way da walaŋ a kwar a ləvey andza neney: - Yah na ndaw ma Pol - Yah na ndaw ma Apolos - Yah na ndaw ma Sefas - Yah na ndaw ma Kriste.

¹³ Kriste na na, ma wanəka vaw aha ɗaw? A daram ka 'ar ma tuwaw ma gazləla ha, hərway kwar na, Pol ɗaw? A dzuhəɓadəmakwar a yam na, ta mezəley ma Pol ɗaw?

¹⁴ Sise ma Bay ma Bəla, yah na, i ka dzuhəɓey ndaw asləta da walaŋ a kwar tikay, sey andza Krispus tsew ta Gayius.

¹⁵ Kəɗey zləna mey na, kwa ndaw ma da slafa ma da ləvey, a dzuhəɓadəmakwar ta mezəley ɗaw na dakay.

¹⁶ Ayaw satsa, i ka dzuhəɓadatərawa ndaw ma 'ay Stefanas hay ba sa, sa ma ndaw tabiyaha na, i ka dzuhəɓawa ndaw da huɗa asləta mekelehe, i ma sərada na dasakay.

¹⁷ Hərway Kriste a sləradiyawa na, ma da dzuhəɓey ndaw hay kakay, amana, ma da tələkada mey ta Mey Wayna, mandzara i səpey ma səra ’ar ma me tsey guma, ma tuwaw ma gazləlaha na ma Kriste, ka da tərey tek tedehe zlay.

Ma səra 'ar ta ma mbəɗa 'ar

¹⁸ Akwa guma ana ma tsam ka ma mətsey ma Kriste ka ’ar ma tuwaw ma gazləlaha na na, a kafata ka ndaw ma zəɗaya dəreŋ ta Bay ma Bəla a na hay na, andza guma ma 'ar me mbəɗey, ama ka ndaw Bay ma Bəla ma buwata na hay na, ka lakwa na, gədaŋ ma ma Bay ma Bəla.

¹⁹ Hərway ma winda ha da ɗeriwel kokwaɗ ana na: «i da davasada me sərey 'ar ma ndaw ma səra 'ar ana hay ba, i da pəslada me sərey tek ma ndaw ma səradama tek ana hay ba.»

²⁰ Ndaw ana ma səra 'ar ana, ŋga da may tok? Ndaw ana me sesəkey mewey ana na, ŋga da may? Ndaw me dzeley 'ar ma bəla neney ana na, ŋga da may? Bay ma Bəla na, ka tərada ma səra ’ar ma bəla neney ana na, andza tek ma ’ar me mbəɗey aha kakay ɗaw?

²¹ Akwa na, ndaw ma səra ’ar ana hay na, ka səradama Bay ma Bəla da ma səra’ar ma Bay ma Bəla ana kakay, ka vəday ma mey na, Bay ma Bəla ka dzala ba ma da buwata ndaw me pey 'ar ana hay, ta me tələkey mey ma tuwaw ma gazləla na, na ndaw hay ma nəkafama andza guma, ma ’ar me mbəɗey ana.

²² Zuif hay a tsəham na, zeheɗ hay, arka Grek hay tey na, a səpam na ma səra ’ar.

²³ Ama la na, la tələkam mey na ta Ndaw ma vaha 'ar ana, ma daradama ka 'ar ma tuwaw ma gazləlaha na. Ka Zuif hay a kafata na andza tek me tsey metsembeɗ, ka ndaw Zuif ahiya kakay ana hay tey na, guma ma 'ar me mbəɗey,

²⁴ ama andza ma ndaw ma zəla na hay, ka key na Zuif hay dakay Grek hay na, ŋga na Kriste, ma slafa ma Bay ma Bəla, ma səra ’ar ma Bay ma Bəla.

²⁵ Hərway tek na ndaw hay ma nəkafama andza 'ar me mbəɗey aha ma Bay ma Bəla ana na, a fəna ma səra ’ar ma ndaw hay, tek na ndaw hay ma nəkafama andza bəle ma Bay ma Bəla aha na na, a fəna gədaŋ ma ndaw hay.

Ma səra ’ar ta ’ar me mbəɗey da me zley ma Egliz

²⁶ Malam a ɗaw hay, nəkafama kuray a neney na, way hay, kuray a neney ma ndzafam me zəley ma Bay ma Bəla ana hay; da walaŋ a kwar ana, ka slam dey ma ndaw hay na, ndaw ma sərada tek ahiya kambəlaɓa na dakay, ndaw gədaŋ ahiya kambəlaɓa na dakay, ndaw ma vəɗ ’ay zleley ahiya kambəlaɓa na dakay.

²⁷ Ama tek na ndaw hay ma nəkadama andza tek ma 'ar me mbəɗey ka bəla neney na, Bay ma Bəla ma gaɗəma, ma da patar hwaray, a sa ma ndaw ma ləvam ndaw ma səra 'ar ana hay. Tek na bəza ha ka bəla na na, Bay ma Bəla ma gaɗəma ma da patar hwaray a ndaw gədaŋ ana hay.

²⁸ Tek na ka bəla tedehe, ma rəsama na, na me sləfey ŋga dakay ana na, Bay ma bəla ma gaɗəma, ma da davasadata tek na daha na hay, ka kam daha zlay.

²⁹ Ma kwa tek asləta na ma ka ha na na, ka da slafa me ŋgelekey ka slam dey ma Bay ma Bəla zlay.

³⁰ Ka da kam da Kriste Yezu na ta har aŋga, ŋga na ka tərafandakwar ba andza ma səra 'ar na ma sawa da Bay ma Bəla ana, dzerey, tek me tərey kokwoɗ ana, ta ma ləhey vaw.

³¹ Andza na ma Mewindey Kokwoɗ ana me ləvey ana: «Haɗaw ndaw a wuɗey me ŋgelekey na, ka ŋgelekey na da mezəley ma Bay’ərlam.»