Tuonɑ 6 - Yiesu Lɑbɑmɑnn Muɑl Ni

B gɑnn sonmtieb bɑnlole

¹ L yuo nɑ k Yiesuweilɑ nbɑ ŋɑnmt yɑbtl k puki nɑ, k bunbulmi tɑn bɑɑl *Suifnbɑ nbɑ piɑk Glek mɑɑn nɑn Suifnbɑ nbɑ piɑk b mɔnŋ mɑɑn nɑ sinsuuk ni, k mɑɑn bin nbɑ piɑk Glek mɑɑn nɑ din yet ɑ b i tuol jiet dɑɑl kul, b pɑkɔi k lɑɑt b tolɑ nɑn lieb nɑ.

² Ŋɑnn e k tuomiinbɑ *piik nɑn bɑnle nɑ yiin Yiesuweilɑ mɑnŋ kul ɑ, k tɑn yet’b ɑ: «L k ŋɑn k tin nyik Yennu mɑɑn muɑntu ŋɑɑn biɑl jiet tolu ni.

³ L pɑɑk, n nɑɑ wɑɑs, gotl k gɑnn jɑb bɑnlole i sinsuuk ni, bin nbɑ k i mi nɑn b gbie nɑn Foŋɑnm nɑn yɑnfɑntl, k tin tien’m tuonɑ nɑ yudɑnm,

⁴ ŋɑɑn k tinm n jii t mɔnŋ yuo k tien Yenmiɑlu ni, nɑn Yennu mɑɑn wɑnnu ni, k dɑɑ nɑk.»

⁵ K mɔtɑɑɔk niib nɑ kul ji din mɔk pɑlpienn tuomiinbɑ mɑɑn mɑnŋ pɑɑk. Ŋɑnn e k b gɑnn Etiɑnn, wun nbɑ mɑntk gbie nɑn Foŋɑnm nɑn yɑdɑ nɑ, nɑn Fiiliip, nɑn Pluokɔl, nɑn Niikɑɑnɔl, nɑn Tiimɔn, nɑn Pɑɑlmenɑɑs, nɑn Niikolɑ, wun nbɑ din nyii Antiɑɔs. Sinsinn u din k tie Suif nilɔ, ŋɑɑn siɑn yuo u din kpint u jɑɑnti k wɑɑ Suifnbɑ jɑɑnti, ŋɑɑn k mɔtɑɑnɑ k u ji tie Yiesuweilɔ.

⁶ Mɔtɑɑɔk niib nɑ nbɑ lukt’b yuo nbɑ, k b te k b sɑɑn set tuomiinbɑ nɑ tuɑnn po, k tuomiinbɑ mɑnŋ miɑl Yennu k tul’b ŋɑɑn jii b nii k yii b pɑɑk.

⁷ L puolpo e k Yennu mɑɑn ŋɑnmt k yɑt kuɑ niib ni, k Yiesuweilɑ mun biɑ yɑbtl k puki bonciɑnn Selusɑɑlenm, k Yennu mɑnntieb bonciɑnn sɑk Yiesu lɑbɑmɑnn k tien’ɔ yɑdɑ.

Etiɑnn suolu lɑbɑɑl

⁸ Etiɑnn nbɑ din gbie nɑn Yennu yetŋɑnm nɑn u yiikuo bonciɑnn nɑ, din tuun bɑktnɔunŋ tuonjɑɑnɑ niib nɑ sinsuuk ni.

⁹ Ŋɑɑn nisiɑb din k sɑk’ɔ. Bin nbɑ din noi nɑn Etiɑnn mɑnŋ din tie Suifnbɑ nbɑ din tie dɑɑbɑ, k b ŋɑɑ’b b dɑɑbs ni, k b nyii Siilenn nɑn Aleksɑndli nɑn Siiliisi nɑn Asii ni e. B mun din mɔk b mɔnŋ Suifnbɑ jɑɑnti dieok o.

¹⁰ Ŋɑɑn Foŋɑnm din tul Etiɑnn yɑnfɑntl bonciɑnn, k b k fit nyɑnn’ɔ nɑn u mɑɑn mɑnŋ.

¹¹ Bɑɑ din k fit nyɑnn’ɔ nɑ, k b din kuɑ nisiɑb ɑ bin yet ɑ nnɑ: «T gbɑt k u piɑk bonbilɑnkɑnt k biil Muois nɑn Yennu.»

¹² Bɑɑ yet nnɑ mɑnŋ yuo nbɑ, k niib nɑ nɑn sɑɑkɑb nɑn *senniwɑntieb wutuol duo, k b fiil k suol’ɔ, k sɑɑn nɑn’ɔ b yudɑnm tituk buol ni,

¹³ k b tɑn bɑɑl nɑn nisiɑb nnɑ biɑk ɑ bin fɑɑl fɑɑk, k yet ɑ: «Yuo kul juɑ nɑ tun piɑk k biil Yennu jɑɑnti ŋɑsɑɑkɑk mɑnŋ, nɑn Muois *senni nɑ e,

¹⁴ k mɑɑn t gbɑt k u yet ɑ Yiesu nbɑ tie Nɑɑsɑɑlet nilɔ nɑ sɑɑ bet Yennu jɑɑnti ŋɑsɑɑkɑk nɑ, ɑ ŋɑɑn lebt Muois kɑɑl nbɑ k u din senn nɑ.»

¹⁵ Bin nbɑ kul din lɑkn kɑl tituk mɑnŋ ni din kpɑɑ b ninbinɑ k goli Etiɑnn, k tɑn lɑ k u nunpo lebt k ji nɑɑn nɑn *mɑlɑkɑ nunpo nɑ.