Tuonɑ 26 - Yiesu Lɑbɑmɑnn Muɑl Ni

¹ L yuo nɑ k kpɑnbɑl Agliipɑ yet Pɔul ɑ: «N cɑb’ɑ mɔb. Pɑkn nyinn ɑ mɔnŋ.» K Pɔul tɑnt u nuu sɑnpɑɑpo ɑ wun pɑk k nyinn u mɔnŋ, k yet ɑ:

² «Kpɑnbɑl Agliipɑ, l mɑnŋ’n bonciɑnn nɑn mɑɑ sie ɑ tuɑnn ni dinnɑ, k yɑɑ n pɑk k nyinn n mɔnŋ, k jikt sɑɑ lin nbɑ kul k *Suifnbɑ tɑɑl’n nɑ po.

³ K biɑ jen ɑ, n mɔk pɑlpienn bonciɑnn nɑn mɑɑ sie ɑ tuɑnn ni nɑ, nɑn fɑɑ tie bɑntuɑ, k mi Suifnbɑ kɑɑl nɑn b mɔniɑɔk nbɑ tie biɑnŋ nbɑ kul nɑ. L pɑɑk, cɑnbɑɑ, n bɑln’mɑ e, di’n suklu k gbiint mɑɑ yɑɑ n pɑk lin nbɑ nɑ.

⁴ «Mɑɑ fiil n bisn ni wɑɑ nɑn mɔtɑɑnɑ, Suifnbɑ kul ɑ mi mɑɑ din tuu be biɑnŋ nbɑ n tinŋ ni nɑn Selusɑɑlenm biɑk.

⁵ B ponŋ mi’n k l fɔk. L i tie k b luon, b sɑɑ fit wɑnn nɑn n tuu wɑɑ Fɑɑliisiɑnnbɑ Yenjiɑntu sɔnu nbɑ mɑntk pɑɑl nɑ e.

⁶ K mɔtɑɑnɑ n ji sie k b bu n buut nɑ, mɑɑ mɔk dindɑnn nɑn mɔsonn nbɑ k Yennu din senn k tul t yejɑnm nɑ.

⁷ L mɔsonn mɑnŋ pɑɑk e k tinm Suifnbɑ buolu piik nɑn munle tuu mɔk dindɑnn k duki nɑn t tɑn sɑɑ lɑ. L pɑɑk te k b jiɑntl Yennu nɑn ninmɔnn yennu nɑn nyiɑɔk nɑ. Cɑnbɑɑ Agliipɑ, l dindɑnn mɑnŋ pɑɑk e lɑɑ, k Suifnbɑ tɑɑl’n nɑ.

⁸ Bee k l pɑɑl i pɑɑk nɑn k i tien yɑdɑ ɑ Yennu fiint kpienm i?

⁹ «Sinsinn, n mɔnŋ mɔnŋ din dukn nɑn l kpɑɑ tɑlɑs e nɑn k n tun bonsiɑl kul k biil Nɑɑsɑɑlet nilɔ Yiesu sɑnn.

¹⁰ Nnɑ e k n din tuun Selusɑɑlenm. Yennu mɑnntieb yudɑnm din tuu cɑb’n yiikuo k n so Yennu niib k kuɑnt’b dɑnsɑli. Bɑɑ din tuu bu b mɑɑn k tɑn gbenn k cɑb ɑ bin kpi’b nɑ, n mɔnŋ mun din tuu be bin nbɑ din tuu cɑb ɑ bin kpi’b nɑ kɑnn ni.

¹¹ «Yuo kul n din tuu tun k muksl’b Suifnbɑ jɑɑnti diet kul ni, k din tuu luon k bii noi ɑ b k wɑɑ Yiesu. N din mɑntk donn wutuol bonciɑnn b pɑɑk k l sɑɑ yɑkl ɑ. L pɑɑk, k n biɑ lek din tuu sɑɑ doi nbɑ be tingɑni ni, k sɑɑ muksl’b biɑk.»

Pɔul yet’b u binbenŋ lebtu po

¹² «Nnɑ e k n din sɑɑ Dɑɑmɑɑs siɑn yuo. Yennu mɑnntieb yudɑnm e din ponŋ cɑb’n yiikuo, k biɑ tul’n mɔb ɑ n tun nnɑ.

¹³ «Tɔn, Cɑnbɑɑ Agliipɑ, l din tie yensuuk ni e k n be sɔnu pɑɑk k sɑɑ, k tɑn lɑ k yentu nyii sɑnpɑɑpo k yien gɑl yennu k yent nyɔkt k lint min nɑn n tɔk-nɑn-lieb nɑ.

¹⁴ K t kul ɑ bɑɑ tinŋ ni, k n gbɑt k kunkɔl pɑk Suifnbɑ mɑɑn ni, k yin ɑ: ‹Sɔul, Sɔul, bee k ɑ muksl’n i? Fɑɑ tuu yien’n nɑ, l pɑɑk e te k l pɑɑl ɑ pɑɑk nɑn bonkobuk nbɑ tuu yien u dɑɑnɔ mɔb k u buo’u lɑnbɑnn nɑ.›

¹⁵ «K n jiin k boi ɑ: ‹A tie ŋmee?› K Yonmdɑɑnɔ jiin ɑ: ‹Min, Yiesu e, k ɑ muksl’n mɑnŋ.

¹⁶ Ŋɑɑn fiit k set. N nyinn fin e, ɑ ɑ tien n tuontunnɔ. L pɑɑk te k n dɔkt ɑ pɑɑk. Tient niib *siɑlɑ k wɑnn’b fɑɑ lɑ’n biɑnŋ nbɑ dinnɑ, nɑn lin nbɑ k n sii fiitl wɑnt’ɑ yuo nbɑ tɑn sɑɑ bɑɑl.

¹⁷ Mɑɑ tɑn sɑɑ tun’ɑ siɑn nbɑ nɑ, n biɑ tɑn sɑɑ nyinn’ɑ dɑɑl ni Suifnbɑ nɑn nilieb nii ni.

¹⁸ Fin e tie wun nbɑ sɑɑ yent b nunm po, k bin nyi bunbɔnn ni k kuɑ yentu ni, k biɑ nyinn’b *Sɑɑtɑn yiikuo ni k bin kuɑ Yennu yiikuo ni, ɑ bin lɑ nyikcɑbu k biɑ lɑ yiɑl bin nbɑ tie Yennu niib b yɑdɑ pɑɑk nɑ sinsuuk ni.› »

Pɔul wɑnt u tuonɑ

¹⁹ «L pɑɑk, Cɑnbɑɑ Agliipɑ, n din k yet *Yendɔunŋ ni yelntu mɑnŋ.

²⁰ Sinsinn n din sɑɑn Dɑɑmɑɑstieb penŋ e, k l puolpo k n din sɑɑn Selusɑɑlenmtieb nɑn bin nbɑ be Suude tinŋ ni doi kul po nɑn bin nbɑ k tie Suifnbɑ nɑ buol. N din muɑnt ɑ b kul n mɔ kuɑŋɑɑn k lebt binbenŋ kii wɑɑ Yennu sɔnu, kii tuun lin nbɑ wɑnn nɑn b set mɔ kuɑŋɑɑn k lebt binbenŋ nɑn mɔni.

²¹ «L din tie lin nbɑ nɑ pɑɑk e, k Suifnbɑ din suol’n, mɑɑ dɑɑ din be Yennu jɑɑnti ŋɑsɑɑkɑk ni nɑ, k b din luon k bin kpi’n.

²² Ŋɑɑn lɑɑ jii sɑɑ k tɑn tuu dinnɑ, k Yennu guu’n, k n ji be k sie k muɑntl u mɑɑn k tien tɑli nɑn pɑɑlb kul ɑ nɑ. N k pukn siɑl Muois nɑn *Yennu sɔkniinbɑ nbɑ din wɑnn lin nbɑ k l sɑɑ tien nɑ pɑɑk

²³ ɑ *Klistu tɑn sɑɑ fɑbl k kpo, k ŋuɑ e biɑ tɑn sii tie sinsinn dɑɑnɔ nbɑ tɑn sɑɑ fiil kuun ni, k l pɑɑk, k u biɑ tɑn sɑɑ muɑnt k tul Suifnbɑ nɑn bin nbɑ k tie Suifnbɑ mun biɑk, k yien’m mɑɑn nbɑ tɑn sii yentl b nunm po.»

²⁴ Pɔul nbɑ din piɑk ɑ wun nyinn u mɔnŋ nɑ, ŋɑnn e k Festus tiɑn u pɑɑk ŋɑɑn yet ɑ: «Pɔul, ɑ wɑɑt ɑ. A bɑnciɑɔnŋ pɑɑk e te k ɑ wɑɑt.»

²⁵ K Pɔul jiin ɑ: «Cɑnbɑɑ Festus, n k wɑɑt kɑɑ. Mɑɑn nbɑ k n piɑk nɑ, l tie bɑlmɔni e, k biɑ mɔk pɑɑk.

²⁶ Cɑnbɑɑ Agliipɑ, n mɔk pɑlcienn k sɑɑ pɑk k tul’ɑ, k mɑɑn ɑ mɔnŋ mi lin nbɑ nɑ po. N biɑ tien yɑdɑ nɑn mɑɑn mɑnŋ k bɔl ɑ buol, k mɑɑn lin nbɑ din tien mɑnŋ, l din k bɔl kɑɑ.

²⁷ Cɑnbɑɑ Agliipɑ, ɑ tien Yennu sɔkniinbɑ mɑɑn yɑdɑ wɑɑ ɑɑ? N lek mi nɑn ɑ tien yɑdɑ wɑɑ.»

²⁸ K kpɑnbɑl Agliipɑ jiin Pɔul ɑ: «Fin duki mi ɑ ɑ pinpɑɔk mintk nɑ sɑɑ fit dɑk’n k n tien Klistuweilɔ wɑɑ ɑɑ?»

²⁹ K Pɔul jiin ɑ: «N pinpɑɔk i fɔk ɑmi lɑɑ k fɔk, min yɑɑ Yenmiɑlu tie k fin nɑn niib kul ɑ nbɑ gbiintl n mɑɑn nɑ dinnɑ nɑ, n tien Yiesuweilɑ nɑn mɑɑ tie biɑnŋ nbɑ nɑ, ŋɑɑn jɑlt nbɑ nɑ kuukuɑ e k i kii mɔk.»

³⁰ Ŋɑnn e k kpɑnbɑl nɑ nɑn yudɑɑnɔ nɑ nɑn Beleniis, nɑn bin nbɑ kul kɑl lenŋ nɑ kul fiil k nyii.

³¹ Bɑɑ yɑɑ bin ji yɑt yuo nbɑ, k b ji yien b lieb ɑ: «Juɑ nɑ tɑɑn k tun biit k l jɑnŋ nɑn bin kpi’u, ɑmi k kuɑn’ɔ dɑnsɑlk.»

³² K kpɑnbɑl Agliipɑ yet Festus ɑ: «Juɑ nɑ i dɑɑn bo i kii miɑl ɑ u sɑɑ gɑɑn u mɑɑn nɑ kpɑnbɑlɑ yudɑɑnɔ Sesɑɑl penŋ, t bo sɑɑ fit ŋɑɑ’u wɑɑ.»