Tuonɑ 25 - Yiesu Lɑbɑmɑnn Muɑl Ni

Pɔul gɑɑnt u mɑɑn Sesɑɑl buol

¹ Yudɑɑnɔ Festus nbɑ bɑɑl Sesɑɑle, l dɑɑ ŋɑntɑ dɑɑl k u nyii lenŋ k duo Selusɑɑlenm.

² Lenŋ e k Yennu mɑnntieb yudɑnm nɑn *Suifnbɑ yudɑnm bɑɑl Festus penŋ k pɑk pɑɑn Pɔul mɑɑn nɑ, ŋɑɑn miɑl Festus

³ ɑ wun te k b pɑlɑ i mei, k te k Pɔul n bɑɑl Selusɑɑlenm, k mɑɑn b din lol lol ɑ bin bɔl k lɑɑ k tɑn kpi Pɔul sɔnu ni.

⁴ Ŋɑɑn Festus jiin ɑ: «Pɔul be dɑnsɑlk ni Sesɑɑle, k n mɔnŋ mɔnŋ lek sɑɑ ŋmɑt k sɑɑn lenŋ dɑɑ ŋɑnlele nɑ wɑɑ.

⁵ L pɑɑk, ŋɑɑnt mɑn k i yudɑnm n wei’n, k tin sik Sesɑɑle. L i tie k juɑ nɑ tun bonbiil i e, bin tɑɑl’ɔ.»

⁶ Festus din dii nɑn dɑɑ ŋɑnniin ɑmi dɑɑ piik nɑ k be nɑn’m, k tɑn fit k ŋmɑt Sesɑɑle, k l yent sɑn-nyiɑɔk ni, k u ji kɑl u buut pɑɑk k te k b nyinn Pɔul k bɑɑl nɑn’ɔ.

⁷ Pɔul nbɑ bɑɑl yuo nbɑ nɑ, k Suifnbɑ nbɑ nyii Selusɑɑlenm nɑ, fiil k ŋɑɑ lint Pɔul k tɑɑl’ɔ bonbiil, ŋɑɑn biɑ lek k fit wɑnn nɑn l tie mɔni e.

⁸ Ŋɑnn e k Pɔul pɑk u mɔnŋ mɔnŋ pɑɑk k yet ɑ: «N k tun k biil Suifnbɑ *senni ni. N biɑ k tun k biil Yennu jɑɑnti ŋɑsɑɑkɑk siɑl, ɑmi Luonmtieb kpɑnbɑlɑ yudɑɑnɔ Sesɑɑl.»

⁹ Ŋɑɑn k Festus luon k wun penn Suifnbɑ pɑlɑ. L pɑɑk, k u boi Pɔul ɑ: «A sɑɑ sɑk k ɑ sɑɑn Selusɑɑlenm, k n sɑɑ bu ɑ buut lenŋ ii?»

¹⁰ K Pɔul jiin k yet’ɔ ɑ: «N kpɑn dɑɑ sie Luonm yent kul ni kpɑnbɑlɑ yudɑɑnɔ buut bunbubuol e nɑ. Ŋɑnn i ŋɑn nɑn k ɑ bu n buut. N k tun Suifnbɑ bisiɑt, k ɑ mɔnŋ mɔnŋ mun biɑ mi nnɑ.

¹¹ Mi i bo i mɔk biit i e, k tun lin nbɑ jɑnŋ nɑn kuun, n kɑn yet ɑ n fit nyi kuun ni. Ŋɑɑn l i tie k b tɑɑl’n yɑnn i e, suɑ kɑn fit jii’n k kubn’n b nuu ni. Ŋɑɑn sie k n gɑɑn n mɑɑn mɑnŋ Luonm yent kul kpɑnbɑlɑ yudɑɑnɔ Sesɑɑl buol.»

¹² Ŋɑnn e k Festus pɑk nɑn u sɑɑkɑb mɑɑn mɑnŋ po, ŋɑɑn yet Pɔul ɑ: «A gɑɑn ɑ mɑɑn Luonm yent kul kpɑnbɑlɑ yudɑɑnɔ Sesɑɑl buol ɑ. L pɑɑk, ɑ set sɑɑ sɑɑn ɑ.»

Kpɑnbɑl Agliipɑ nɑn u ŋɑɑpuo gbiintl Pɔul mɑɑn

¹³ Dɑɑ ŋɑnle nnɑ nbɑ gɑl, k kpɑnbɑl Agliipɑ nɑn u ŋɑɑpuo Beleniis tɑn bɑɑl Sesɑɑle ɑ bin fuont yudɑɑnɔ Festus.

¹⁴ Bɑɑ din sɑɑ tien lenŋ dɑɑ ŋɑnŋɑ nɑ, k Festus tɑn wɑnn kpɑnbɑl nɑ, Pɔul mɑɑn nbɑ tie biɑnŋ nbɑ, k yet ɑ: «Feliiks dɑɑn yɑɑt, ŋɑɑn ŋɑɑn suɑ dɑnsɑlk ni.

¹⁵ Mɑɑ dɑɑn sɑɑn Selusɑɑlenm yuo nbɑ nɑ, k Suifnbɑ sɑɑkɑb nɑn jɑɑnti yudɑnm dɑɑn puot’ɔ, k yɑɑ ɑ n bu u mɑɑn mɑnŋ k kpi’u.

¹⁶ K n mun jiin k yet’b ɑ: ‹Tinm Luonmtieb yɑɑ buol ni ŋɑnin, l k tie t kɑɑl kɑɑ k tin cɑb ɑ bin kpi wun nbɑ k b tɑɑl’ɔ nɑ k suɑ ŋuɑ nɑn bin nbɑ tɑɑl’ɔ nɑ dɑɑ k tuok lieb k u lɑ yɑɑk k pɑk u mɔnŋ pɑɑk.›

¹⁷ «L pɑɑk, b kul ɑ nbɑ dɑɑn tɑn bɑɑl nnɑ yuo nbɑ, n k tɑɑntl, k l yent sɑn-nyiɑɔk ni k n kɑl n buut pɑɑk ŋɑɑn tul mɔb k b kuɑ nɑn Pɔul.

¹⁸ «Bin nbɑ tɑɑl’ɔ nɑ fiil k set, ŋɑɑn b k tɑɑl’ɔ nɑn mɑɑ dɑɑn bo duki mi ɑ b sɑɑ tɑɑl’ɔ biɑnŋ nbɑ nɑ.

¹⁹ Ŋɑɑn b kpɑn noi mɔniɑɔk k jikt sɑɑ b mɔnŋ mɔnŋ Yenjiɑntu po, nɑn jɑsuɑ nbɑ din kpo, k u sɑnn yi Yiesu nɑ, wun nbɑ k Pɔul lek yien yɑɑ ɑ u be u mɑnfuol ni nɑ.

²⁰ «K l mɑɑn jɑl’n. L pɑɑk, k n boi Pɔul ɑ u sii luon wun sɑɑn Selusɑɑlenm k n sɑɑ bu u mɑɑn lenŋ ii?

²¹ K u yet ɑ bii diɑ’u dɑnsɑlk ni mɔkmɔk nɑn yuo nbɑ k b tɑn sɑɑ sɑɑn nɑn’ɔ kpɑnbɑlɑ yudɑɑnɔ buol, k wun sɑɑ jiɑl u mɑɑn mɑnŋ. Ŋɑnn e k n tul mɔb mɑɑ bii guu’u, mɔkmɔk nɑn yuo nbɑ k n tɑn sɑɑ fit tun’ɔ kpɑnbɑlɑ yudɑɑnɔ penŋ.»

²² K kpɑnbɑl Agliipɑ yet Festus ɑ: «N mɔnŋ mɔnŋ luon k n gbɑt nilɔ mɑnŋ mɔb ni.» K Festus jiin’ɔ ɑ: «Wonn e wɑɑ k ɑ won sɑɑ gbɑt u mɔb ni.»

²³ K l yent sɑn-nyiɑɔk ni, k kpɑnbɑl Agliipɑ nɑn u ŋɑɑpuo Beleniis muk mukt bonciɑnn, k sejenm yudɑnm nɑn duo nɑ yudɑnm wei b puol k bɑɑl kuɑ buut dieok nɑ ni, k yudɑɑnɔ Festus ji tun *tuomi ɑ bin jii Pɔul k bɑɑl nɑn’ɔ nɑ.

²⁴ Ŋɑnn e k Festus yet ɑ: «Kpɑnbɑl Agliipɑ nɑn yinm nbɑ kul be nnɑ nɑ, i lɑ juɑ nɑ nbɑ nɑ wɑɑ! Suifnbɑ nbɑ be nnɑ nɑ nɑn bin nbɑ kul be Selusɑɑlenm bɑɑl n buol nnɑ k tɑɑl’ɔ, k yɑki kpɑyɑkt nɑn’n, k yɑɑ ɑ l k ŋɑn k wuu be.

²⁵ Min ŋɑnin lɑ k u k tun bisiɑt nbɑ k l jɑnŋ nɑn kuun, ŋɑɑn wɑɑ ponŋ yɑɑ ɑ u luon k wun gɑɑn u mɑɑn mɑnŋ kpɑnbɑlɑ yudɑɑnɔ penŋ nɑ e, k n dukn mɑɑ n te k wun sɑɑn.

²⁶ Ŋɑɑn n k mi mɑɑ sɑɑ diɑn kɑdɑɑɔk k tul kpɑnbɑlɑ yudɑɑnɔ nɑ k pɑk’ɔ lin nbɑ k sɑɑn gɑɑn u po. Ŋɑnn e te k n bɑɑl nɑn’ɔ i kul nunm nnɑ, ŋɑɑn l mɑntk kpɑɑ fin kpɑnbɑl Agliipɑ e. L pɑɑk, u buboit fiitu puolpo, n sii mɔk mɑɑn nbɑ k n sɑɑ fit k diɑn,

²⁷ k mɑɑn l kɑɑ pɑɑk nɑn k n te k dɑnsɑlk n sɑɑn kpɑnbɑlɑ yudɑɑnɔ penŋ, ŋɑɑn k n kɑn fit wɑnn wɑɑ biil lin nbɑ.»