Tuonɑ 19 - Yiesu Lɑbɑmɑnn Muɑl Ni

Efes duo lɑbɑɑl

¹ Apuoluos nbɑ din dɑɑ be Kuolent nɑ, k Pɔul ŋɑnin din gɑl yɑkl nbɑ mɔk juɑt nɑ k sɑɑn Efes. Lenŋ e k u din sɑɑ lɑ Yiesuweisiɑb,

² k boi’b ɑ: «Yɑɑ tien Yiesu yɑdɑ k wɑɑ’u nɑ, i mi k gɑɑl Foŋɑnm ii?» K b jiin ɑ: «Aɑi. T ponŋ tɑɑn k mi k gbɑt ɑ Foŋɑnm be kɑɑ wɑɑ gbɑɑ.»

³ K Pɔul boi’b ɑ: «K ŋɑnn, b wul’i wulbuol-lɑnu po e?» K b jiin ɑ: «B wul’t nɑn Sɑn nbɑ din wuul niib biɑnŋ nbɑ nɑ e.»

⁴ K Pɔul yet’b ɑ: «Sɑn din wuul niib Yennu nyunwulu, k l wɑnt ɑ bin mɔ kuɑŋɑɑn k lebt binbenŋ, ŋɑɑn yien’m ɑ bin tien wun nbɑ tɑn sɑɑ bɑɑl nɑ yɑdɑ, k ŋuɑ e tie Yiesu.»

⁵ Bɑɑ gbɑt nnɑ yuo nbɑ, k b ji wul’b Yennu nyunwulu Yonmdɑɑnɔ Yiesu sɑnn ni.

⁶ K Pɔul jii u nii ŋɑɑn yii b pɑɑk k Foŋɑnm sik kuɑ b ni, k b ji piɑk bɑlgɑni, k biɑ piɑk sɔknt Yennu mɑɑn.

⁷ Jɑb mɑnŋ din tie nɑn piik nɑn bɑnle nɑ e.

⁸ L din tie ŋmɑɑli ŋɑntɑ e k Pɔul ji din sɑɑn Suifnbɑ jɑɑnti dieok ni, k fɑɑ lɑbɑɑl nɑn niib nɑn pɑlcienn, k yɑbi u mɔnŋ ɑ wun kpint b yɑn k jikt sɑɑ Yennu nɑɑn po.

⁹ Ŋɑɑn niib nɑ siɑb din tie tubkɑngbɑtɑ dɑnm e, k din k sɑk mɑɑn nɑ, ŋɑɑn piɑk bɑlbiit nibul nɑ ni, k biil Yonmdɑɑnɔ weiu sɔnu. Ŋɑnn e k Pɔul nyik’b, ŋɑɑn jii Yiesuweilɑ nɑ k sɑɑn nɑn’m Tiilɑɑnus sɑkul dieok ni, k dɑɑl kul jik k u fɑɑ lɑbɑɑl nɑn niib lenŋ.

¹⁰ L din jii nnɑ k bɑɑl binɑ ŋɑnle. K niib kul ɑ nbɑ din be Asii tinŋ ni k tie *Suifnbɑ, nɑn nilieb kul ɑ, din gbɑt Yonmdɑɑnɔ mɑɑn mɑnŋ ɑ.

Sefɑ wɑɑs lɑbɑɑl

¹¹ L yuo nɑ k Yennu din te k Pɔul tuun bɑktnɔunŋ tuonjɑɑnɑ nbɑ be l kuɑ.

¹² Nnɑ e k niib din tuu jii cincenɑ nɑn nunfiɑni nbɑ sii Pɔul gbɑnɑnt nɑ, k sɑɑn tul b bɑɑtb k b yiɑli nɑ nyik’b k nɑlnbiit nyi b ni.

¹³ L yuo nɑ k Suif nisiɑb din be, k din tuu lin k nyint nɑlnbiit niib ni, k b biɑ din tuu bikn ɑ bin jii Yonmdɑɑnɔ Yiesu sɑnn kii nyint nɑlnbiit, k b din biel nɑlnbiit nɑ ɑ: «Min e tul’i mɔb Yiesu sɑnn ni, wun nbɑ k Pɔul muɑntl u mɑɑn nɑ, nyimin mɑn.»

¹⁴ Bin nbɑ din tuun nnɑ mɑnŋ din tie jɑb bɑnlole nbɑ din tie *Suifnbɑ Yennu mɑnntieb yudɑɑnsuɑ Sefɑ wɑɑs e.

¹⁵ Ŋɑɑn nɑlnbiiuk jiin k yet’b ɑ: «N mi Yiesu, k biɑ mi Pɔul po, ŋɑɑn k yinm mun, i tie ŋmee?»

¹⁶ K juɑ nbɑ k nɑlnbiiuk nɑ din be u ni nɑ yukl k tɑn cib’b bii, nɑn pɑnŋ, k nyɑnn’b, k tul’b dɑni, k biɑ pɑt pɑt b tiɑt, k b kul ɑ ciɑl gbɑnɑnbilɑ, k nyii u ŋɑɑk ni.

¹⁷ Yuo nbɑ k Suifnbɑ nɑn bin nbɑ k tie Suifnbɑ kul ɑ nbɑ be Efes nɑ gbɑt nnɑ, k jɑŋmɑɑni ji suol b kul ɑ, k b bɑɑk Yonmdɑɑnɔ Yiesu sɑnn bonciɑnn.

¹⁸ Ŋɑnn e k bin nbɑ din tɑn tien yɑdɑ nɑ bonciɑnn pɑk kɑt b nɔi ni biit, niib ni, k wɑnn lin nbɑ k b tuu tuun.

¹⁹ K linŋin dɑnm bonciɑnn ji tikl b kɑdɑɑt nɑn b sɑbɑ k bɑɑl nɑn’n, k tɑn juo muu niib kul nuni ni, k b kɑn kɑdɑɑt nɑ yɑbnt likli, k l tie likli kut binɑ tusɑ piinŋmu.

²⁰ Ŋɑnn e din te k Yonmdɑɑnɔ mɑɑn ji din ŋɑnmt yɑt k kuɑ niib ni, k puki nɑn pɑnŋ.

Niib wɑɑ dɑɑmi Pɔul

²¹ L puolpo k Pɔul dukn ɑ u sɑɑ gɑɑl Mɑɑseduɑnn nɑn Akɑɑyi po e, k sɑɑn Selusɑɑlenm, k yet ɑ: «L puolpo, l tie k n sɑɑn Luonm.»

²² L pɑɑk, k u tun Tiimuote nɑn Elɑst, u sonmtieb ni bɑnle, ɑ bin gɑl u tuɑnn po k sɑɑn Mɑɑseduɑnn, ŋɑɑn k u din biɑl Asii tinŋ ni.

²³ L yuo mɑnŋ dɑɑmuk bonbiil din fiil k jikt sɑɑ Yonmdɑɑnɔ weiu po.

²⁴ K jɑsuɑ nnɑ mun din be k u sɑnn yi Demetlius, k u tuu jikt likli kut k din mɑɑ b yennu nbɑ k b yi’u *Altemiis nɑ puociɑnfei, l bonninnɑnɑ, k l tie pɑtɑ, k u kɔi, k din jii niib k b tuun u tuonɑ, k b lɑɑt likli bonciɑnn.

²⁵ Ŋɑnn e k u tɑn yiin’m k tɑɑn b kul ɑ, k biɑ tɑɑn bin nbɑ kul kul tuun l tuonbuolu nɑ, k tɑn yet’b ɑ: «N ninjɑnm, i mi nɑn t nyuɑt nyi t tuonɑ nɑ ni e.

²⁶ I mɔnŋ mɔnŋ mun ponŋ gbɑt k biɑ lɑ Pɔul nbɑ yien lin nbɑ nɑ. U yɑɑ ɑ nilɔ nbɑ mɑɑ yenni nɑn u nii, ɑ ŋɑnn k tie yenni kɑɑ, k u mɑɑn nɑ tunn niib bonciɑnn yɑn Efes nnɑ k sɑɑn pel lin gbenn Asii doi kul ɑ.

²⁷ Pɑsiɑl k t tuonɑ nɑ sɑnn tɑn sɑɑ kpet mɑnn biil, k biɑ jen ɑ, k t yɑbnt yennu Altemiis puociɑnfiek tɑn sɑɑ kpet mɑnn k tien yɑnn, k biɑ jen ɑ, k t yennu Altemiis nibɑɑkl tɑn sɑɑ mɑnn k wɑɑb, dɑɑnɔ nbɑ k suɑ kul nbɑ be Asii tinŋ ni nɑn tingbounŋ nɑ kul ɑ jiɑntl’ɔ nɑ.»

²⁸ Nibul nɑ nbɑ gbɑt nnɑ yuo nbɑ, k b wutuol fiil, k b tiɑn tintiɑni, k yɑɑ ɑ: «Tinm Efestieb yennu Altemiis tie yɑbnt yennu e.»

²⁹ K duo nɑ kul muk. K b suol Gɑius nɑn Aliistɑɑlk k ciɑl sɑɑn kuɑ nɑn’m nibul ni. Jɑb bɑnle mɑnŋ din tie Mɑɑseduɑnn niib, bin nbɑ k Pɔul tuu tɔki nɑn’m nɑ.

³⁰ K Pɔul luon k wun kuɑ niib nɑ ni, ŋɑɑn k Yiesuweilɑ k sɑk ɑ wun kuɑ.

³¹ K duo nɑ yudɑnm ni siɑb nbɑ din tie Pɔul yuɑsnbɑ din tun *tuomi ɑ Pɔul n di suklu, k dɑɑ kuɑ nibul mɑnŋ ni.

³² L yuo nɑ, nibul mɑnŋ ni, siɑb din tiɑn tintiɑni, k yɑki kpɑyɑkt jiɑk jiɑk, k niib nbɑ tikl nɑ yɑn ŋmɑt sɑɑ gɑl, k mɑɑn b bonciɑnn din k bɑnn b lɑknu mɑnŋ pɑɑk.

³³ Tɔn, k Suifnbɑ nyinn jɑsuɑ nbɑ k b yi’u Aleksɑndl, k senn’ɔ b tuɑnn, ɑ wun pɑk b pɑɑk k tul’b. K Aleksɑndl donn nuu sɑnpɑɑpo, ŋɑɑn ji luon wun pɑk tul nibul nɑ k nyinn Suifnbɑ mɔniɑɔk mɑnŋ ni.

³⁴ Ŋɑɑn bɑɑ tɑn bɑnn nɑn u tie Suif nilɔ nɑ, k b kul ji tiɑn tintiɑni, k yien ɑ: «Tinm Efestieb yennu Altemiis tie yɑbnt yennu e.» K b kul tiɑn nnɑ k wei bonciɑnn.

³⁵ L juontu k duo mɑnŋ sɑɑkuɑ te k nibul nɑ ŋmin, ŋɑɑn k u yet’b ɑ: «Yinm Efestieb, suɑ kɑɑ tingbounŋ nɑ ni k k mi nɑn Efestieb e guu k goli yɑbnt Altemiis puociɑnfiek, ŋɑɑn mun guu k goli Altemiis ninnɑɔnŋ nbɑ nyii sɑnpɑɑpo k tɑn bɑɑ nɑ.

³⁶ Suɑ biɑ kɑɑ k sɑɑ fit noi lin nbɑ nɑ. L pɑɑk, l ŋɑn k i di suklu, k dɑɑ tie jɑti.

³⁷ I bɑɑl nɑn niib nɑ nnɑ nɑ, ŋɑɑn k b k jɑn t pɑtɑ bont. B biɑ k piɑk k suki’i biil t yennu.

³⁸ L i tie k Demetlius nɑn u tuontunlieb mɔk mɑɑn nɑn suɑ i e, ŋɑnn buut buol ponŋ be k mɔk l dɑɑ, k buut dɑnm mun biɑ be. Ŋɑɑnt bin sɑɑn kii sɑɑ i puotl b lieb lenŋ.

³⁹ L i tie k i mɔk bɑlsɑi k sɑɑ pukn, l ŋɑn k yin sɑɑn yudɑnm buol.

⁴⁰ Setk nɑn mɔni, pɑsiɑl Luonmtieb tɑn sɑɑ mɑnn lɑ t biit, k yet ɑ t tie doyieltieb e, k jikt sɑɑ lin nbɑ tien dinnɑ nɑ po, k l k mɔk pɑɑk, k t mun biɑ kɑn fit wɑnn l pɑɑk k jikt sɑɑ dɑɑmuk nɑ po.»

⁴¹ U yet nnɑ e, ŋɑɑn ji yɑt niib nɑ.