Tuonɑ 13 - Yiesu Lɑbɑmɑnn Muɑl Ni

Bɑɑlnɑɑbɑɑs nɑn Sɔul gɑnnu

¹ Antiɑɔs duo ni e k *Yennu sɔkniinbɑ siɑb nɑn wɑntesiɑb din be *Klistu mɔtɑɑɔk niib nɑ ni. Ŋɑnm e din tie Bɑɑlnɑɑbɑɑs nɑn Siimeɔn (wun nbɑ k b din yi’u Jɑbɔnŋ nɑ), nɑn Lusius, wun nbɑ din nyii Siilenn nɑ, nɑn Mɑɑnɑenn (b din lɑkn wubi Mɑɑnɑenn nɑn kpɑnbɑl *Heluod e b bisn ni), nɑn Sɔul.

² K dɑsiɑl k b dɑɑ din be k jiɑntl Yonmdɑɑnɔ k loln mɔi, k Foŋɑnm tɑn yet’b ɑ: «Nyint Bɑɑlnɑɑbɑɑs nɑn Sɔul, k bin tun tuonn nbɑ k n yiin’m ɑ bin tun nɑ.» K b nyinn’b.

³ L puolpo k b biɑ lol mɔi k miɑl Yennu k yii nii b pɑɑk ŋɑɑn cɑb’b.

Siipl tinŋ lɑbɑɑl

⁴ Yuo nbɑ k Foŋɑnm din tun Bɑɑlnɑɑbɑɑs nɑn Sɔul k b din sik Selusi k kuɑ ŋɑlunŋ, k sɑɑ bɑɑl Sɑɑlɑɑmiinn nbɑ din be Siipl tinŋ ni nɑ,

⁵ k nyii ŋɑlunŋ ni lenŋ, k sɑɑ *Suifnbɑ jɑɑnti diet ni, k muɑntl Yennu mɑɑn k tien’m. K Sɑn-Mɑɑlk din tie b kpɑɑkl k be nɑn’m.

⁶ L puolpo e k b din nyii Sɑɑlɑɑmiinn, k gɑɑl tinŋ mɑnŋ doi kul ni, k sɑɑ bɑɑl Pɑɑfuos. Lenŋ e k b din lɑ nyɔkluulsuɑ, k u sɑnn yi Bɑɑl-yiesu, k u din tie Suif nilɔ nbɑ kpɑnn ɑ u tie Yennu sɔkni

⁷ U din be Siipl tinŋ ni yudɑɑnɔ buol e, k yudɑɑnɔ mɑnŋ sɑnn din yi Seljius Pɔulus, k u din tie yɑndɑɑnɔ e, k din yiin Bɑɑlnɑɑbɑɑs nɑn Sɔul ɑ bin tɑn pɑk Yennu mɑɑn k wun gbɑt.

⁸ Ŋɑɑn k nyɔkluulɔ mɑnŋ, wun nbɑ sɑnn din yi Eliimɑɑs, Glek mɑɑn ni nɑ, k u k sɑk’b ŋɑɑn kol ɑ wun tiɑ yudɑɑnɔ mɑnŋ k u dɑɑ tie Yiesu yɑdɑ.

⁹ Ŋɑnn e k Foŋɑnm fiil Sɔul ni, wun nbɑ sɑnn mun din yi Pɔul nɑ, k u got nyɔkluulɔ nɑ silll, k tɑn yet’ɔ ɑ:

¹⁰ «Fin e tie pol bijɑ, k biɑ tie tuonŋɑnɑ kul dɑtɑɑk. Fin nibiiuk nbɑ gbie nɑn kpinkpɑnni nɑ. A kɑn bɑn nyik fɑɑ tuu jii Yennu bɑlmɔni k kpintl’l fɑɑk nɑ ɑɑ?

¹¹ Tɔn, Yennu nuu sɑɑ pɑɑ’ɑ k ɑ juɑn k kɑn lɑ yentu k lin yɑnn ɑ.» L tɑɑkpɑɑk ni, k wunn nbɑ bɔn bɑɑ u ninbinɑ ni, k u ji sonm k tuln, k luon suɑ n suol u nuu k dɑt’ɔ.

¹² K yudɑɑnɔ nɑ nbɑ lɑ lin nbɑ tien nɑ, k u tien Yiesu yɑdɑ, k mɑɑn u yɑn din kuɑ nɑn lin nbɑ k u ji bɑnn k jikt sɑɑ Yonmdɑɑnɔ po nɑ.

Pɔul nɑn Bɑɑlnɑɑbɑɑs muɑntl Yennu mɑɑn

¹³ L puolpo e jik k Pɔul nɑn u wei-nɑn-lieb kuɑ ŋɑlunŋ, k nyii Pɑɑfuos k sɑɑn Pelj nbɑ din be Pɑnfiili tinŋ ni nɑ. Lenŋ e k Sɑn-Mɑɑlk din nyik’b ŋɑɑn ŋmɑt sɑɑn Selusɑɑlenm.

¹⁴ K b sɑɑ tuɑt k nyii Pelj, k bɑɑl Antiɑɔs nbɑ din be Piisiidi tinŋ ni nɑ. K *Fuondɑɑl k b sɑɑn kuɑ Suifnbɑ jɑɑnti dieok ni k kɑl,

¹⁵ k lɑ k b lii Muois *senni ni nɑn Yennu sɔkniinbɑ diɑni ni, k Suifnbɑ jɑɑnti dieok mɑnŋ ni sɑɑkɑb yet’b ɑ bin yet Pɔul nɑn Bɑɑlnɑɑbɑɑs ɑ: «T nɑɑ wɑɑs, l i tie k i mɔk lɑbɑŋɑnn nbɑ i e k sɑɑ pɑk k tul’t, yin pɑk.»

¹⁶ K Pɔul fiil k set k donn nuu ŋɑɑn piin pɑku, k yɑɑ ɑ: «Yinm Islɑɑeltieb nɑn yinm nbɑ kul be k jiɑntl Yennu nɑ, gbiintl mɑn.

¹⁷ Islɑɑeltieb Yennu din lukt t yejɑnm k te k b yɑbt bonciɑnn, yuo nbɑ k b dɑɑ din tie sɑɑnm k be Ejipt tinŋ nnɑ, k ŋuɑ Yennu din jii u yiikuo k nyinn’b lenŋ.

¹⁸ K bɑɑ din be muuk ni binɑ piinnɑ k u lek suol u yɑn nɑn’m.

¹⁹ Ŋɑɑn l puolpo k u biil nibuolu munlole nbɑ din be Kɑɑnɑɑn tinŋ nnɑ, ŋɑɑn te k u mɔnŋ niib Islɑɑeltieb yent tinŋ mɑnŋ.

²⁰ K lin nbɑ nɑ kul din wei binɑ kobiinnɑ nɑn piinŋmu. «Yuo nbɑ k b din yent tinŋ mɑnŋ nɑ, k u din tul’b yudɑnm ɑ bii bu b mɑɑn dɑɑnn nɑn yuo nbɑ k Yennu sɔkni Sɑɑmuel tɑn sɑɑ bɑɑl.

²¹ K l puolpo, b biɑ din tɑn boi Yennu ɑ wun tul’b kpɑnbɑl. Ŋɑnn e k Yennu din lukt Sɔul, wun nbɑ din tie Kiis bijɑ, Bensɑɑmen buolu ni nilɔ nɑ, ɑ wuu tie b kpɑnbɑl, k u din dii nɑɑn mɑnŋ binɑ piinnɑ.

²² K Yennu din tɑn liɑt’ɔ u nɑɑn ni, ŋɑɑn dinn Dɑɑfiid ɑ wuu tie b kpɑnbɑl jik. Nnɑ e k Yennu din pɑk Dɑɑfiid po ɑ: ‹N bɑnn nɑn Dɑɑfiid, wun nbɑ tie Sese bijɑ nɑ, mɑntk gbuot n nunm, k u sɑɑ tun lin nbɑ kul k n luon nɑ.›

²³ «Juɑ nɑ yɑɑbuonɑ ni e, k Yennu din nyinn t Fietuɑ Yiesu, k tien’ɔ Islɑɑeltieb ni, nɑn wɑɑ din senn mɔsonn biɑnŋ nbɑ nɑ.

²⁴ Ŋɑɑn Sɑn wun nbɑ din wuul niib Yennu nyunwulu nɑ e din dɔnŋ bɑɑlu k din muɑntl tien Islɑɑeltieb kul ɑ, ɑ bin mɔ kuɑŋɑɑn k lebt binbenŋ, k wun wul’b Yennu nyunwulu.

²⁵ U tuonn nbɑ ji din tɑn gbent nɑ, k u boi’b ɑ: ‹I duki mi ɑ n tie ŋmee? N k tie wun nbɑ k i guu’u k u sɑɑ bɑɑl nɑ kɑɑ. Gotl mɑn, ŋuɑ e yɑɑ wun tɑn bɑɑl n puolpo, k n kii ŋɑn nɑn k n pit u tɑɑsɑɑt.› »

²⁶ Ŋɑnn e k Pɔul biɑ yɑɑ ɑ: «N nɑɑ wɑɑs, yinm nbɑ tie Ablɑɑhɑɑnm yɑɑbuonɑ, nɑn i kul nbɑ be nnɑ k jiɑntl Yennu nɑ, mɑɑn nbɑ k Yennu tul’t k l wɑnt fielu mɑnŋ po nɑ, l bɑɑl t buol ɑ.

²⁷ Niib nɑ nbɑ din be Selusɑɑlenm, nɑn b yudɑnm nɑ, b din k mi Yiesu nbɑ tie wun nbɑ, k biɑ k bɑnn Yennu sɔkniinbɑ mɑɑn nbɑ k b tuu lii Fuondɑɑl kul nɑ pɑɑk, ŋɑɑn bɑɑ din bu u buut k yɑɑ u ŋɑn nɑn kuun e nɑ, b din gbien Yennu sɔkniinbɑ mɔi mɑnŋ ɑ.

²⁸ B din k lɑ u bisiɑt nbɑ tie lin nbɑ k b yɑɑ bin kpi’u, ŋɑɑn lek biɑ yɑɑ ɑ *Piilɑɑt n kpi’u.

²⁹ Bɑɑ din tien Yiesu lin nbɑ nɑ kul gbenn nɑn Yennu lolkpel kɑdɑɑɔk nbɑ din wɑnt biɑnŋ nbɑ nɑ, l yuo k b kpɑɑt’ɔ dɑpunpunn nɑ pɑɑk k sikn’ɔ k pii’u kɑɑɔk ni,

³⁰ ŋɑɑn k Yennu fiin’ɔ kuun ni.

³¹ Dɑɑ bonciɑnn ni k Yiesu din jii u mɔnŋ k wɑnn nɑn u be mɑnfuol ni k tul bin nbɑ din tuu tɔki nɑn’ɔ k nyi Gɑɑliile, k lin tieee k tɑn gbenn k bɑɑl Selusɑɑlenm nɑ. B ji tie u siɑlɑɑdɑnm mɔtɑɑnɑ k tien t niib.

³² «T mɔnŋ mɔnŋ e bɑɑl nɑn lɑbɑmɑnn mɑnŋ. Mɔsonn nbɑ k Yennu din senn k tul t yejɑnm nɑ,

³³ wɑɑ din fiin Yiesu kuun ni nɑ, u ji gbien mɔsonn mɑnŋ. Nnɑ e k l diɑn Yennu lolkpel kɑdɑɑɔk ni, *yɑni nbɑ tie munle nɑ kɑdɑɑɔk nuɑk ni, ɑ ŋuɑ Yennu yet’ɔ ɑ: ‹Fin e tie n Bijɑ, k lɑɑ jii dinnɑ k sɑɑ n tie ɑ Bɑɑ e.›

³⁴ Yennu din yet ɑ u sɑɑ fiin’ɔ kuun ni k u gbɑnɑnt dɑɑ bɑt, k yet ɑ: ‹Mɔsonɑ nbɑ k n mɔnŋ mɔnŋ din senn, k yɑɑ ɑ n sɑɑ tul Dɑɑfiid nɑ, sie k n set gbenn tul’ɑ.›

³⁵ Yennu lolkpel kɑdɑɑɔk ni siɑl buol l yet ɑ: ‹A kɑn sɑk k ɑ Niŋɑnɔ gbɑnɑnt n kpɑkn kɑɑɔk ni k bɑt.›

³⁶ Tɔn, Dɑɑfiid din tun lin nbɑ k Yennu din luon nɑ, k l puolpo k u din tɑn kpo, k b pii’u u yejɑnm kɑɑɔk ni, k u gbɑnɑnt bɑt.

³⁷ Ŋɑɑn Yennu nbɑ din fiin Yiesu kuun ni nɑ, ŋuɑ yɑɑ gbɑnɑnt k bɑt kɑɑɔk ni.

³⁸ «L pɑɑk ɑmi, n nɑɑ wɑɑs, n luon k i bɑnn nɑn Yiesu nbɑ din tun lin nbɑ nɑ pɑɑk e k Yennu nyikt cɑbt i biit.

³⁹ Yiesu pɑɑk e k Yennu ji yet ɑ wun nbɑ kul tien yɑdɑ nɑ tie niŋɑnɔ bonɑ kul ni bɑnnu nbɑ k Muois senni din k fit tun k tul’i ni.

⁴⁰ «L pɑɑk, suot i mɔnŋ mɑn k dɑɑ te k Yennu sɔkniinbɑ nbɑ din yet lin nbɑ nɑ k lin tɑn di’i ni. Nnɑ e k Yennu din yet ɑ:

⁴¹ ‹Gotl mɑn yinm jɑpɑdɑnm nɑ, ŋɑɑnt k lin bɑkt’i k yin bot. K mɑɑn n sɑɑ tun siɑl i yuo nɑ gbɑɑ, k suɑ i lek i yet’i l po i e, i kɑn mi k tien yɑdɑ.› »

⁴² Bɑɑ gbenn lɑknu yuo nbɑ, k Pɔul nɑn Bɑɑlnɑɑbɑɑs din nyii Suifnbɑ jɑɑnti dieok nɑ ni, k niib nɑ bɑln’m ɑ bin ŋɑnm jen Fuondɑɑl nbɑ bɑɑt nɑ, k tɑn wɑnn’b lɑbɑɑl mɑnŋ biɑk.

⁴³ K Suifnbɑ bonciɑnn, nɑn buolgɑnu bonciɑnn, bin nbɑ din lebt b jɑɑnti k wɑɑ Suifnbɑ jɑɑnti nɑ, k b kul ɑ ji din wɑɑ Pɔul nɑn Bɑɑlnɑɑbɑɑs, k b piɑk nɑn’m k kpɑɑn’m ɑ bin yɑbl k biɑl fɑnu Yennu ninkpɑbɑɔnŋ ni.

⁴⁴ K fuondɑliel nbɑ din tɑn bɑɑl, l din biɑl wɑɑnm-nnɑ e nɑn duo nɑ ni suɑ kul n lɑkn k gbɑt Yonmdɑɑnɔ mɑɑn.

⁴⁵ Suifnbɑ nbɑ din lɑ nigbounŋ tiki nɑ, k b fiin punponn, k piɑk biil Pɔul wɑnnu, k biɑ suki’ɔ.

⁴⁶ Ŋɑɑn k Pɔul nɑn Bɑɑlnɑɑbɑɑs lek biɑ yien nɑn pɑlcienn ɑ: «L kpɑɑ tɑlɑs e nɑn k tin sint pɑk Yennu mɑɑn k tul yinm. Ŋɑɑn yɑɑ yet mɑɑn mɑnŋ, k biɑ dukn nɑn i k ŋɑn nɑn i lɑ mɑnfuol nbɑ kɑɑ gbennu nɑ, l pɑɑk e te k t ji sɑɑ bin nbɑ k tie Suifnbɑ ni nɑ,

⁴⁷ k mɑɑn Yonmdɑɑnɔ tul’t mɔb ɑ nnɑ: ‹Min e lukt’ɑ ɑ fii tie yentu, k tul bin nbɑ k tie Suifnbɑ, ɑ fii bɑɑt nɑn fielu kii tien tingbounŋ nɑ lokl kul po.› »

⁴⁸ Tɔn, bin nbɑ k tie Suifnbɑ mɑnŋ nbɑ din gbɑt nnɑ mɑnŋ, k b ji mɔk pɑlpienn, k piɑk Yonmdɑɑnɔ mɑɑn K bin nbɑ k Yennu lukt’b ɑ bin lɑ mɑnfuol nbɑ kɑɑ gbennu nɑ tien yɑdɑ.

⁴⁹ K Yonmdɑɑnɔ mɑɑn mɑnŋ yɑt tinŋ nɑ lokl kul po.

⁵⁰ L yuo nɑ k Suifnbɑ nɑ din fiin Antiɑɔs nɑ yudɑnm, nɑn puojɑɑnɑ nbɑ din tie yentinnɑ nɑ, wutuol, k b jɑk Pɔul nɑn Bɑɑlnɑɑbɑɑs muksuk, k bel’b nyinn’b b yent ni.

⁵¹ Ŋɑnn e k tuomiinbɑ nɑ din pit pit tɑɑpɑnt ni tɑnt k lu ŋɑɑn yɑɑt sɑɑn Ikoniunm.

⁵² K Yiesuweilɑ nbɑ din biɑl Antiɑɔs nɑ mɑntk din gbie nɑn pɑlpienn nɑn Foŋɑnm.