Tuonɑ 10 - Yiesu Lɑbɑmɑnn Muɑl Ni

Piɑl yelntu lɑbɑɑl

¹ Tɔn, jɑsuɑ nnɑ din be Sesɑɑle, k u sɑnn yi Kɔlnɑi. U din tie sejenm yudɑɑnsuɑ e u pɑɑbu ni. K l pɑɑbu k b yi Itɑɑli pɑɑbu.

² U din tie Yenjiɑnt-tuɑ e, k ŋuɑ nɑn u ŋɑɑtieb kul ɑ din jiɑntl Yennu. U din sonmt Suifnbɑ ni tɑlɑs-dɑnm bonciɑnn, k biɑ din mei Yennu yuo kul.

³ L din tɑn tie nɑn yenlekl kut muntɑ yuo nɑ e, k u lɑ Yennu *mɑlɑkɑ yelntu ni pieee, k u kuɑ u dieok ni k tɑn yiin ɑ: «Kɔlnɑi.»

⁴ Kɔlnɑi nbɑ din got lɑ mɑlɑkɑ mɑnŋ nɑ, k jɑŋmɑɑni suol’ɔ, k u yet ɑ: «N Yonmdɑɑnɔ, bee?» K mɑlɑkɑ mɑnŋ jiin ɑ: «Yennu gɑɑl ɑ miɑlu wɑɑ, k biɑ gɑɑl ɑ ninkpɑbɑɔnŋ tuonɑ nbɑ k ɑ tuun k tien tɑlɑs-dɑnm, k biɑ tiɑn ɑ po.

⁵ Mɔtɑɑnɑ, tumn nisiɑb Sope, k bin sɑɑ yiin jɑsuɑ nbɑ k b yi’u Siimɔn, k u sɑnn biɑ tie Piɑl nɑ.

⁶ U tie sɑɑmɔ e k be gbɑnfebltuɑ nbɑ k b yi’u Siimɔn nɑ ŋɑɑk ni, k u ŋɑɑk mɑnŋ kpiɑ nɑn mɔkgbenŋl nɑ.»

⁷ Mɑlɑkɑ mɑnŋ nbɑ din pɑk nɑn’ɔ nɑ ji din yɑɑt, k Kɔlnɑi ji yiin u ŋɑɑtuontunnɑ bɑnle nɑn sejesuɑ nnɑ, wun nbɑ din tie Yenjiɑnt-tuɑ, k tie u kpɑɑkyenɔ nɑ.

⁸ Wɑɑ yet’b lin nbɑ kul tien mɑnŋ puolpo e, k u tun’m Sope.

⁹ Lɑɑ yent, k b sɑɑ, k sɑɑ pel Sope. L yuo nɑ k Piɑl mun duo dituɑtuk pɑɑk yensuuk ni, ɑ wun miɑl Yennu

¹⁰ K kon din tɑn gbɑt’ɔ, k u ji luon wun di jiet, k b dɑɑ tie jiet siil, k u lɑ yelntu.

¹¹ U lɑ k sɑnpɑɑpo luot k bonsiɑl nnɑ nɑɑn cincenn k nyii sɑnpɑɑpo, k siɑl diɑ l mɔgbɑnɑ ŋɑnnɑ k siknt tinŋ ni,

¹² k u lɑ bonkobt, bonfulinkɑ, nɑn bon-yuyukt buolu kul,

¹³ k u gbɑt kunkɔl yiin ɑ: «Piɑl, fiit k kpi’b k ŋmɑn.»

¹⁴ Ŋɑɑn k Piɑl jiin ɑ: «O, O, O, Yonmdɑɑnɔ, nnɑ kɑɑ. N k mi dii t kuɑt.»

¹⁵ K kunkɔl nɑ biɑ ŋɑnm yet’ɔ ɑ: «Lin nbɑ k Yennu kpint’l ɑ l k kuɑ, dɑɑ yien ɑ l kuɑ.»

¹⁶ L din tien nnɑ k sɑɑ jɑnŋ tɑɑl muntɑ, k b jiin bont mɑnŋ sɑnpɑɑpo.

B kpɑnt tien Yiesuweilɑ

¹⁷ Piɑl nbɑ duki yelntu nɑ pɑɑk po nɑ, k suɑ Kɔlnɑi *tuomi nɑ boi Siimɔn ŋɑɑk nbɑ be siɑn nbɑ po, k b bɑɑl ŋɑɑk mɑnŋ tɑnmɔb ni, k set,

¹⁸ ŋɑɑn yiin k boi ɑ: «Suɑ be nnɑ, k u sɑnn tie Siimɔn k b biɑ yi’u Piɑl ii?»

¹⁹ Piɑl nbɑ lek kol ɑ wun bɑnn yelntu mɑnŋ pɑɑk nɑ, k Foŋɑnm yet’ɔ ɑ: «Gotl, jɑb bɑntɑ be nnɑ k luon’ɑ.

²⁰ L pɑɑk, fiit k sik, k dɑɑ bils nɑn ɑ sɑɑn nɑn’m, k mɑɑn min e tun’m.»

²¹ Ŋɑnn e k Piɑl sik, k yet jɑb nɑ ɑ: «Min e k i luon nɑ. Bee tien k i bɑɑl i?»

²² K b jiin ɑ: «Cɑnbɑɑ Kɔlnɑi e tun’t. U tie sejenm yudɑɑnɔ e, k u tie nibulcimɔ e biɑk, k jiɑntl Yennu k Suifnbɑ kul tien’ɔ nibɑɑkl. Tɔn, Yennu mɑlɑkɑ won bɑɑl yet’ɔ ɑ wun yiin’ɑ k ɑ bɑɑl u ŋɑɑk ni, k wun tɑn gbɑt lin nbɑ k ɑ sɑɑ pɑk k tul’ɔ.»

²³ K Piɑl fɑn yiin jɑb nɑ k kuɑn’m, ɑ bii be k sɑn-nyiɑɔk n yent ɑ. K l tɑn yent k u tien siil, k b sɑɑ, k Yiesuweilɑ nbɑ din be Sope nɑ, k b siɑb ciɑn’ɔ.

²⁴ L dɑɑl din tɑn bɔnn yent e, k b bɑɑl Sesɑɑle, ŋɑɑn suɑ k Kɔlnɑi ponŋ yiin u nɑɑtɑɑni nɑn u yuɑsnbɑ, k b kul ji kɑl guu Piɑl bɑɑlu.

²⁵ Piɑl nbɑ din tɑn bɑɑl ɑ wun kuɑ yuo nbɑ, k Kɔlnɑi cet’ɔ tɑnmɔb ni, k gbɑɑn, k puki’ɔ.

²⁶ Ŋɑɑn Piɑl yet’ɔ ɑ: «Fiit, k mɑɑn n tie nifosɑɑlk e,» ŋɑɑn fiin’ɔ senn’ɔ.

²⁷ Wɑɑ din piɑk nɑn Kɔlnɑi ŋɑɑn kuɑ ŋɑɑk mɑnŋ ni nɑ, k u lɑ niib bonciɑnn tikl k guu’u.

²⁸ K u yet’b ɑ: «I mɔnŋ mɔnŋ mun mi nɑn tinm Suifnbɑ sennu k cɑb’t nɑn tin sɑɑn gɔn bin nbɑ k tie Suifnbɑ, ɑmi k tɑɑn nɑn’m, ŋɑɑn Yennu wɑnn’n ɑ n dɑɑ yien nisuɑ, wɑɑ k tie Suif nɑ pɑɑk.

²⁹ L pɑɑk, fɑɑ yiin’n nɑ, n bɑɑl, k k bils. Ŋɑnn e k n boi’ɑ mɑɑ n lɑɑn bee tien k ɑ tun k yiin’n i?»

³⁰ K Kɔlnɑi yet’ɔ ɑ: «L dɑɑn tie nnɑ yuo e dinnɑ dɑɑl, k n dɑɑn mei Yennu n ŋɑɑk ni kut muntɑ yuo yenlekl. L yuo nɑ k n lɑ k nisuɑ nnɑ sie k liɑ liɑtfuouk nbɑ nyili n tuɑnn po,

³¹ k yet ɑ: ‹Kɔlnɑi, Yennu gbɑt ɑ miɑlu wɑɑ, k biɑ tiɑn ɑ ninkpɑbɑɔnŋ tuonɑ po.

³² L pɑɑk, tumn suɑ Sope, k wun sɑɑ yiin wun nbɑ k b yi’u Siimɔn, k u sɑnn biɑ tie Piɑl nɑ. U tie sɑɑmɔ e, k be gbɑnfebltuɑ Siimɔn ŋɑɑk nbɑ kpiɑ nɑn mɔkgbenŋl nɑ.›

³³ K l pɑɑk e, k n dɑɑn tun ɑ po yiɑn ɑ nɑ, k ɑ mun tien bonŋɑnn k bɑɑl nɑ. Mɔtɑɑnɑ, t kul ɑ be Yennu tuɑnn, k ji guu ɑ t gbɑt lin nbɑ kul k Yonmdɑɑnɔ tul’ɑ mɔb ɑ ɑ pɑk tul’t nɑ.»

³⁴ Ŋɑnn e k Piɑl piin pɑku k yɑɑ ɑ: «N ji bɑnn nɑn l tie mɔni e nɑn Yennu set k mɔk luktn,

³⁵ ŋɑɑn nibuolu kul ni, dɑɑnsuɑ nbɑ tien’ɔ bɑɑkl, k biɑ tuun wɑɑ luon bɑnnu nbɑ, ŋuɑ e gbuot Yennu nunm.

³⁶ I mi nɑn Yennu din tul Islɑɑeltieb u mɑɑn nbɑ wɑnt lɑbɑmɑnn nɑ po, ɑ Yiesu *Klistu ni e k tinm nɑn Yennu mɑnŋ nɑn lieb. Ŋuɑ Yiesu Klistu e tie t kul Yonmdɑɑnɔ.

³⁷ I ponŋ mi lin nbɑ din tien Gɑɑliile nɑn Suude tini kul ni, Sɑn nbɑ din muɑnt Yennu mɑɑn k wuul niib Yennu nyunwulu nɑ puolpo.

³⁸ I mi biɑnŋ nbɑ k Yennu din tul Yiesu, Nɑɑsɑɑlet nilɔ nɑ, Foŋɑnm nɑn yiikuo nɑ. I biɑ mi biɑnŋ nbɑ k u din lin k tuun tuonŋɑnɑ, k biɑ te k bin nbɑ kul be pol yiikuo k yiɑl nɑ lɑ pɑɑku, k mɑɑn Yennu be nɑn’ɔ.

³⁹ K t lɑ tuonɑ kul nbɑ k u tun Suifnbɑ tingbounŋ ni nɑn Selusɑɑlenm, k t tie u siɑlɑɑdɑnm. K b kpɑɑ’u dɑpunpunn pɑɑk k u kpo,

⁴⁰ ŋɑɑn k Yennu din fiin’ɔ kuun ni dɑɑ ŋɑntɑ dɑɑl, k te k t lɑɑt’ɔ.

⁴¹ Ŋɑɑn niib kul kɑɑ wɑɑ din lɑɑt’ɔ. L din tie tinm nbɑ k Yennu ponŋ din lukt’t ɑ tii tie u siɑlɑɑdɑnm nɑ e din lɑɑt’ɔ, k biɑ din tuu di k nyu nɑn’ɔ u kuun fiilu puolpo mɑnŋ.

⁴² K u tul’t mɔb ɑ tii muɑntl kii tien niib ɑ Yiesu e tie dɑɑnɔ nbɑ k Yennu nyinn senn’ɔ ɑ u tie fuotb nɑn kpienm bɑlbuulɔ.

⁴³ *Yennu sɔkniinbɑ kul din tuu piɑk u po, k yien ɑ suɑ kul nbɑ tien’ɔ yɑdɑ nɑ, sɑɑ lɑ nyikcɑbu Yiesu mɑnŋ sɑnn ni.»

⁴⁴ Piɑl nbɑ din dɑɑ piɑk nɑ, k Foŋɑnm sik kuɑ bin nbɑ kul din gbiintl mɑɑn mɑnŋ ni.

⁴⁵ K Yiesuweilɑ nbɑ tie Suifnbɑ k nyii Sope k ciɑn Piɑl nɑ, k l tien’m bɑktnɔunŋ nɑn Yennu nbɑ jii u piini nbɑ tie u Foŋɑnm, k tul bin nbɑ k tie Suifnbɑ mun nɑ,

⁴⁶ k mɑɑn b gbiɑ k b piɑk bɑlgɑni k dont Yennu sɑnn. Ŋɑnn e k Piɑl yet ɑ:

⁴⁷ «Niib nɑ gɑɑl Foŋɑnm, nɑn tɑɑ mun din gɑɑl nɑ e. Suɑ be nnɑ k sɑɑ bel’t ɑ t dɑɑ wuul’b Yennu nyunwulu uu?»

⁴⁸ ŋɑɑn tul mɔb ɑ bin wul’b Yennu nyunwulu Yiesu Klistu sɑnn ni. Ŋɑnn e k b din guɑl Piɑl ɑ wun biɑl nɑn’m nɑn dɑɑ ŋɑnle nnɑ, k u biɑl.