Tiit 3 - Yiesu Lɑbɑmɑnn Muɑl Ni

Klistuweilɑ binbenŋ lɑbɑɑl

¹ A tiɑl’b k bin tul b tinŋ yudɑnm nɑn yiikuo-dɑnm bɑɑkl, k sɑk b mɔi, k tien siil k tun tuonŋɑnɑ kul ɑ.

² Yetl’b ɑ b dɑɑ piɑk bɑlbiit suɑ pɑɑk, ŋɑɑn kii luon pɑlmɑɑsl, kii mɔk bulcint, kii mɔk sikn-n-mɔnŋ niib sinsuuk ni.

³ K mɑɑn siɑn-yuo t mɔnŋ din k mɔk yɑn, t din tie mɔyetdɑnm e, k wɑɑ sɔnu nbɑ k tuok. T din tie niɑnbiit nɑn gbɑnɑnt lonm buolu buolu dɑɑbɑ e. T binbenŋ kul din tie bonbiil nɑn niɑnbiiuk o. T din nɑn t lieb k b mun biɑ nɑn’t.

⁴ Ŋɑɑn t Fietuɑ Yennu lonm nɑn u bulcint nbɑ din tɑn fiit nyii pɑɑnu yuo nbɑ,

⁵ k u din fiel’t. L din k tie t tiɑɔnŋ tuonŋɑnɑ pɑɑk kɑɑ, ŋɑɑn u mɔnŋ ninbɑtinu pɑɑk e. U din jii nyun e k wul’t, k l nyun pɑɑk, k Foŋɑnm te k b ŋɑnm k mɑl’t, k tul’t mɑnfopɑɑnn.

⁶ Yennu din yɑt Foŋɑnm t pɑɑk bonciɑnn Yiesu *Klistu ni.

⁷ Yennu ninkpɑbɑɔnŋ pɑɑk k u din tun nnɑ ɑ wun tien’t niŋɑnm u buol, k biɑ tien’t u wɑɑs nbɑ mɔk dindɑnn k t sɑɑ lɑ mɑnfuol nbɑ kɑɑ gbennu.

⁸ Bɑli nɑ tie bɑlmɔni e. N luon k ɑ jii ɑ dudukt kul kii wɑnt’b lin nbɑ nɑ, k bin nbɑ tien Yennu yɑdɑ nɑ n jii b yuo kii tuun tuonŋɑnɑ nɑn ninmɔnn. Ŋɑnn e ŋɑn k mɔk nyuɑt k tul suɑ kul ɑ.

⁹ Ŋɑɑn nyik mɔnɔyɑnnɑ, nɑn yejɑnm sɑnɑ kɑnu, k dɑɑ kɔn nɑn lieb, k noi mɔniɑɔk *senni pɑɑk, k mɑɑn lin nbɑ nɑ kul k mɔk nyuɑt k biɑ tie bon-yɑnɑ e.

¹⁰ Nilɔ i tie tuknɑ dɑɑnɔ, fɑn pɑk’ɔ yonm, k biɑ pɑk’ɔ munle pɑɑk, ŋɑɑn l puolpo fɑn nyik’ɔ.

¹¹ A mi nɑn l nibuolu nyik sɔnu nbɑ tuok ɑ, k wɑɑ kpɑɑ tubɑ nɑ pɑɑk, k u kuɑnt u mɔnŋ muu ni.

Kpɑɑni nbɑ juont

¹² Mi i tun Altemɑɑs ɑmi Tiikiik ɑ buol ni yuo nbɑ, fɑn yɑbl k cet’n Niikopoliis duo ni, k mɑɑn n sii be lenŋ e gbintɑnkɑɑnŋ yuo.

¹³ Yɑbt ɑ mɔnŋ k sonm Senɑɑs, wun nbɑ tie bɑlbuulɔ nɑ, nɑn Apuoluos, k bin lɑ bɑɑ luon lin nbɑ kul k fit piin b sɔnu nɑ.

¹⁴ L kpɑɑ tɑlɑs k t niib ii mi bɑɑ sii tuun tuonŋɑnɑ bonciɑnn bɑnnu nbɑ, kii sonmt niib b fɑlɑ ni, k dɑɑ be binbenŋ nbɑ kɑɑ nyuɑt.

¹⁵ Bin nbɑ be n buol ni nɑ kul ɑ fuont’ɑ. A fuont bin nbɑ tien Klistu yɑdɑ k luon’t b yɑdɑ pɑɑk nɑ. Yennu ninkpɑbɑɔnŋ ii be nɑn i kul ɑ.