Tiit 1 - Yiesu Lɑbɑmɑnn Muɑl Ni

Fuonti

¹ Min Pɔul, wun nbɑ tie Yennu tuontunnɔ nɑn Yiesu *Klistu *tuomi nɑ, min e k Yennu lukt’n k tun’n u nigɑnnkɑb buol ɑ n cie b yɑdɑ, k te bin bɑnn u bɑlmɔni lɑbɑɑl nbɑ wɑnt’t bɑnnu nbɑ k t sii mɔk binbenŋ nbɑ gbuot Yennu nunm.

² Lin nbɑ nɑ nyii dindɑnn nbɑ k t mɔk nɑn t sii mɔk mɑnfuol nbɑ kɑɑ gbennu nɑ ni e. Yuo nbɑ k u dɑɑ din k nɑn dulnyɑ nɑ, Yennu nbɑ k fɑɑ fɑɑk nɑ din senn mɔsonn ɑ u sɑɑ tul’t mɑnfuol mɑnŋ.

³ Yuo nbɑ k u din senn nɑ nbɑ tɑn bɑɑl, k Yennu t Fietuɑ te k n bɑnn u mɑɑn. L mɑɑn e tie mɑɑn nbɑ k u yɑɑ mii muɑntl nɑ.

⁴ N dɑ kɑdɑɑɔk nɑ k tien fin Tiit wun nbɑ tie n bimɔnŋ k t tɑɑ yɑdɑ yenn kuɑ nɑ. Bɑɑ Yennu nɑn t Fietuɑ Yiesu Klistu ii mɔk ninkpɑbɑɔnŋ nɑn’ɑ k biɑ tul’ɑ mɑnu.

Tiit tuonɑ lɑbɑɑl

⁵ N din te k ɑ biɑl Klet tinŋ ni mɑɑ ɑ ŋɑnm bonsiɑl kul nbɑ dɑɑn tenn, k biɑ kɑɑn kɑɑn Klistu mɔtɑɑɔk niib *sɑɑkɑb duo kul ni, nɑn mɑɑ din wɑnn’ɑ biɑnŋ nbɑ nɑ.

⁶ L kpɑɑ tɑlɑs e nɑn sɑɑkuɑ i tie wun nbɑ k b k fit tɑɑl’ɔ. L kpɑɑ tɑlɑs nɑn wuu mɔk puo yenɔ kuɑ. L kpɑɑ tɑlɑs nɑn u wɑɑs n tien Klistu yɑdɑ, k dɑɑ tie wɑɑbiit nɑn tubkɑngbɑtɑ,

⁷ k mɑɑn Klistu mɔtɑɑɔk niib yudɑɑnɔ sii tuun Yennu tuonɑ e. L pɑɑk, l kpɑɑ tɑlɑs nɑn u dɑɑ tie dɑɑnɔ nbɑ k b fit tɑɑl’ɔ, k dɑɑ mɔk jɑpɑɑt, ɑmi wun nbɑ dont wutuol yiɑn yiɑn, ɑmi wun nbɑ nyu dɑɑn k yib, ɑmi wun nbɑ luon kunkɔnɑ, ɑmi wun nbɑ luon likli fɑɑk sɔni ni.

⁸ Ŋɑɑn l kpɑɑ tɑlɑs k wuu mi sɑɑnm gɑɑlu, kii luon lin nbɑ ŋɑn, kii mi u mɔnŋ diɑnu, kii be fɑnu, kii tie Yennu yuɑ, kii mi mɔnŋdiɑnu.

⁹ L kpɑɑ tɑlɑs k wuu diɑ bɑlmɔni lɑbɑɑl nbɑ k t din wɑnn’i nɑ fɑnu. Ŋɑn e sɑɑ te k wun fit cie niib pɑlɑ nɑn wɑnnu nbɑ tuok, k biɑ te k wun fit k wɑnn bin nbɑ k sɑɑk u wɑnnu mɑnŋ nɑ bɑlmɔni.

¹⁰ K mɑɑn mɔyetdɑnm bonciɑnn be, k b mɑntk be *Suifnbɑ nbɑ lebt b binbenŋ nɑ sinsuuk ni e, k diɑ b jɑtmɑɑn k kpɑnn niib.

¹¹ L kpɑɑ tɑlɑs k fin guɑl b mɑɑn, k mɑɑn b liklonbiiuk pɑɑk k b lin wɑnt niib lin nbɑ k ŋɑn nɑn bii wɑnt, k ŋmɑt ŋɑsɑi niib kul dudukt.

¹² Klet jɑsuɑ, wun nbɑ din tie b tiɑɔnŋ sɔkni din yet ɑ: «Klet-tieb fɑ fɑɑk yuo kul ɑ, k b nɑɑn nɑn bonkob-biit, k biɑ tie gbɑn-nyɑkdɑnm nbɑ luon diinɑ kuukuɑ.»

¹³ Wɑɑ din yet biɑnŋ nbɑ nɑ, l tie bɑlmɔni e. L pɑɑk, l kpɑɑ tɑlɑs nɑn k ɑ yɑki nɑn’m fɑnu, k bii mɔk bɑlmɔni yɑdɑ,

¹⁴ k ji dɑɑ gbiintl Suifnbɑ fɑɑk lɑbɑɑl, k biɑ dɑɑ gbiintl niib nbɑ k sɑɑk bɑlmɔni lɑbɑɑl nɑ *senni.

¹⁵ Bonsiɑl kɑɑ k mɔk jɑknt bin nbɑ be binbenŋ nbɑ gbuot Yennu nunm nɑ buol ni, ŋɑɑn bonɑ kul mɔk jɑknt e k tul bin nbɑ tie jɑknt-dɑnm k k tien Klistu yɑdɑ nɑ, k mɑɑn b dudukt nɑn b yɑn ni kul tie jɑknt e.

¹⁶ B yi b mɔnŋ Yenmiilɑ e, ŋɑɑn k b tuonɑ wɑnt nɑn b k sɑk bɑnn Yennu. B tie mɔyetdɑnm nɑn nibiit e, k kɑn fit tun tuonŋɑnsiɑl.