Sɑɑk 2 - Yiesu Lɑbɑmɑnn Muɑl Ni

Dɑɑ mɔk ningɑnni

¹ N nɑɑ wɑɑs, yɑɑ tien Yonmdɑɑnɔ Yiesu *Klistu, wun nbɑ yen *yudɑnt nɑ, yɑdɑ biɑnŋ nbɑ, i dɑɑ mɔk luktn.

² L i tie k mɔktɔ wun nbɑ liɑ tɑŋɑnt k pil sɑlnbɑnn kuɑ i tintɑɑnu ni, k nɑndɑɑnɔ nbɑ liɑ tɑciɑt mun kuɑ,

³ k i tul mɔktɔ nɑ nibɑɑkl, k yet’ɔ ɑ wun kɑl tuɑnn po, ŋɑɑn yet nɑndɑɑnɔ nɑ, ɑ u sie ɑmi wun kɑl tinŋ ni,

⁴ n nɑɑ wɑɑs, l i tie k i tuun nnɑ, i tie niib nbɑ mɔk luktn nɑn i lieb, k biɑ tie nɑn bubuulɑ nbɑ mɔk dudukbiit nɑ e.

⁵ N nɑɑ wɑlonkɑi, gbiintl mɑn, Yennu e lukt bin nbɑ tie nɑndɑnm tingbounŋ nɑ niib buol, ɑ bin tien mɔktɑ b yɑdɑ ni, k tien u wɑɑs nbɑ sɑɑ di nɑɑn nbɑ k u din senn mɔsonn, ɑ u sɑɑ tul bin nbɑ luon’ɔ nɑ.

⁶ Ŋɑɑn yinm e sɑlkt nɑndɑnm. Bin nbɑ ŋmɑb’i k so’i, k sɑɑ nɑn’i buut buol nɑ, b k tie mɔktɑ kɑɑ ɑɑ?

⁷ Ŋɑnm e biɑ piɑk biil sɑnŋɑnn nbɑ k Yennu tul’i nɑ.

⁸ L diɑn Yennu lolkpel kɑdɑɑɔk ni ɑ: «Ii luon *ɑ luɑ nɑn fɑɑ luon ɑ mɔnŋ biɑnŋ nbɑ nɑ.» L i tie k i wɑɑ Yennu nɑɑn sennu mɑnŋ, l ŋɑn,

⁹ ŋɑɑn l i tie k i mɔk ningɑnni nɑn lieb, l tie biit e, k sennu mɑnŋ fiitl wɑnt nɑn i set tie sennu biiltieb e.

¹⁰ Wun nbɑ sɑk k wei *senni nɑ kul, ŋɑɑn tɑn biil senni mɑnŋ yenn, l wɑnt nɑn u biil senni nɑ kul e.

¹¹ Wun nbɑ yet ɑ: «Dɑɑ conm nɑ,» ŋuɑ e biɑ yet ɑ: «Dɑɑ kpi nilɔ.» L pɑɑk, l i tie k ɑ k conm, ŋɑɑn kpi, ɑ tie senni biiltuɑ e.

¹² Ii piɑk ŋɑɑn kii tuun nɑn niib nbɑ k Yennu tɑn sɑɑ jii senni nbɑ nyint niib biit dɑɑbs ni nɑ e, k bu b buut,

¹³ k mɑɑn bin nbɑ k tin b lieb ninbɑɑɔk, Yennu sɑɑ bu b buut k kɑn tin’m ninbɑɑɔk u, ŋɑɑn k ninbɑɑɔk e nyɑni tubdɑtu.

Yɑdɑ nɑn tuonɑ lɑbɑɑl

¹⁴ N nɑɑ wɑɑs, dɑɑnɔ nbɑ yɑɑ, ɑ u mɔk yɑdɑ, ŋɑɑn ji k tuun tuonŋɑnɑ, l mɔk nyuɑt ii? U yɑdɑ mɑnŋ buolu sɑɑ fit fiel’ɔ wɑɑ ɑɑ?

¹⁵ L i tie k ɑ nɑɑ bik be k k lɑɑt gbɑb, k biɑ k lɑɑt di,

¹⁶ k ɑ ji yien’ɔ ɑ: «N nɑɑ bik, ɑ kun mɑnu wɑɑ, kii gbɑb, kii biɑ kii di,» ŋɑɑn kɑn sonm’ɔ nɑn siɑl, l mɔk nyuɑt ii?

¹⁷ Yɑdɑ kuukuɑ i be, ŋɑɑn tuonŋɑnɑ kɑɑ, yɑdɑ mɑnŋ tie yɑdɑkpieonŋ o.

¹⁸ Ŋɑɑn suɑ sɑɑ yet ɑ: «A mɔk yɑdɑ, k n tuun tuonŋɑnɑ.» N mun sɑɑ jiin ɑ: «L i tie k ɑ k tuun tuonŋɑnɑ, lɑnn po e wɑnt nɑn ɑ set mɔk yɑdɑ? Ŋɑɑn n tuonŋɑnɑ nɑ e wɑnt’ɑ nɑn min set mɔk yɑdɑ.»

¹⁹ A tien yɑdɑ nɑn Yen-yenɔ kuɑ e be ee? L ŋɑn. Nɑlnbiit mun tien yɑdɑ nɑn Yen-yenɔ kuɑ e be, k biɑ jekl nɑn jɑŋmɑɑni.

²⁰ Fin jɑtuk nɑ. A luon k n wɑnn’ɑ bɑnnu nbɑ k ɑ sɑɑ bɑnn nɑn yɑdɑ nbɑ k mɔk tuonɑ nɑ tie yɑnn ee?

²¹ T yejɑ Ablɑɑhɑɑnm nbɑ din jii u bik Isɑɑk k pɑɑn’ɔ binbintl pɑɑk ɑ wun kpi’u k mɑnn *mɑlunŋ k tul Yennu nɑ, tuonn mɑnŋ pɑɑk, kɑɑ te k Yennu din yet ɑ u tie niŋɑnɔ u buol ii?

²² A lɑ nɑn u yɑdɑ nɑn u tuonɑ din tɑɑn k tuun k u tuonɑ ni, yɑdɑ mɑnŋ din wɑnn l mɔnŋ ɑ l tie bɑlmɔni yɑdɑ e.

²³ Nnɑ e k lin nbɑ diɑn Yennu lolkpel kɑdɑɑɔk ni din tɑn tien mɔni ɑ: «Ablɑɑhɑɑnm din tien Yennu yɑdɑ, k l pɑɑk, k Yennu yɑɑ ɑ u tie niŋɑnɔ u buol,» k b din yi’u Yennu yuɑk.

²⁴ I ji lɑ nɑn nilɔ tuonŋɑnɑ pɑɑk e k Yennu sɑɑ yet ɑ l dɑɑnɔ tie niŋɑnɔ u buol, k l k tie u yɑdɑ kuukuɑ pɑɑk.

²⁵ L din tie nnɑ e mun k tul puocunconn nbɑ sɑnn din yi Lɑɑhɑɑb nɑ. Wɑɑ din gɑɑl tuomiinbɑ nbɑ k Islɑɑeltieb din tun’m, k biɑ wɑnn’b sɔngɑnu nbɑ k b tɔkn ŋmɑt kun nɑ, u tuonn mɑnŋ pɑɑk e k Yennu din yet, ɑ u tie niŋɑnɔ u buol.

²⁶ L pɑɑk, gbɑnɑnt nbɑ kɑɑ siek nɑ, tie gbɑnɑnkpieonŋ o, k yɑdɑ i mun i be k tuonŋɑnɑ kɑɑ, l mun tie yɑdɑkpieonŋ o.