Sɑɑk 1 - Yiesu Lɑbɑmɑnn Muɑl Ni

Fuonti

¹ Min Sɑɑk, wun nbɑ tie Yennu tuontunnɔ k biɑ tie Yonmdɑɑnɔ Yiesu *Klistu tuontunnɔ, n fuont Islɑɑel nibuolu piik nɑn bɑnle nbɑ yɑt k be tingbounŋ nɑ kul ni.

Yɑdɑ nɑn yɑn lɑbɑɑl

² N nɑɑ wɑɑs, ii mɔk mɑn pɑlpienn yuo nbɑ k i di fɑlɑ buolu buolu nɑ,

³ k mɑɑn i mi nɑn l i tie k biknu bɑɑl ŋɑɑn k i lek be i yɑdɑ ni, l bɑɑt nɑn suklu e.

⁴ Ŋɑɑnt mɑn k i suklu i be fɑnu k yin fit kii tie niŋɑnm k siɑl dɑɑ puɑl’i.

⁵ L i tie k i suɑ pɔt yɑn, wun miɑl Yennu, wun nbɑ pi suɑ kul piini nɑn bulcint, k k dint suɑ fei nɑ, k u sɑɑ tul’ɔ wɑɑ.

⁶ Fii mei Yennu, fɑn tien yɑdɑ k dɑɑ mɔk bilsuk, k mɑɑn wun nbɑ mei’ɔ nɑn bilsuk nɑ, tie nɑn mɔkgbenŋl nyunpɑnɑ nbɑ k wounŋ dɑ k l fi k bɑɑ nɑ e.

⁷ L nibuolu dɑɑ duki nɑn u sɑɑ lɑ siɑl Yennu buol,

⁸ k mɑɑn u k mɔk dudukcincibl, lin nbɑ kul k u tuun nɑ ni.

Tɑli nɑn mɔktɑ lɑbɑɑl

⁹ L ŋɑn k t nɑɑ bik nbɑ tie tɑlk ii mɔk yugontl Yennu nbɑ donn’ɔ nɑ pɑɑk,

¹⁰ k t nɑɑ bik nbɑ mun tie mɔktɔ ii mun ii mɔk yugontl Yennu nbɑ sikn’ɔ nɑ pɑɑk, k mɑɑn l kɑn wei k u sɑɑ gɑl nɑn tipuuk nbɑ tuu kuol k bɑɑ nɑ.

¹¹ Yennu i nyii k yekt tipuuk pɑɑk, puuk nɑ tuu kuol e k bɑɑ, k l ŋɑnt n ji biil. L mun biɑ tie nnɑ e k tul mɔktɔ. Yuo nbɑ k u duki u tuonɑ nbɑ sɑɑ sɑɑn tuɑnn biɑnŋ nbɑ nɑ, l yuo e wun kpo.

Jɑnmi lɑbɑɑl

¹² Bin nbɑ nyɑnn jɑnmi nɑ, pɑlpienn tie b yɑl e, k mɑɑn wuu nyɑnn jɑnmi gbenn yuo nbɑ, u sɑɑ lɑ mɑnfuol nbɑ k Yennu din senn mɔsonn, mɑnfuol nbɑ k u din senn mɔsonn, ɑ u sɑɑ tul bin nbɑ luon’ɔ nɑ.

¹³ Suɑ i lɑ jɑnmi, u dɑɑ yɑɑ ɑ Yennu e jɑnm’ɔ. Siɑl kɑɑ k sɑɑ fit jɑnm Yennu wun tun bonbiil, k Yennu mun k jɑnmt suɑ.

¹⁴ Ŋɑɑn nilɔ lɑɑt jɑnmi yuo nbɑ k u mɔnŋ niɑnbiiuk dɑɑl’ɔ k so’u e.

¹⁵ Niɑnbiiuk i suol nilɔ, l tuu tie puol k tɑn mɑl biit, k biit mun n suol puol k mɑl kuun.

¹⁶ N nɑɑ wɑlonkɑi, i dɑɑ te k siɑl kpɑnn’i ni.

¹⁷ Bonŋɑnn kul nyii sɑnpɑɑpo e Bɑɑ buol, wun nbɑ din nɑn sɑnpɑɑpo yentu kul ɑ. Ŋuɑ ŋɑnin k lebtl nɑn sɑnpɑɑpo yentu nbɑ tuu lebtl biɑnŋ nbɑ nɑ. U biɑ dɑɑ tie ŋuɑ Yennu e.

¹⁸ U mɔnŋ lonm ni e k u tul’t mɑnfuol, u mɑɑn nbɑ tie bɑlmɔni nɑ pɑɑk, ɑ tii cie u bonninnɑnt kul ɑ.

¹⁹ N nɑɑ wɑɑs, n luon yin bɑnn nɑ e. Ii gbiintl yiɑn, ŋɑɑn kii mi biɑnŋ nbɑ k i piɑk, k biɑ dɑɑ dont wutuol yiɑn yiɑn,

²⁰ k mɑɑn nifosɑɑlk wutuol k bɑɑt nɑn binbenŋɑnŋ nbɑ k Yennu luon.

²¹ L pɑɑk, ii nyik i yɑnbɔnm nɑn biit kul nbɑ be i pɑlɑ ni nɑ, ŋɑɑn sikn i mɔnŋ Yennu tuɑnn, k gɑɑl u mɑɑn nbɑ k u bul i pɑlɑ ni nɑ, k mɑɑn mɑɑn mɑnŋ e sɑɑ fit fiel’i.

²² I dɑɑ gbiintl mɑɑn mɑnŋ kuukuɑ k kpɑnn i mɔnŋ, ŋɑɑn kii tuun mɑɑn nbɑ wɑnn’i biɑnŋ nbɑ nɑ.

²³ Wun nbɑ kul gbɑt mɑɑn mɑnŋ, ŋɑɑn k k tuun biɑnŋ nbɑ k l wɑnn, u tie nɑn nilɔ nbɑ tuu got k lɑ u mɔnŋ miɑnu ni nɑ e,

²⁴ k mɑɑn u got k lɑ u mɔnŋ miɑnu nɑ ni, ŋɑɑn siet, k ji tuu tɑnm wɑɑ bo got k lɑ u mɔnŋ k u tie biɑnŋ nbɑ nɑ e.

²⁵ Ŋɑɑn wun nbɑ goli sennŋɑnn nbɑ sɑɑ fit nyinn niib biit dɑɑbs ni, k k tɑnm’l, ŋɑɑn mɔk gbɑnkul k tuun biɑnŋ nbɑ k l wɑnn nɑ, pɑlpienn sii tie l dɑɑnɔ yɑl e, u tuonɑ nɑ pɑɑk.

²⁶ Wun nbɑ mi nɑn u tie Yenweilɔ ŋɑɑn k k so u jeln, l dɑɑnɔ kpɑnn u mɔnŋ e, k u wɑɑnu nɑ tie yɑnn e.

²⁷ Gotl lin nbɑ k Bɑɑ Yennu yet ɑ l tie Yenweiu nɑn bɑlmɔni k jɑknt kɑɑ lenŋ, wun nbɑ sonmt kpiebi nɑn pɑkɔi b fɑlɑ ni, k so u mɔnŋ, ɑ tingbounŋ nɑ bonbiil dɑɑ fit kuɑnt’ɔ biit ni.