Mɑɑtieo 3 - Yiesu Lɑbɑmɑnn Muɑl Ni

Sɑn Nyunwultuɑ lɑbɑɑl

¹ Binɑ bonciɑnn din gɑl e wɑɑ, k Sɑn nbɑ din wuul niib Yennu nyunwulu nɑ tɑn dɔkt muuk ni, Suude tinŋ ni, k muɑntl Yennu mɑɑn k yien ɑ:

² «Mɔn kuɑŋɑɑn mɑn k lebt binbenŋ, k mɑɑn Yennu nɑɑn pel nɑ.»

³ *Yennu sɔkni Esɑɑyi din ponŋ diɑn ŋuɑ Sɑn po e wɑɑ ɑ: «Suɑ be muuk ni k huot k yɑɑ ɑ: ‹Ŋɑnmt mɑn Yonmdɑɑnɔ bɑɑlu sɔnu k tul’ɔ, k te k u sɔni ii tuok.› »

⁴ Sɑn din liɑ yuyouk kobt liɑtfuouk o, k biɑ buob gbɑnn u siɑk ni, u jiet din tie nɑɑsuut nɑn siɑt e.

⁵ L yuo k Selusɑɑlenm duo ni tieb, nɑn Suude tinŋ kul ni tieb, nɑn digbɑnɑ nbɑ din kpiɑ *Suulden kpenu kul tieb din sɑɑn u buol ni,

⁶ k fiit b biit, k u wul’b Yennu nyunwulu *Suulden kpenu mɑnŋ ni.

⁷ Wɑɑ din tɑn lɑ k Fɑɑliisiɑnnbɑ nɑn *Sɑɑdiuseɑnbɑ bonciɑnn k b mun bɑɑt u buol ni ɑ wun wul’b Yennu nyunwulu nɑ, k u yet’b ɑ: «Yinm wɑɑlɑbli nɑ. Ŋmee kpɑɑn’i ɑ i tin k nyi Yennu wutuol nbɑ yɑɑ lin bɑɑl i pɑɑk nɑ ni?

⁸ Ii tuun mɑn lin nbɑ sɑɑ wɑnn nɑn i set mɔ kuɑŋɑɑn k lebt binbenŋ.

⁹ I dɑɑ mɔk pɑlbifɑɑnt nɑn Ablɑɑhɑɑnm tie i yejɑ. N yien’i e, Yennu sɑɑ fit k fiin tɑnɑ nbɑ nɑ k lin kpɑnt Ablɑɑhɑɑnm yɑɑbuonɑ.

¹⁰ Pɑjɑl ponŋ tien siil ɑ, ɑ wun cuɑ tiini nɑn l jiinɑ, k tiik kul nbɑ k luon luɑnŋɑnɑ, b sɑɑ cuɑ’l e k lu’l muu ni.

¹¹ Min ŋɑnin wuul’i Yennu wulu nɑn nyun ɑ i mɔ kuɑŋɑɑn k lebt binbenŋ, ŋɑɑn wun nbɑ yɑɑ wun bɑɑl n puolpo nɑ cie’n, k n ponŋ k ŋɑn nɑn k n jii u tɑɑsɑɑt. Ŋuɑ e tɑn sɑɑ jii Foŋɑnm nɑn muu k wul’i Yennu wulu.

¹² U diɑ u dilenn ŋmɑni e k yɑɑ wun lenn bonŋɑnn, k nyinn u dibin k wuun u buɑl ni, ŋɑɑn juo founŋ nɑ muu nbɑ kɑn mi k kpien nɑ ni.»

Sɑn wuul Yiesu Yennu nyunwulu

¹³ L yuo mɑnŋ k Yiesu din nyii Gɑɑliile k sɑɑn Suulden kpenu po, k bɑɑl Sɑn buol ni ɑ wun wul’ɔ Yennu nyunwulu.

¹⁴ K Sɑn k sɑk, k yet’ɔ ɑ: «Min e bo sɑɑ bɑɑl ɑ buol ni k ɑ wul’n, ŋɑɑn k ɑ mun tɑn bɑɑt n buol ni ii?»

¹⁵ Ŋɑɑn k Yiesu yet’ɔ ɑ: «Ŋɑɑnt k lin tun nnɑ mɔtɑɑnɑ, k mɑɑn nnɑ e k t sɑɑ fit tun lin nbɑ kul k Yennu luon.» L yuo nɑ k Sɑn sɑk.

¹⁶ Wɑɑ wul Yiesu Yennu nyunwulu k gbenn yuo nbɑ, l tɑɑkpɑɑk ni k Yiesu nyii nyun nɑ ni, k sɑnpɑɑpo tɑn luot, k u lɑ k Foŋɑnm siik u pɑɑk k nɑɑn nɑn ŋmɑnn nɑ, k tɑn jɑkn u pɑɑk.

¹⁷ K kunkɔl nyii sɑnpɑɑpo k yet ɑ: «N Bilonkɑk e nɑ, ŋuɑ e k n nunm gbuo’u.»